好友聚會 High tea

星期日啦...九點幾起身,梳洗,食個包,開工!!!!!

上廚房整整整....好彩尋日預先做定好多野,食朝叫做輕鬆好多,係出左少少意外..

諗住整木糠布甸,個淡忌廉打極都打唔起,座埋冰都唔得..可能係我落練奶落得太急太快....唯有即刻去浸片啲魚膠片,再入去凝固到就算..點知又出奇到成功,仲幾好味喎..

到左12點幾,朋友仔出發過尼,佢話勁熱呀....咁我地原先諗住飲茶既..但咁熱,點飲熱茶啦...

我再走上廚房,用左5-6個茶包,煲左一煲苿莉綠茶,再加啲冰,再蜂蜜,放入冰格,等佢地一尼到就凍野飲先...

個Tea兩點就開始喇..睇下有乜野食 ...

有牛油果三文魚牛角包..

乳酪雜果沙律

香茅雞肉串燒

肉醬薯蓉批

自家制玉桂甜甜圈

仲有甜品,木糠布甸..

餐後,朋友仔教我用部相機,我依隻笨喵,至多吸收到1/10...哈哈..好笨...之後老公返尼,又要人地再教一次...真係辛苦晒...

今次都係朋友仔提供既相,佢真係影得好靚呢...我要努力學下野,第日將我煮既成品,唔好食都要影到睇落好好食先得...kakaka

芝士洋蔥煙肉包 & 西班牙炒飯

今日全日都係咁落雨,放工即刻返去,買埋餸同午餐就返屋企..

食完午餐,就上廚房搓包,同準備晚餐

今日搓個咸包..邊搓邊諗..搓搓下先諗起可以用洋蔥煙肉..即刻切碎,炒香,放埋入麵團,再搓到薄膜,發酵時就準備晚餐既沙律...

今次個沙律用青瓜,蕃茄仔同紅蘿白,第一次試用紅酒醋,加小小豉酒,檸檬汁,碎洋蔥,蜜糖,又幾好味幾清新喎..

跟住再整埋個包,發酵第一次後,分割三分滾圓,靜置十分鐘,排氣,再滾圓,入模,發酵至兩倍大,面放己炒香洋蔥煙肉碎,再磨上芝士碎,180度焗大約15分鐘至金黃色,完成..

而今次主菜係西班牙炒飯,我平平地用壽司米做,先炒香煙肉碎,洋蔥,蒜頭,跟住落米,加少少白酒炒,乾少後再加再炒,之後就加雞湯,蓋過米就夠,跟住蓋好,中慢火煮,煮到仲有小小水時,加入茄汁(正常無既,但我中意有蕃茄味..同埋我無加好貴既蕃紅花,所以補啲色水),再加入已汆過既海鮮,放面,再蓋住煮至收水乾身..咁就完成啦..

依個飯我最中意係原鍋上枱..碟都洗少隻..哈哈哈

酥皮牛角包

今日係端午節假期,出面一陣係到落雨,尋日已經買好晒餸,今日全日係屋企閉關..

朝早食完早餐,同悠悠一齊睇碟,睇龍貓..真係估唔到..龍貓,悠悠都可以睇到喊到豬頭咁...洗唔洗咁感性呀..

下午無無聊聊,見今日天氣又涼涼地..好..玩下酥皮先...

首先,120g高粉,加30g底粉,再加30g糖,1g鹽,10g奶粉,4g酵母,同埋10g牛油...搓到光滑..

然後發酵20分鐘,再放入雪櫃雪凍..

另外70g牛油,碌扁成長方型..雪硬..

跟住就要開行冷氣,將雪凍既麵團拎出尼,碌平,放入牛油,摺三摺,再碌,再摺三摺,再碌,再摺,再碌,今次摺四次,跟住碌平,切成三角型,卷起成牛角型..

室溫發酵至兩倍大,面搽蛋液,190度焗13-15分鐘..

一出爐...老公一口氣食左三個....我..真係而家先知..原來佢好中意食酥皮既....

雖然煩..但見佢咁中意食,真係好開心好滿足呢...

冬甩麵包

尋日一家三口去左赤柱玩,今朝成個人散到不行...手腳酸軟到震...

攰還攰,今日都有整包包..話說婆婆樓下商場開左間A1,悠悠同啲同學仔差唔多朝朝都去買個冬甩麵包,然後一人一半..見佢地咁中意食..我又心思思想整下..

於是食完個早餐就上廚房搓包..搓左幾分鐘,對手已經酸到爆...無力添...求其搓多一陣算啦..

發酵,做型,整比小朋友,整個迷你版,另外整四個大既..大人當然唔好食朱古力彩針啦,所以我係面灑啲玉桂粉同砂糖先焗

迷你版首先出爐,溶啲朱古力搽係面,再加朱古力彩針..攪掂..靚晒..

而玉桂味既都出爐喇...哇...香到..真係成條村都聞到呀...哈哈哈

今次手軟軟咁搓包..又估唔到幾得喎..個質感好好好好食呢...依個包..要encone!!

港式雞尾包

今朝9點幾就起身..食完早餐就走去搓包,搓個時都未諗到整乜包..整左個包底先算..

發酵時再上網睇下..見到想整好耐既雞尾包...材料又有整喎...咁就係你啦..

2點前攪掂晒出爐..香噴噴...

跟住就出去食個午飯,飲個茶先...之後買餸就返屋企..

今晚簡單啲..整個炒粉麵..諗起整左雞尾包..咁尼到個港式炒粉麵...乾炒牛河..

先醃好牛肉,切好洋蔥同蒽..可惜係超市買唔到銀芽呢..

跟住將啲河粉一條一條咁撕出尼...

煲返個薏米腐竹糖水送粉先...一流呀...

話咁快開得飯...

牛奶白吐司

好開心好開心好開心....

一直以尼,睇住何師奶既吐司...真係好好好吸引我...

但佢既食譜麵團係超濕,佢講明,新手勿試...

雖然我都搓左唔少包包出尼..但吐司..我真係無一次叫做好成功既...

今次瞻粗粗..試下...個麵團真係好濕好痴手...我用麵包切刀幫手摌起麵團,係咁撻撻撻..撻到手都軟...睇住超濕既一pet野..慢慢成為一舊麵團...個感覺真係好感動...

以下張相係何師奶既..想比大家睇下個麵團有幾濕..因為我搓個時,痴到成手都係..拎唔到電話影相呀....唯有借張相尼分享下..keke

搓完放入袋..室溫發酵15分鐘,就放入雪柜過一晚...大約過左20個鐘我先拎返佢出尼...再室溫放15分鐘...分割兩份,滾圓,靜置10分鐘,做型,入模..

放左入模後,我就開始煮飯,今日天氣唔算好熱,我將個麵團放近爐頭,等煮飯時既熱力幫佢發酵..

今日煎牛扒..加上又要清野...買左兩條青瓜,加埋啲蘋果同乳酪,就做左個沙律..

仲有兩條粟米,切件,用牛油煎焗..

跟住就有前幾日去學既法包,仲有半條,切片,焗脆,用牛奶同忌廉煮個忌廉磨菇湯..

再尼就用紅酒同唔知乜菇,煮個紅酒汁拌下牛扒同白飯...

攪掂...超豐富晚餐...好飽呀...

食飽飯後,睇返個吐司先...發到九成囉喎...入爐..180度..30分鐘..依個溫度同時間都真係岩岩好..之前個啲多數寫200-210度..次次都焗得唔多夠熟,但面又就燶..以後吐司我都知要點焗啦..

出爐喇..焗吐司每次都好緊張,因為佢係個模入面,又睇唔到焗成點,只係靠食譜既時間,真係好驚呢..一打開..哇..靚仔..倒出尼..哇..超靚仔...再尼放涼切開...哇哇哇...超軟綿..好難切呀...

好開心,真係好開心...成功挑戰到個超濕麵團喇...証明左..我唔係新手啦..kakakaka

法包&香草包 - 學習編

團購課程,經歷過一啲不知名既課程,學左一啲不知所謂既蛋糕班之後,有啲怕左團購,但知名既課程又唔同喎..今次見到I Love
Cake攪既法包班..仲要係灣仔,就係公司附近..一於gogogog..

課程一開始就係搓搓搓啦...跟住發酵啦..原來除左法包,仲有香草包,我都無留意到添..

我地搓既係香草包,而法包係一早已經用機打起左,放係雪柜發酵左八小時..拎出尼只要做型就得..跟住就入爐了..

香草包做完第一次發酵後,就滾圓,靜置5分鐘,再按扁放上加左油既長方型焗盤上,第二次發酵後就係面按啲手指洞,然後就可以入爐了..

跟住啲時間都係等等等等等....

由7點整到10點,完成...出爐好香好香...拎住袋包包搭車..成程車都聞到麵包香..

經過今次法包課程,我知道自己學包包叫做學晒喇..餘下就係自己練習練習再練習...我會努力比心機,做出一手好包包既..加油!!!!

各款腸仔包

今日中午同悠悠姨媽去左行姨媽傢俬,買左一套戶外枱椅,好期待送貨尼,要打理好個天台,招呼下人先得..keke...

返到屋企都成5點..同悠悠上廚房整包包先...

屋企有腸仔,有蟹柳,有菠蘿,全部都係淨餘物資....叫悠悠幫手切腸仔同蟹柳,我就搓包包..

整左三款包,全部有腸仔既...

有腸仔包,芝士沙律腸仔包,同埋有腸仔既Pizza包...好味道^^

日式菠蘿包 & 焦糖蘋果蛋糕

返左香港兩日,病足兩日..但都好乖,有煮飯...

今日精神好啲..要整下野啦..

尋晚已經搓定舊麵團,今早中午就有日式菠蘿包出爐,

因為悠悠爭住要搓,但舊面團都幾濕..我唯有搓好先比佢..可能係咁..有點搓過度..有小小煙煙韌韌咁...

整完包包,悠悠幫手洗碗..真係乖...可惜佢對洗潔精又係敏感....下次唔比佢洗了
>_<

中午就出去同屋企人飲茶,買埋餸返屋企,有時間..又整個蛋糕..睇左好耐..諗起買左一包好多個蘋果..就整蘋果蛋糕...

出爐時好香...個樣唔錯...

夜晚沖完涼...沖杯茉莉綠茶..嘆返件先...哇..又幾好食喎..食晒一件..仲想再食添...好味呀...

依個蛋糕食譜....我點都再搵唔返食譜主人...所以..唔寫出尼喇...想要再PM我啦...keke

什乾果全麥麵包

一早九點幾就起身,陪悠出去踩單車,去當當食個早餐,買埋餸就返屋企..

返到屋企放底單車,休息一陣又出發去坑口,同老公,悠姨媽飲下午茶..

飲到三點幾,姨媽請我地去食雪糕火鍋..正啊....老公開工無份吃..kaka..

之後再陪悠悠去坑口既兒童遊戲室玩一陣..

返到屋企5點幾..無乜野做...悠悠話要整包包..好啦..開工

親子包包..得返全麥粉..睇下仲有無野材料..有提子乾,橙皮乾...加啲杏仁碎...

就係咁..什乾果全麥麵包出爐....

第二次發酵發得未夠就焗,出尼個包比較實重...但老公話中意依個口感...

錯有錯著..哈哈

今日晚餐煎雞扒..成功煎到一個脆卜卜雞扒..好滿足..

之前做左個醉蛋,但啲蛋煮太熟...老公忍唔住自己又煮左啲蛋落去啲酒到浸,今日食埋佢啦....

飽晒 ~~~~

自家親子Pizza + 美祿奶凍

又到星期六,中午返到屋企無乜野做..同悠悠玩親子Pizza...

一齊搓下麵團,搽啲意粉醬,再加上西班牙火腿,菠蘿,蕃茄,洋蔥,同青椒,焗10分鐘左右,食得...

今次用意粉醬唔掂..太稀,攪到個皮淋晒,唔得脆口...下次都係用茄汁好啲...

另外又整左個美祿奶凍...之前有包美祿一直放係公司無點飲過..拎鬼左佢返屋企整奶凍..好好味呢
^^

菠菜肉鬆紫菜包

7/12,
星期五,今日同BB姨姨食生日飯,一家人去左坑口村扒房,食左一餐好豐富既晚餐,媽咪唔太岩食依啲鬼佬野,太肉太濃了..keke..

8/12,
老公話好想煮羊腩煲,BB姨姨打尼,話原先同媽咪去澳門玩既,但因為媽咪既咳一直未好,所以取消左,變左佢地今日無野做...所以就叫埋佢地幾個過尼我屋企齊齊食羊腩煲啦..

除左個羊腩煲,老公仲整左個臘味飯,買左一包肥牛,生菜,脆肉鯇,炸魚皮,响鈴等等...配埋自家既荔枝酒,一家人食得好鬼開心...比尋日出去食要開心啲添呢...kaka...

今日我仲跟Angie整左個菠菜肉鬆紫菜包,個菠菜係前幾日買既,買左一斤,有半斤打左做菜蓉,放左入冰格,今日拎返出尼解凍...本來係就咁菠菜包既,岩岩今日係Angie到又見到佢整左紫菜肉鬆包喎..諗起配埋菠菜都夾味呀,就係咁,係食飯時間個包包就出爐,一出爐佢地都話要食..一邊羊腩煲,一邊再食包,攪到我相都影唔切,只係影到一張....不過感覺真係好開心...原來包包一出爐,咁多人响應,係一件咁開心既事...平時只係一家三口時,好難有依種感受呢...keke

全麥忌廉芝士包

手痕痕,手痕痕...唔係想打麻雀呀...係想搓包包...

屋企得返麥粉,就整麥包..懶攪做型..入面包啲忌廉芝士,滾圓,發酵,入爐,食得...

今日晚餐,玩BBQ,唔洗上天台燒炭,用個BBQ爐,係屋入面燒...

買左啲材料,串起,攪點...一邊慢慢燒,一邊飲自家梅酒..正到暈呀...

熊貓不見了

做左咁多包包,有成功有失敗..但吐司就仲未有一次叫做非常成功..

上網見到個熊貓吐司,好想好想做...但又好無勇氣..

今日同同事講開,佢一句話,未試下囉,唔得又唔洗死既..

咁又係...好..比啲勇氣...做!!!

搓面團時,覺得面團好濕..有啲擔心..

做型時更甚...壓平係好黏,做到一petpet咁...

今日天氣好熱下..發酵得好快..依個係最開心既..

入爐後...好香好香好香...綠茶味好濃...點解入左吐司模都會咁香呢?

睇清楚..原來發到漏晒出尼喇...真係好勁呢...

出爐後..真係頂角喎...梗係頂啦..頂到瀉添啦...

係個邊見到啡色..就知個熊貓實走晒樣了...

一切...變左Snoopy既????kakaka

雖然變左樣..但質地好好,味道好好..算係我一次好成功既吐司了...yeah~~~