家庭聚會

尋日買左條豬仔骨,醃左一晚,諗住今晚做晚餐既..

中午同屋企人去飲茶..諗起之前細細妹去歐洲買左啲意大利米返尼,話下次要尼我屋企食...

咁不如煮埋佢啦...於是就舉家尼左我屋企喇...雖然話舉家..但其實都係多三個人啫..kaka

今日晚餐有 : 美式燒烤豬仔骨,
海鮮意大利飯,煎牛扒,煎新薯,芝士焗西蘭花同埋紅酒醋蕃茄青瓜沙律...

白酒菠蘿焗三文魚 & 煙肉磨菇橄欖青醬炒意粉

尋日去完迪士尼,今日返半日工..真係好攰呢...

收工返到屋企附近食個午餐就買埋餸返屋企休息下了...

到5點幾就開始煮飯...

前兩日買左包三文魚,加少少鹽,黑椒同羅勒醃一陣,跟住先諗..用乜野焗好呢...用白酒好似唔錯...好想用水果尼焗,清新啲..白酒配蘋果最夾..但無蘋果...諗諗下..有罐菠蘿..好..試下先..

跟住再煮意粉,第一次用青醬,先爆香煙肉,加磨菇炒,再加入橄欖,青醬,最後加入已煮淋既意粉..炒幾炒,加鹽同黑椒調調味...攪掂...開飯...

白酒菠蘿三文魚幾好味,菠蘿入晒啲白汁味,好好食呀..配菜比主菜美味...kaka

而意粉,今次真係炒得好好食,煙煙靱靱好好食...不過青醬比較油..可能不宜加煙肉...下次試下用其他代替先 ^^..

醬汁雞扒沙律

減肥..減肥...減肥....

依排真係前所未有咁努力減肥...我真係太頂我自己唔順...真係太肥啦...岩岩生完悠悠都未有而家咁肥呀..

好多人話,你成日整蛋糕,美食..梗係肥啦...但...我每次整..整完我都只係食兩啖,有時啲海綿蛋糕呀,麵包我都係第二日做早餐既..而曲奇就多數派街坊啦..至多下午肚餓先食兩塊咁大把...又關乜野事呢...

我諗我肥既原因..最大係因為自從生左悠悠後,日日返媽咪到食飯..必定最少四餸一湯,白飯任裝..咁...點唔肥啦...

而家唯有努力減肥...星期日我都係自己煮既..兩父囡唔洗陪我減..佢地食麵,我食沙律...

用煎焗方法煮左幾塊雞扒,用日本豉油,老抽,糖去收一收汁,雞扒岩岩熟,好滑,好味..

再整個紅酒醋汁..伴蔬菜食..好清新...

努力減減減....

好友聚會 High tea

星期日啦...九點幾起身,梳洗,食個包,開工!!!!!

上廚房整整整....好彩尋日預先做定好多野,食朝叫做輕鬆好多,係出左少少意外..

諗住整木糠布甸,個淡忌廉打極都打唔起,座埋冰都唔得..可能係我落練奶落得太急太快....唯有即刻去浸片啲魚膠片,再入去凝固到就算..點知又出奇到成功,仲幾好味喎..

到左12點幾,朋友仔出發過尼,佢話勁熱呀....咁我地原先諗住飲茶既..但咁熱,點飲熱茶啦...

我再走上廚房,用左5-6個茶包,煲左一煲苿莉綠茶,再加啲冰,再蜂蜜,放入冰格,等佢地一尼到就凍野飲先...

個Tea兩點就開始喇..睇下有乜野食 ...

有牛油果三文魚牛角包..

乳酪雜果沙律

香茅雞肉串燒

肉醬薯蓉批

自家制玉桂甜甜圈

仲有甜品,木糠布甸..

餐後,朋友仔教我用部相機,我依隻笨喵,至多吸收到1/10...哈哈..好笨...之後老公返尼,又要人地再教一次...真係辛苦晒...

今次都係朋友仔提供既相,佢真係影得好靚呢...我要努力學下野,第日將我煮既成品,唔好食都要影到睇落好好食先得...kakaka

雞絲芝麻醬冷麵

天氣勁曬勁熱..有個風打緊尼..熱到爆,原先想去游水,但老公又病喎..咁唯有放工返屋企啦..

不過唔好游水都好既,因為明天有朋友探訪,我要預備high tea,如果游完水返尼,實攰死,唔想郁啦..

於是我返到屋企就走上廚房,整整整,洗洗洗,切切切....熱熱熱...係到同大家講下,我屋企係村屋, 我地住三樓連天台,而廚房係係天台既,所以..無冷氣...如果開埋焗爐,真係溶得架..

預備完明天下午茶既野,就要做晚飯,熱成咁,真係唔想食,所以最好整冷麵,整好放落雪櫃, 到晚餐時間先拎出尼,咁就食得落啦...

迷你小椰撻

今朝好好太陽,一放同悠悠去踩下單車,嘆個早餐,同隻豬仔撐下枱腳先 ^^

跟住返到屋企又開始就上廚房..其實真係有啲內疚..我一放假就埋頭係廚房入面,都無點陪悠悠玩添...悠悠,媽咪下星期陪你玩吓...乖...kaka..

今日想整迷你小椰撻,想整好耐架喇,椰蓉都買左返尼,等左我好耐..今日終於動手..

搓好個撻皮,煮好個椰蓉,放晒入雪櫃,就同悠悠出去食午餐啦..

返到屋企,悠悠去瞓午覺,我就慢慢入模,啲椰撻係迷你版,所以可以整好多個,但撻模有限,要焗完一批再整第二批,第一批焗左17-18個左右,入爐時我又準備煮飯啦..

今日整味噌豬扒,好seafood咁整左個便當,不過材料有限,都係求求其其咁..

飯後再尼第二批椰撻,今次同悠悠一齊玩,佢整得好開心,出爐仲好中意食添喎,好滿足呢
^^

食飽飽,一家三口座係到睇電視,兩父囡都好中意盤座係地下,好得意呢...

芝士草莓藍莓批 & 啤酒燉牛肋條

又一個落雨天既星期六,收工買啲餸就返屋企啦...又無街去..

尋日有個朋友去街時,見到有間CAFE係到整梗蛋糕,佢就影咗啲相比我睇下..見到我又好想試下整添..

佢影個張相,個批應該係檸檬批底,面再加藍莓咁既...但因為我老公對酸味既野都唔太大興趣,所以我就改為芝士餅底,用美式芝士餅既做法尼做個底,跟住再係面上放水果..

今次個批皮幾唔錯,鬆脆唔硬,又唔會太濕軟,好容易壓入模內..

今日另外整左個黑啤燉牛肋條,係廚房一邊燉緊牛肋條,一邊預熱緊焗爐..熱到差啲連我都煮熟...

個牛肋條煮左差唔多三個鐘,好淋好味,原先睇個食譜係落黑啤,蕃茄去燉,調味就得鹽同黑椒..好似怪怪地..咁未好啖囉?於是我加啲雞湯去燉,出尼都唔係好濃味,都算清淡..唔知用原食譜出尼會點呢
>_<

另外仲好簡單咁整個香草焗雜草,加入左南瓜,好清甜,小小香草,鹽同橄欖油,就焗出好好味既雜菜^^

父親節大餐

一早忙完個蛋糕order,下午出去食完午飯,就趕返屋企準備父親節晚餐,同老公慶祝啦..

今日菜單有尋日食淨既芝士洋蔥煙肉包,切片焗成多士,香口好味..

主菜就有跟阿V食譜整既黑椒炆德國豬手,好好食,大家可以去參考下 : http://blog.yahoo.com/happy_Mrs.T/articles/1218498/index

香煎德國香腸配BBQ汁

蔬菜就有芝士溫泉蛋焗菠菜, 香草煎新薯..

甜品就係跟悠悠既偶像Jamie
Oilver整既香蕉Baileys麵包布甸,佢既食譜真係唔錯架,大家可以去參考下 : http://www.jamieoliver.com/recipes/bread-recipes/banana-baileys-bread-butter-pud

伴埋雪糕食,真係好好味呢...不過大家記得減糖呀,外國人真係食得好甜既...我減左10g都仲係覺得甜,下次再減多啲先得...

 

芝士洋蔥煙肉包 &amp; 西班牙炒飯

今日全日都係咁落雨,放工即刻返去,買埋餸同午餐就返屋企..

食完午餐,就上廚房搓包,同準備晚餐

今日搓個咸包..邊搓邊諗..搓搓下先諗起可以用洋蔥煙肉..即刻切碎,炒香,放埋入麵團,再搓到薄膜,發酵時就準備晚餐既沙律...

今次個沙律用青瓜,蕃茄仔同紅蘿白,第一次試用紅酒醋,加小小豉酒,檸檬汁,碎洋蔥,蜜糖,又幾好味幾清新喎..

跟住再整埋個包,發酵第一次後,分割三分滾圓,靜置十分鐘,排氣,再滾圓,入模,發酵至兩倍大,面放己炒香洋蔥煙肉碎,再磨上芝士碎,180度焗大約15分鐘至金黃色,完成..

而今次主菜係西班牙炒飯,我平平地用壽司米做,先炒香煙肉碎,洋蔥,蒜頭,跟住落米,加少少白酒炒,乾少後再加再炒,之後就加雞湯,蓋過米就夠,跟住蓋好,中慢火煮,煮到仲有小小水時,加入茄汁(正常無既,但我中意有蕃茄味..同埋我無加好貴既蕃紅花,所以補啲色水),再加入已汆過既海鮮,放面,再蓋住煮至收水乾身..咁就完成啦..

依個飯我最中意係原鍋上枱..碟都洗少隻..哈哈哈

香煎魚柳配南瓜汁長通粉

尋日係超市見到迷你南瓜仔,諗起有間食意大利粉既舖頭,上碟時有原隻迷你南瓜仔既,隻南瓜仔好甜好好食既,一於抄考下佢先...另外買左一包魚柳,十幾蚊有兩件..抵食..

今日中午預先蒸熟隻大南瓜先,跟住再蒸埋兩隻細既...

然後大個隻就加啲奶,打成蓉,再過篩...過程真係好煩..過篩壓左好耐..好攰呀...

夜晚煎魚柳,用下好朋友係沖繩帶返尼既胡椒鹽先...好似特別香咁...哈哈哈

跟住煮埋個南瓜汁..攪掂...開飯!!

大蝦喇沙米線

之前係FB見有人推介,話百勝廚既咖喱即食麵好食喎..再睇睇下,原來佢有我至愛既喇沙,仲係全球即食麵No.1喎...咁梗係要試下啦..

知道係一田有得賣,打去叫家姐買,佢公司附近就有間一田..比埋相佢..條友竟然買左..

喇沙湯料...得湯料咋...無麵架.....

咁唔買都買左..佢都係百勝廚既,唔緊要啦..試下啦..

買幾包米線,加啲豆卜,芽菜,仲有煎幾隻大蝦,咁就攪掂..

佢確實係幾香濃好味喎...可能我開太多水,唔夠咸味..但香味好足..我愛呀..下次一定要買返即食麵個隻試下先..

朱古力藍梅慕絲軟心蛋糕

今個星期好懶,無乜作品出爐...因為..天氣實在太熱了...完全唔想上去廚房呢..

尋日都係由老公煮飯,仲要叫佢煮冷麵..熱野跟本放唔入口呢...kaka

今日到我放假,的起心肝啦..

之前睇台灣節目既阿基師,用微波爐煮左個味噌豬肉,好簡單,好放便..雖然話微波煮食真係好無益,但..一次半次..原諒自己啦..kaka..

首先醃肉,用兩湯匙白味噌,跟住我自己加左小小日本鼓油,味淋,糖,白酒,黑椒...其實醃料好除意,重點有味噌就得啦..

跟住唔好包住,放入微波爐叮8分鐘,拎出尼襯熱用保鮮紙包住,等佢再焗20分鐘至熟透..然後切片,餘下既汁倒埋落去肉片上..完成!!超快,又唔洗開火咁熱..kaka

另外就買左包日式炒麵,有埋醬汁個隻..加啲椰菜炒幾炒,食得..餐飯唔洗半個鐘就完成啦..

咁就大把時間攪個甜品...

前一排一直好想食朱古力淋面既蛋糕,但出面賣得實在太貴..一角要二十幾元,咁買全家人食就成百元,..真係太貴..今日自己整返個..仲要無食譜..超隨意做法..

首先做好個海綿蛋糕,切成兩片..一片放係模底..

跟住打起忌廉,分一半..睇下雪櫃有乜先..見有藍梅果蓉..就解凍後,加入忌廉到,放入模..

另一半,就加入朱古力忌廉溶,拌勻,模內放入另一片海綿,再放入朱古力慕絲..

淋面就先將朱古力同忌廉座熱水,然後加水,加糖,加可可粉,加入浸軟既魚膠片,拌勻,過篩.然後放涼少少就淋上蛋糕面,雪凍後,隨意畫啲朱古力圍邊,加啲士多啤梨做下裝飾,灑啲金粉咁..攪掂...加埋大約40元就得,有一個夠全家人食啦...

港式雞尾包

今朝9點幾就起身..食完早餐就走去搓包,搓個時都未諗到整乜包..整左個包底先算..

發酵時再上網睇下..見到想整好耐既雞尾包...材料又有整喎...咁就係你啦..

2點前攪掂晒出爐..香噴噴...

跟住就出去食個午飯,飲個茶先...之後買餸就返屋企..

今晚簡單啲..整個炒粉麵..諗起整左雞尾包..咁尼到個港式炒粉麵...乾炒牛河..

先醃好牛肉,切好洋蔥同蒽..可惜係超市買唔到銀芽呢..

跟住將啲河粉一條一條咁撕出尼...

煲返個薏米腐竹糖水送粉先...一流呀...

話咁快開得飯...

牛奶白吐司

好開心好開心好開心....

一直以尼,睇住何師奶既吐司...真係好好好吸引我...

但佢既食譜麵團係超濕,佢講明,新手勿試...

雖然我都搓左唔少包包出尼..但吐司..我真係無一次叫做好成功既...

今次瞻粗粗..試下...個麵團真係好濕好痴手...我用麵包切刀幫手摌起麵團,係咁撻撻撻..撻到手都軟...睇住超濕既一pet野..慢慢成為一舊麵團...個感覺真係好感動...

以下張相係何師奶既..想比大家睇下個麵團有幾濕..因為我搓個時,痴到成手都係..拎唔到電話影相呀....唯有借張相尼分享下..keke

搓完放入袋..室溫發酵15分鐘,就放入雪柜過一晚...大約過左20個鐘我先拎返佢出尼...再室溫放15分鐘...分割兩份,滾圓,靜置10分鐘,做型,入模..

放左入模後,我就開始煮飯,今日天氣唔算好熱,我將個麵團放近爐頭,等煮飯時既熱力幫佢發酵..

今日煎牛扒..加上又要清野...買左兩條青瓜,加埋啲蘋果同乳酪,就做左個沙律..

仲有兩條粟米,切件,用牛油煎焗..

跟住就有前幾日去學既法包,仲有半條,切片,焗脆,用牛奶同忌廉煮個忌廉磨菇湯..

再尼就用紅酒同唔知乜菇,煮個紅酒汁拌下牛扒同白飯...

攪掂...超豐富晚餐...好飽呀...

食飽飯後,睇返個吐司先...發到九成囉喎...入爐..180度..30分鐘..依個溫度同時間都真係岩岩好..之前個啲多數寫200-210度..次次都焗得唔多夠熟,但面又就燶..以後吐司我都知要點焗啦..

出爐喇..焗吐司每次都好緊張,因為佢係個模入面,又睇唔到焗成點,只係靠食譜既時間,真係好驚呢..一打開..哇..靚仔..倒出尼..哇..超靚仔...再尼放涼切開...哇哇哇...超軟綿..好難切呀...

好開心,真係好開心...成功挑戰到個超濕麵團喇...証明左..我唔係新手啦..kakakaka

三色腸拿破崙螺絲長通粉

星期六,唔知係唔係病仲未清,攰攰地咁,收工係屋企附近食午飯,行一陣就返屋企瞓晏覺..

今晚餐飯好簡單,只要買兩隻青椒..

因為今日要清理雪柜既餘下物資..

冰箱有兩款腸仔,一粗一幼..下格仲有德國腸片,同埋有一樽媽咪比我既意粉醬,再加埋兩包都食左一半既螺絲粉同長通粉,咁就做到一個三色腸拿破崙螺絲長通粉喇...

上次食個意粉醬,唔多好食,太重香草味,我自己平時好少買意粉醬,覺得係要自己煮既先好食,今次媽咪買多左,咁我唯有用埋佢啦,自己加啲茄汁同檸檬汁,出尼估唔到咁好味喎....

 

什乾果全麥麵包

一早九點幾就起身,陪悠出去踩單車,去當當食個早餐,買埋餸就返屋企..

返到屋企放底單車,休息一陣又出發去坑口,同老公,悠姨媽飲下午茶..

飲到三點幾,姨媽請我地去食雪糕火鍋..正啊....老公開工無份吃..kaka..

之後再陪悠悠去坑口既兒童遊戲室玩一陣..

返到屋企5點幾..無乜野做...悠悠話要整包包..好啦..開工

親子包包..得返全麥粉..睇下仲有無野材料..有提子乾,橙皮乾...加啲杏仁碎...

就係咁..什乾果全麥麵包出爐....

第二次發酵發得未夠就焗,出尼個包比較實重...但老公話中意依個口感...

錯有錯著..哈哈

今日晚餐煎雞扒..成功煎到一個脆卜卜雞扒..好滿足..

之前做左個醉蛋,但啲蛋煮太熟...老公忍唔住自己又煮左啲蛋落去啲酒到浸,今日食埋佢啦....

飽晒 ~~~~

煖,菲生日會 @ 芒果藍莓芝士蛋糕

今日同舊同事攪生日會,晨咁早起身,叫老公直接車我地入屯門,因為要拎埋前一日做好既蛋糕,同埋一啲調味料,出發去菲菲家再開工...

十一點多到達,放底蛋糕,就一齊出去屯門市中心食啲野,再去超市購物

我地為求放便,大家分頭拎野...但原來唔得架,因為啲男人唔睇價錢..最可怕係淡忌廉,竟然要$31一包,我地買三包成$93,好彩比錢時我地睇到,即刻唔要..再去吉之島,係$52三包呀...平成$41呀..差好多好多呢..

一點多到達菲菲家,開始開工啦...多得菲菲幫手,真係整得好快,三點幾我地就做好晒準備..

到四點幾,其他人都開始尼到,我地做埋最後煎煎焗焗,就開飯啦..

菜色都係個幾款我既拿手小菜..kaka..無信心既,未敢出尼見人..哈哈

食到咁上下,就係雪柜拎個燉蛋出尼,加上綿花糖係面焗..點知...大家掛住玩...燒燶綿花糖添..噢NO.....

最後到生日蛋糕出場喇..依個蛋糕攪左我三個鐘呀...為左菲菲中意既pooh pooh,
又一直想試彩虹蛋糕,我就一次過滿足晒你兩個願望啦..kaka

紅,綠,紫係海綿蛋糕,黃色就係芒果芝士,藍色就係藍莓芝士,

祝你兩生日快樂..希望以後每一年都可以大家一齊玩呢 ^_^