Happy Halloween @ 南瓜荔枝果凍

萬聖節快樂...

十月最後一日..天氣轉涼..而我都病左..全日係公司鼻水長流不息,狂打噴嚏,成個垃圾筒都係我包既雲吞....

尋日係吉之島買左兩隻小小小小南瓜,好得意...返去蒸左佢,切開個頭頂,清走入面既核同穌穌..

條懶根發作...求其用左之前買落既荔枝果凍粉,開左佢就倒入南瓜到...放涼入雪櫃..

今日返到屋企拎出尼,用刀仔核左塊臉比佢..咁就完成啦...好應節呢 ^^

切開一件件就食得..果凍好好味...但原來依啲小小小南瓜係唔好食既...

點都好...萬聖節快樂..我要食藥瞓覺去了....晚安...

朱古力紅桑子流心慕絲蛋糕 @ 呈之生日飯

好開心好開心既一晚....

因為今日好好朋友既呈呈同未婚夫阿沖尼左我地屋企作客...

前兩日我就開始準備,對於好中意整野食,又好中意宴客既我尼講...有朋友仔上尼食飯,真係超級開心...

今次餐飯係為慶祝呈既生日,蛋糕就一定走唔甩啦...

晚餐菜單係咁既 :

我地由7點,食食食..傾傾傾..傾到成11點幾,時間過得真係好快呢...

真係唔知點解,我同呈可以咁岩傾既...有講唔完既話題呢...

首先真係好多謝佢地咁遠尼我屋企作客...要你地搭咁耐車返去,真係辛苦晒了...

第二樣就真係要好多謝亞沖...影左好多靚相...以上既相都係佢影架...其中依張我真係超中意呢
^^

你又點止得部機影得靚啦....你既技術都係一流呢...kakaka

Halloween 南瓜曲奇

26-10-2012 星期五..悠悠學校十月份生日會加Halloween
party..

我地兩個都好期待依日,幫悠悠扮小惡魔,做啲小曲奇比佢帶返學,諗起都開心...

悠悠日日都問住幾時開party...今日..終於等到喇....

睇下個豬仔幾可愛...可愛既小惡魔..

再整個可怕既小惡魔樣.......其實都係好可愛呢..kaka

睇下個Halloween曲奇先...有兩款..點解會整兩款咁多呢...係咁既...

話說早兩日我已經焗好個餅,唧好左橙色底既糖霜,到左第二朝..個面變鞋左既???仲要唔乾????唔通係糖霜開得太稀?????

大鑊....今日收工即返屋企,整過叻一個款式先..依個款式真係有加入南瓜茸加..面仲有粒南瓜籽..咁先係真正既南瓜曲奇呢..

返到屋企,發現個糖霜曲奇乾左喎...雖然個面唔平,又唔令身...但...都OK啦....一於用埋佢啦..

溶啲朱古力漿...劃埋對眼同個咀...攪掂...兩款南瓜曲奇出世喇...

你又中意邊款呢 ??

忙碌的十月份

好多日無寫blog添...因為依個十月份真係好忙...

首先最忙係因為要減肥...晚晚就上網跟鄭多燕跳健康舞,所以無時間玩烘焙住..

然後有兩單結婚酒要飲...又有悠悠學校Halloween
party要準備,又有朋友仔生日..又要拜山..又要準備十一月去旅行既事...總之就忙到一頭煙啦...

首先講下上星期六去左同事結婚酒..今次帶埋悠悠去,好開心...同事們都有小朋友,可以同悠悠玩下..不過佢地都係哥哥姐姐囉....同事係中港城既酒樓到擺酒...環境一般啦...食物質素都可以啦..但就好趕咁...啲菜係咁上..再係咁收..碟上既未食完,就拿拿淋咁你仲要唔要..無人要即收走..再上另一個....但又唔係遲開始喎...咁趕收工既...

尋日,收工去做婦檢...雖然我仔都生埋..但仍然有一點怕...到左診所,瞓係床上,望住啲燈..個心好怕..第一時間諗...實在好驚,唔可能再生多個....都唔知之前悠悠出世時,我係點捱過既..

今日,一早9點幾起身,帶住悠同佢架單車仔...去食個早餐..會合埋屋企人,就出發去拜山..
調景嶺有條新路可以上到將軍澳墓場..但係到真係想講句...頂.....
條路雖然無油塘個邊咁斜...但源路一棵樹都無..大家係大大太陽底下乾煎...中途有幾張長椅..但都係無遮無檔...攪鬼座咩...之後行到去一個救護站,真係頂唔順,要座底休息下...依條路邊個設計架...叫佢自己係中午時份尼行下啦.....
幾經辛苦...終於安全上到去..真係差啲又要call白車...

返到屋企4點幾...同悠即去瞓個午覺...真係攰死人...
晚餐當然同拜山既食材有關啦....
有叉燒炒蛋,買咗舊冬瓜消下暑,整左個冬瓜枝竹火腩,仲有燒鴨,蒜蓉白菜仔,尋日買左兩件蒽油餅未食...焗返尼做晚餐..連白飯都唔洗煮...攪掂...

食完晚飯,仲要準備悠悠星期五開Halloween
party既餅餅...過兩日再同大家分享啦...瞓覺喇...晚安

Rainbow Cake

二妹生日,又係我可以練習做蛋糕既時間...

而家學會做蛋糕,慳返唔少買禮物錢...哈哈哈...

今次依個係好普通既海綿加忌廉既蛋糕,成本好底...但..所花既心機時間心血真係唔少野...

成個蛋糕整左大約三個鐘...之前係Vanlily個Blog到見到..後來買左本食譜書,入面又有..

原先佢係7隻色,但因為我焗爐細,我又得一個六寸模..一次只可以焗一層..

加上要焗大約15分鐘,我怕整好個麵糊會消泡...所以每一層都重新做一次麵糊..

所以我偷工減料..改為5層...

今次個忌廉打得幾好...不過始終天氣仲係熱...唧到頂層白色時,啲忌廉溶晒了..又變左一petpet....幸好色彩搭夠..一開出尼大家都係咁影相...

唱完生日歌..一切開..大家哇哇聲..再尼圍影...

我種滿足感..真係辛苦幾個鐘都值得晒...

做蛋糕真係為我帶尼太多樂趣同滿足呢....今次個海綿唔係咁鬆軟...忌廉都唔係好夠軟滑..我一定會再努力...希望日後大家入左口都仲會哇哇聲啦...^_^

親子蛋糕班

之前朝朝帶悠悠去搭車返學時,都會係巴士站遇到同村既一對母女..個妹妹叫飛飛,大悠悠三年,

今年佢升左上小一,搭左校車,所以都見唔到佢地了..

有次遇到飛飛媽媽,我地互留左電話..就係咁..今日飛飛就過尼學做蛋糕喇..

為左放便兩個小朋友一齊做..我就好似出面啲蛋糕班咁..磅好晒材料,一碗一碗咁放好..

前幾日好努力咁搵左個唔洗用打蛋器既..因為小朋友實在控制唔到呢..

就係咁..過左一個開心既中午呢...

飛飛媽媽仲好客氣,送左份禮物比悠悠..真係太多謝了~~

有小朋友一齊玩,悠悠真係開心好多..大家同埋條村,住得咁近,希望日後可以多啲一齊玩呢^^

朱古力香蕉批

又到星期六,返半日,放工返入將軍澳同兩父囡食午餐,

見到餐廳到有個香蕉批,好吸引...但我無點到..因為我想自己整...嘿嘿..

食飽先去左坑口新開既體育館,入面有個兒童遊戲室,人好少,唔洗排隊,好新淨,但無乜野玩,係比小朋友入去跑跑跳跳既地方~~

之後去買梳蕉,買包淡忌廉...返屋企開工..

我又大頭蝦發作..將啲分量攪錯晒..攪到個皮好稀先發現..重新尼過..氣死..

焗好個皮..打埋個淡忌廉...淡忌廉打出尼真係稀身好多...

搵唔到個唧咀...就咁剪個窿都OK既...

原先想話溶朱古力漿唧落去...但見個淡忌廉應該頂唔到幾耐...

唯有灑啲可可粉算了..都OK啦...幾好味..

不過個批底mama地..下次唔會再用依個譜...

所以都唔公開了...

朱古力雪芳蛋糕

答應左朋友仔係佢搬鋪前整多個朱古力雪芳比佢既...但因為以前一直忙住月餅既事...係假期前抽左一晚出尼整..點知..大失敗....成個甩皮甩骨..

眼見佢5號就要搬..搬左就離我公司遠左,唔方便送去比佢架喇
>_<....今日中午係公司係咁搵個岩洗啲既食譜..之前個個粉量好少..整完出尼水流流,都知有唔古怪..

今次搵左個食譜..有啲人話可可粉會令到蛋白消泡,所以先用油拌勻左先...

真係???咁試下啦..

成功...不過爆得唔夠靚仔啫..反轉左..OK啦...聽日有得交功課喇...呼....

親子活動之迪欣湖野餐

假期既最後一日..真係好鬼唔捨得...

首先有一件事想講..就係尋日既沉船事件..我睇到真係心痛..尤其是有兩位父母親眼睇住仔囡落海...我真係忍唔住喊出尼...做左人媽媽..我太明白佢地心情..個心真係好痛,好寒...希望死者安息..傷者快啲康復..而生還者既心情希望可以快啲平復....我諗以後10.1既國慶,都會令佢地帶尼陰影...係我地玩得好開心既時候...有人正在痛苦中....>_<

好..先放底啲難過事...生活總係要過既..

今日我地約左幾個家庭去迪欣湖野餐...

我整左香蕉蛋糕同芝士紫菜肉鬆麵包卷

不過好可惜,朗朗病左尼唔到,朗朗媽又要返工..連尼左既學學見到佢好朋友仔唔係度,都唔想玩,心情唔靚,嘈住要返屋企..所以佢地玩左一陣就走左了..

不過今日都總算玩得好開心,見到啲小朋友係草地上跑跑跳跳,真係令人好開心既..

希望各位小朋友都健健康康啦...^^以後大家再出尼玩