惡菌

大病一場...星期五早上返工係地鐵上,突然好頭暈,即刻落車座底休息...幾經辛苦返到公司,沾寒沾凍...喉嚨又勁痛....唔掂..到係走人...飛的返去媽咪樓下,睇醫生,原來發燒了...平時好少發燒既我...知道發燒真係好辛苦呢...跟住再上媽咪到瞓...瞓....瞓....

到4點半,接悠放學,個傻豬見係我,好開心...係屋企瞓左成日,成個人散晒..同隻豬仔去商場行下啦...

第二日星期六...無乜好轉,係無再發燒..但喉嚨超級痛...照下鏡,原來除左喉嚨發炎,連兩邊口腔都損晒...超痛呀
>_<

全日由老公照顧悠悠,我係床瞓完,再去梳化瞓..

星期日...老公要開工..我唯有自己揍悠..要再去睇醫生..悠陪埋我去啦...佢要小心,所以佢一定要戴口罩,仲一離開診所就叫佢洗手,洗手...

跟住去大家樂食個通粉早餐..豬仔好乖..知我病..幫我排隊..真係好底鍚...但我病..唔鍚得..要隔離 >_<

食完早餐,同佢去公園玩左一陣,見佢咁乖就帶佢去食雪糕,尋日屋企人話將軍澳中心開左間日式餐廳,有好靚既雪糕食既..於是去睇下...

原來係我至愛既綠茶專門店尼架...正呀~~~

有雪糕食..個傻豬勁開心呢...

到咗夜晚..惡夢來了...悠悠發燒呀
>_<....點解咁喎..明明隔離左,唔控佢,唔鍚佢,成日要佢洗手...都係中招了....屋企有備退燒藥,比佢食左後就退左啲啲,但半夜竟然高燒起上尼..佢第一次發咁高燒咋....

就係咁...成晚要照顧佢..我自己病未好既,仲要無覺好瞓....

到左星期一...當然雙雙請假啦..悠悠學校原先今日去參觀博物館架..攪到佢無得去..真係傷心..

同佢睇完醫生..兩個一齊返屋企食婆婆既愛心粥...好清淡,好好食...出街食個啲太咸喇..病個時食愛心粥,真係特別窩心...

今日我個喉嚨仲係超痛,醫生話咗要4-5日先會好...無計啦...嗚~~~

今日我地兩個病人,一齊去床到瞓完晏覺,再一齊瞓係梳化睇電視...悠悠唔肯飲水,唯有出動奶樽,開幾支勁稀既奶奶比佢,等佢吸收多啲水份啦...

到夜晚,悠悠開始真係退晒燒了..有返啲精神畫下畫...我都放心啲囉....

今次依個菌真係好勁,我估我係有小小手足口病既,不過幸好手腳無事,只係個口痛到我唔願做人啦...而悠悠,真係從未試過咁高燒,抱住佢,真係覺得好似攬住個熱水袋...係呀..係熱水..好熱個隻...

雖然到而家我喉嚨仲未好晒..不過叫做好返好多啦..過兩日好晒,要尼個屋企大消毒先得喇..