2013中秋節

話咁快又一年中秋節了

今年都係天台BBQ

公司少有地收4點,往年多數4點半架

收工衝返去接悠悠放學

學校個姐姐都話,今日好多平時唔會尼揍放學

 

既家長都出現咗...哈哈

跟住帶住悠悠,衝上百佳掃貨,

百佳好多人都係買BBQ既野呢,

買完野,全家人都到齊,齊齊拎野出發去我家

set好個場,掛上燈籠,睇住個圓圓大大月亮BBQ...

幸福快樂既一晚

祝大家中秋節快樂~~

我的豪華生日會

9月17日係我生日,我係同蔡少芬同一日生日既,

記得N年前,佢岩岩出道時,

開左個豪華生日會,引尼唔少話題,

今日,我都有個豪華生日會,人地豪華百萬,

我就由老公豪花千元..哈哈

有幾豪?我真係未試過,食刺身食到飽架..

好,唔講咁多,去相,你地睇下豪唔豪啦..

三文魚一磅,仲有我至愛--赤貝

甜蝦, 巴馬火朖配超甜蜜瓜

超大大大隻帆立貝呀...

仲有好淋既牛扒,媽咪既拿手滷水,

仲有我指明一定要有既蔬菜啦

仲有好貴又好靚,又食得既花籃....應該係果籃先岩..kaka

最後出場,大愛..Tony Wong又一名作....

好開心,好滿足既一日呢 ^_^..

 

脆皮奶皇月餅

不經不覺,仲有幾日就到中秋節喇,order月餅鳳梨酥做左好多,

 

但仲未為自己做幾個過節添

 

老公又order話要整幾盒送比親友喎

 

咁襯今日有啲時間,開工啦

 

上網見到一個食譜既奶皇係用煮,炒,再搓既方式,唔洗蒸喎

 

唔洗蒸,就必定唔會有蒸過老既問題啦

 

咁就試吓啦,而且個餅皮唔洗開機打

 

話咁快就做好26個,老公悠悠即食一個..

 

喂,留返幾個用尼過節架...

累了

又再完成一個訂單

有十六個鳳梨酥

八個紫薯紅豆月餅

八個椰汁香芋月餅

仲有八個奶皇月餅

 

不幸地,又生病了

又要帶病做餅

可能真係太攰喇

尼緊仲有一轉

做埋就收爐

下年中秋再努力喇~~

 

復活節朱古力

明天悠悠學校開復活節Party,悠悠話要做復活蛋,咁我就去買左一個朱古力模返尼,入面有蛋,有兔仔,有雞仔...

朱古力真係唔係我杯茶,所以一向好少做,都無去鑽研..買左一盒現成既紅桑子餡,諗住放入蛋入面..要先掃一層朱古力,乾左再一層,再乾再一層,之後唧上餡再合併..

一個模得六隻半邊既蛋...即係一次只做到三隻...悠悠又要爭住整,咁仔細既野,佢仲未應付到..

終於,唔掂..放棄加餡,因為要整大約50粒,一次三粒實在唔係辦法..加上悠又攪唔掂..

所以..改為就咁溶左啲朱古力,放入唧袋,比悠悠唧入模算了...

而朱古力蛋為左好睇少少,係模到先放一啲彩針,再唧入朱古力..攪掂...再係面掃小小閃粉,等佢靚啲啦..

一共50幾粒...兩粒一袋隻..岩岩夠比悠悠個班分咋...隔離班都唔夠了...

為左今次個朱古力,上網睇左啲資料..令我開始有小小興趣..不過都只限用唔洗調溫既朱古力,加下餡呀,貼下轉印紙,掃下閃粉好了..要調溫就真係唔好攪我喇...我對朱古力實在興趣不大..

好..返埋聽日工就放假喇,我已經請埋2-3/4, 連放7日..yeah~~~

祝各位復活節快樂呀!!!!

茱莉花湯丸

今日少有係屋企寫BLOG,因為岩岩做好個湯丸,好好味,想襯今日元宵就同大家分享..

其實一直以尼,我都比較中意食無餡湯丸既..今日同悠悠一齊搓成熊貓型,好得意呀..

小朋友怕飲薑湯,我改用茱莉花,湯底好香好清新,湯丸本身無味,所以湯底要做甜小小,

祝各位元宵節快樂呀 ^_^

 

情人之夜 @ 德國咸豬手 + 黑加倫子白朱古力芝士蛋糕

今日係19/2,
終於有時間寫返之前既blog,成個新年,真係無望個部電腦,無拎起過隻老鼠...尋日第一日開工,全公司人返晒尼,啲大粒係到,又唔放便寫blog..今日終於寫得啦...由於今年新年公公既離開,我地唔派得利是,唔去得人地屋企,唔返得媽咪到拜年..所以成個新年係無乜新年氣氛既...初一只係屋企附近飲茶行下,初二就一家人去左愉景灣逛逛,夜晚就一齊食飯同家姐慶祝生日...所以無乜特別要寫...咁就尼寫情人節啦...

今年情人節係初四,係紅日,好開心,可以係屋企慢慢整整整...情人節我多數中意自己係屋企整,因為真係接受唔到出面座地起價,仲要同人迫囉...

今日既主菜係豬手,老公一早想食,今次做法係開一煲水,加入黑椒,八里香,鹽,放入豬手,滾起後慢火炆煮兩個鐘,抺乾,再放入220度既焗爐入面,豬手面每5分鐘掃一次啤酒,直至金黃色..

不過今次炆得太耐,啲肉過淋咗啲,下次改炆一個鐘,然後浸住佢好了...

係焗豬手時,個焗爐突然卟一聲,然後個發燒線熄左...唔通燒左???豬手未焗好..唯有改為煎..又OK喎..個面好脆口呀...

以為要換新焗爐添..點知第二日開返又無事喎??奇怪..點都好..慳返..kaka

情人節,唔少得甜品,今次做左個黑加倫子白朱古力芝士蛋糕,好中意個浪漫既紫色..只係睇都覺得淘醉呢...不過整左先知原來黑加倫子係咁酸既,仲以為係甜既添..我中意酸呀,但我老公中意甜呢...咁岩啦..佢食朱古力個層,我食黑加倫子個層..kaka..

再見2012 @ 帝苑Buffet

2012年最後一天,公司兩點收工,係要大家食埋個Lunch先放人...仲要無人通知,無通告..幸好偷聽到,唔係都唔知閃得....唉...

返到屋企hea呀,今日真係好鬼凍,一家三口係被窩到,唔想郁..兩父囡瞓覺,我拎住個電話煲台劇..

6點就出發去尖東帝苑食Buffet喇..公司年年都有既,但以往係平安夜食既,今年改左31號呢,

一去到,見到有Live
Band,氣氛幾好,成枱面都係party玩具,悠悠玩到唔願出去拎野食,我就第一時間去拎返碗湯暖下身先,今日真係好鬼凍呢..西湯得一款,好似係龍蝦魚翅湯,想話配個包,但全部凍冰冰,硬邦邦咁,睇見到唔想食..

暖左身就食刺身喇...啊..有好多款..仲要有我最愛既帶子,大大粒...好正呀..一人份量都好多,成晚我食左9粒帶子呢..真係好味到暈

見到有成隻Ham係到,有專人係到片出尼,再卷舊哈蜜瓜...唔掂,食到停唔到口...

仲有座龍蝦山..不過蝦蟹我要少吃,只係食左一隻,都好滿足了..

到食熱盤,竟然有做法覆雜既威靈頓牛柳..好少可呢...

仲有好淋入口即溶既和牛...

甜品有好好食既馬卡龍,唔太甜,好味,食左好多粒呢 ^^, 其他甜唔都好好食,款式唔多,但味道唔錯

食食下,Live
band轉尼一場勁歌熱舞,氣氛突然熱起尼..悠悠都企埋出去跳舞呢..跟住到一個小胖小出尼,扮近排超熱既江南style,炒起全晚最熱既氣氛,好多人走出去跳舞呀,拍片呀,勁開心呢...

食到咁上下,有人尼問我地餐飲,跟住先知道原來一座底時,有人拎住啲果汁尼問我地要唔要飲品個啲飲品,係唔算餐飲,要六十元杯..竟然啲人無出聲,太過份,我去問清楚個秘書,先知全場好多人中招,後來應該老細都有照找數啦...依樣野就真係太過分..明屈咩...

9點幾我地就走喇..返屋企睇住電話倒數...Happy New
Year~~~~

聖誕party at Home

今日係屋企開party,為咗依個Party,準備咗好耐好耐......

準備食物啦,佈置啦,遊戲咭等等等等...

前幾日,睇電視一個外國人教整咗一個甜品,幾特別,好有美國味道,做法又簡單,一於試下..

只係用一個半圓模,係底放一片片既Panettone,
然後搽一層果醬,再放一層雲尼拿雪糕,中間放乾果同果仁,再放雪糕,之後係底層再加乾果,然後再放幾片Panetton,跟住壓實佢,放返入冰格,
食之前拎出尼,係面淋朱古力,就完成架喇...佢個食譜係再有淋酒既,但因為要for小朋友,所以我無左依一part啦...一食到啲乾果同果仁,就好有聖誕感覺呢..

另外,前菜就準備咗三文魚雜果沙律,巴馬火腿配哈蜜瓜,芝士配牛角包

而主菜就有紅酒燴牛尾配法包,美式豬仔骨,迷迭香燒雞,拿破崙螺絲粉,香煎新薯,脆玉瓜配紅蘿白

甜品除左個聖誕雪糕蛋糕外,就係好有聖誕味道既麵包布甸配自家製雲尼拿醬..食譜跟上次大師比我既..今次試用牛角包,真係好好好得...好食過方包多多聲呢...

攪左兩日,終於完成個PARTY,真係好開心好開心呢...

聖誕樹玻璃曲奇

星期五,係悠悠學校聖誕party,老師出通告請我地帶12隻雞翼..另外再私底下同悠悠講,叫佢整聖誕樹曲奇餅返去..因為老師知我係亞茂呢...哈哈

星期四約左人出街食飯,唯有今晚要攪掂..點知今晚媽咪又話打邊爐..打邊爐食得耐啲嘛,返到屋企都成9:30,但都要開工啦...

一早買左聖誕樹模...Lunch時間再去百佳買左一大包果汁糖...開工..

聖誕樹玻璃曲奇(大大小小加埋約60塊)~~

材料 :
牛油 200g
幼砂糖 130g (已經係小甜,唔好再減喇..)
雞蛋
80g
底筋粉 370g
綠茶粉 30g
泡打粉 2g
鹽 小許
果汁糖 約30-40粒
(因為我有一半係無落果汁糖,如果全部都係落既,就預一塊餅一粒啦)

做法 :
1. 牛油室溫放軟,加幼砂糖打至鬆發
2.
分2-3次加入雞蛋及鹽,打勻
3. 全部粉類拌勻過篩,分3-4次加入牛油雞蛋糊中,拌勻
4.
放入雪櫃約一小時至硬,(天氣凍都可以唔雪既)
5. 果汁糖分開各種顏色,搥打至碎
6.
放入已預熱175度焗約8分鐘,取出,放上碎果汁糖,再焗約5分鐘
7.
如果汁糖唔夠填滿個空位,再加入碎糖,完成後取出,放涼至糖變硬身便成

p.s.

1.要留意唔好放太多糖,會滿瀉出尼,太少填唔滿可再加,太厚既糖都會無咁好食架..
2.
我中意果汁糖部份有出現水泡泡,如果你唔想要水泡,可以再遲少少放糖,佢唔滾起就唔會起泡泡,如果餅已經金黃,但糖仲未溶晒,可以取出,放係焗爐既頂部,用個到既熱力令糖溶,咁又唔會滾起有泡泡架喇...
3.
印模時,先印左大個part,放係焗盤再印走中間細果個,如果係枱面印,個大模得返個框,就比較難拎去焗盤上架喇..
4.
如果啲果汁糖一邊厚一邊簿,可以襯熱時輕輕放斜佢,等佢流返去簿個邊,但要留意睇住全部餅餅,唔係倒左出尼呀 ^^

仲買咗啲靚靚包裝袋...小朋友見到實好開心呢

一邊焗曲奇,仲一邊整埋個可樂雞翼....攪完成12點..好眼瞓喇...

聖誕樹Capcake

又就尼到最開心既聖誕節..聖誕節好有氣氛,又有連續兩日假期,真係好好好開心..而家有小朋友,就更加覺得開心..

睇左好多聖誕食譜,有好多野想整,上年整過樹頭蛋糕,今年應該唔整啦...

見到一個朱古力香蕉小蛋糕,好唔錯咁..不過整緊時先發現我無晒可可粉..爭左樣野,真係有啲可惜...

不過都完成左啦...蛋糕係香蕉提子小蛋糕,面係抺茶芝士牛油,加啲雪花糖粒上去..好有聖誕味道呢
^^....

Halloween 南瓜曲奇

26-10-2012 星期五..悠悠學校十月份生日會加Halloween
party..

我地兩個都好期待依日,幫悠悠扮小惡魔,做啲小曲奇比佢帶返學,諗起都開心...

悠悠日日都問住幾時開party...今日..終於等到喇....

睇下個豬仔幾可愛...可愛既小惡魔..

再整個可怕既小惡魔樣.......其實都係好可愛呢..kaka

睇下個Halloween曲奇先...有兩款..點解會整兩款咁多呢...係咁既...

話說早兩日我已經焗好個餅,唧好左橙色底既糖霜,到左第二朝..個面變鞋左既???仲要唔乾????唔通係糖霜開得太稀?????

大鑊....今日收工即返屋企,整過叻一個款式先..依個款式真係有加入南瓜茸加..面仲有粒南瓜籽..咁先係真正既南瓜曲奇呢..

返到屋企,發現個糖霜曲奇乾左喎...雖然個面唔平,又唔令身...但...都OK啦....一於用埋佢啦..

溶啲朱古力漿...劃埋對眼同個咀...攪掂...兩款南瓜曲奇出世喇...

你又中意邊款呢 ??