紅棗小蛋糕

今日係公司上網時,見到大少奶整咗個紅棗焗蛋糕,個樣超吸引我喎...係公司又放左包勁大粒紅棗係到喎..拎返三大粒返去開工先...

依個蛋糕做法簡單,所以同埋悠悠一齊整,佢負責攪攪攪,我就打蛋白同fold-in..

放埋入杯,好快就食得..

不過唔記得留返幾粒仔紅棗碎放面...啲紅棗沉晒底,無乜睇頭添..

個蛋糕口感好得意,有啲煙煙韌韌咁,真係幾好味呢..食完仲想食多個...

食譜參考 : http://blog.yahoo.com/iamtaisiu9/articles/1032786/index

茱莉花湯丸

今日少有係屋企寫BLOG,因為岩岩做好個湯丸,好好味,想襯今日元宵就同大家分享..

其實一直以尼,我都比較中意食無餡湯丸既..今日同悠悠一齊搓成熊貓型,好得意呀..

小朋友怕飲薑湯,我改用茱莉花,湯底好香好清新,湯丸本身無味,所以湯底要做甜小小,

祝各位元宵節快樂呀 ^_^

 

與米奇共進下午茶

話咁快,尼到假期最後一日,真係超唔捨得......

今日約左菲菲去迪迪尼酒店食tea
buffet,未去前一直好擔心悠會怕卡通人物,因為以往經驗佢都好驚既..今次再三問佢,佢話唔驚,佢會同米奇影相..我先再夠瞻試下..

一入到酒店餐廳,一座底就見到Pluto,悠悠即大叫好驚.....我心諗...大鑊.....算啦,食野先,等佢冷靜下先..又估唔到依度幾多野食喎,雖然無任何海產類,只有壽司..但其他食物都幾精致,都唔錯啦...

食食下野,又見到Daisy,悠悠竟然唔驚,主動話要去影相,仲摸下佢..叻喎...

再尼到高飛..高飛真係好高..悠悠又好驚啦.....咁我自己影相喇..kaka

最後到Mickey尼喇..悠超開心,同佢影相,又攬又鍚,仲同Mickey拖住手,同其他小朋友一齊轉圈圈,排火車...開心到佢...

好彩今日人唔多,得半場人,所以啲卡通人物都好得閒,可以慢慢影相,慢慢玩..不過最可惜係無見到悠悠最中意既Minnie呢...

今次悠悠唔再驚卡通人物(除咗狗隻類..keke)..咁下次我地可以入迪迪尼玩啦..yeah!!!

The One + Harbour City

又到星期六喇..老公放假..yeah..

瞓到十點幾,老公起身煮早餐過我地食,好開心,好難得一家三口一齊食早餐呢...

食完早餐,係屋企hea一陣,點幾鐘就出門口,去尖沙咀行下....

見到舊同事菲菲去The One影鴨仔,我又想去影..老公話想去行City
Super,岩喇...尖沙咀啦..

係The
One影左一輪相,鴨仔真係好靚,影相勁靚,加上日頭去,玻璃外透入陽光,出尼啲相睇到都開心..跟住我地落吉之島行,有12蚊點同超市,岩晒我掃貨..我同老公都中意行吉之島同City
Super依啲外國超市,中意每件貨慢慢睇,睇下有乜新奇特別既新產品..

真係估唔到,The
One咁細..我地只係行頂樓個間精品店同吉之島,都行成個幾鐘...

之後就轉戰海港城,一入去..見到朱古力佈置,又狂影一輪..之後去City
Super行,慢慢睇,買左幾樽香草返去,返到屋企都十點幾囉...好攰,但好滿足既一日

情人之夜 @ 德國咸豬手 + 黑加倫子白朱古力芝士蛋糕

今日係19/2,
終於有時間寫返之前既blog,成個新年,真係無望個部電腦,無拎起過隻老鼠...尋日第一日開工,全公司人返晒尼,啲大粒係到,又唔放便寫blog..今日終於寫得啦...由於今年新年公公既離開,我地唔派得利是,唔去得人地屋企,唔返得媽咪到拜年..所以成個新年係無乜新年氣氛既...初一只係屋企附近飲茶行下,初二就一家人去左愉景灣逛逛,夜晚就一齊食飯同家姐慶祝生日...所以無乜特別要寫...咁就尼寫情人節啦...

今年情人節係初四,係紅日,好開心,可以係屋企慢慢整整整...情人節我多數中意自己係屋企整,因為真係接受唔到出面座地起價,仲要同人迫囉...

今日既主菜係豬手,老公一早想食,今次做法係開一煲水,加入黑椒,八里香,鹽,放入豬手,滾起後慢火炆煮兩個鐘,抺乾,再放入220度既焗爐入面,豬手面每5分鐘掃一次啤酒,直至金黃色..

不過今次炆得太耐,啲肉過淋咗啲,下次改炆一個鐘,然後浸住佢好了...

係焗豬手時,個焗爐突然卟一聲,然後個發燒線熄左...唔通燒左???豬手未焗好..唯有改為煎..又OK喎..個面好脆口呀...

以為要換新焗爐添..點知第二日開返又無事喎??奇怪..點都好..慳返..kaka

情人節,唔少得甜品,今次做左個黑加倫子白朱古力芝士蛋糕,好中意個浪漫既紫色..只係睇都覺得淘醉呢...不過整左先知原來黑加倫子係咁酸既,仲以為係甜既添..我中意酸呀,但我老公中意甜呢...咁岩啦..佢食朱古力個層,我食黑加倫子個層..kaka..

黑糖薑汁年糕

尋日星期六,老細好好屎咁唔洗我地返工,真係超happy,因為新年對我老公尼講,同平時一樣,無假放,一樣係逢星期六放假..難得有一日一齊放假,我地又出去行下啦,所以新年食品乜都無整..

到左今日大年初一..同大家講恭喜發財先..仲有身體健康,新年快樂,步步高陞呀!!!

今日下午先同屋企人飲茶,朝早一早起身,就好勤力咁整個黑糖薑汁年糕啦..今年得佢一味咋..幾鬼懶呢...keke...

用Mickey模,蒸完出尼個年糕勁軟糯,要雪凍左先免強甩到模..見到佢個靚仔樣,真係好開心,新一年,開開心心,好事一定係咁尼呀
^^

霸皇雞

係之前份工,成日都要出差上深圳公司,個陣時係深圳,午餐時間好長,由12:15-2:00,好鬼happy既..我地成日都會去一間菜館食午飯,國內人午飯,唔興一人一碟,佢地偏愛小菜型式,其中一道菜,霸皇雞,係我超中意既其中一邊,其實每次上深圳,都好期待午飯,因為上面好多間食店既野都好好味既,香港既快餐式真係要學習一下....

而家轉左工,唔洗再上深圳,我成日都會好掛念依道霸皇雞,唯有自己動手...首先一定要準備大量蒽,切成絲,再加啲莞茜備用..

雞洗淨,放入一煲加左薑蒽既大滾水入面,煮約5分鐘,熄火焗約半小時至熟透..

拎出尼吹乾,切件,面放上蒽花莞茜

開鑊,放一碗浸完雞既湯,加入兩匙雞粉,加幾滴魚露,然後埋欠,淋上雞面..再燒熱約三湯匙酒,加入薑絲,爆香,油滾時即淋上雞面...完成

上枱時係完全唔見雞架...kaka...

寶物係裡面呢...滑到呢...........尼多碗飯唔該!!!

抺茶紅豆卷蛋 & 香蕉朱古力卷蛋

卷蛋,又叫瑞士卷,又有人叫蛋卷,但偏偏我愛叫佢做卷蛋,感覺依個名字好可愛..

紅豆餡放左係屋企個雪柜好耐...係時候要整..整一條,一家三口食唔晒,返尼公司又唔夠分..一於整夠兩條...整多啲香蕉朱古力..

之前已經有個好唔錯既卷蛋食譜

參考自 : http://hk.myblog.yahoo.com/diana-world/article?mid=5231

材料 :
蛋白 120g
蛋黃 80g
砂糖 60g(我減至50g都夠甜),
20g
菜油60g (我都減至50g,,怕肥)
牛奶 60g (因為菜油減左,怕唔夠水份,我加至67g)
低筋粉 80g
泡打粉
1/2茶匙
梳打粉 1/4茶匙
餡料可自行喜好

做法 :

1. 蛋白打至起泡,分2-3次加入50g砂糖,打至企身
2.
用另一個碗,蛋黃打散,加入20g砂糖,打至淡黃色
3. 分次加入菜油及牛奶,打勻
4. 分次加入已過師低筋粉,泡打粉及梳打粉,打勻
5.
取出三分一蛋白,加入蛋黃糊內,拌勻,再倒入餘下蛋白內,拌勻
6. 放入已預熱焗爐,180度焗15分鐘
7.
出爐馬上倒轉在另一張牛油紙上,撕走底紙,再返反轉,咁就唔會痴住張紙架喇
8.
搽上餡料,卷實,用保鮮紙包好,放入雪柜雪一小時定型,切件完成

只要將麵粉分量減少10g,改為可可粉或者綠茶粉就得..依個食譜做出尼既卷蛋,雪左一晚都仲好軟綿,好好味架..

打起一盤淡忌廉,一半加入紅豆餡...完成..

你中意邊一種口味 ??