6週年-結婚紀念日

每年7月1日,大家都走去遊行時,我同老公就慶祝結婚紀念日..

今日原先老公要開工既,但佢偷懶,十點就返尼同我地去食早餐,之後就一家三口去泳池游水..

今朝打緊一號風球,都有啲擔心會落雨...但睇見出面陽光普照,唔理啦,去左先算..

去到11:40,
點知泳池原來12:00-1:00休館既...噢..個邊有無野好行..唯有去圖書館,同悠悠睇下書啦...

跟住一點正入場,換衫,落水...正呀..最中意中午又曬又熱既時候落水...

今年悠悠第一次下水,佢好開心,好勇敢添喎..自己走尼走去,成個頭落水都唔驚...好叻囡呢..

游完水,食個下午茶就返屋企啦..今日紀念日,點都要整個cake既,雖然好攰...

睇下雪柜有乜野物資...就整鮮忌廉藍莓蛋糕啦..夠快整好呀..

晚餐就由老公整啦,我真係好攰喇..今日晚餐主要係清雪柜,再另加一件牛扒...咁就攪掂...

不經不覺就六週年了....出年唔知會唔會真係七年之癢呢....老公..你癢我幫你抓下...哈哈

好友聚會 High tea

星期日啦...九點幾起身,梳洗,食個包,開工!!!!!

上廚房整整整....好彩尋日預先做定好多野,食朝叫做輕鬆好多,係出左少少意外..

諗住整木糠布甸,個淡忌廉打極都打唔起,座埋冰都唔得..可能係我落練奶落得太急太快....唯有即刻去浸片啲魚膠片,再入去凝固到就算..點知又出奇到成功,仲幾好味喎..

到左12點幾,朋友仔出發過尼,佢話勁熱呀....咁我地原先諗住飲茶既..但咁熱,點飲熱茶啦...

我再走上廚房,用左5-6個茶包,煲左一煲苿莉綠茶,再加啲冰,再蜂蜜,放入冰格,等佢地一尼到就凍野飲先...

個Tea兩點就開始喇..睇下有乜野食 ...

有牛油果三文魚牛角包..

乳酪雜果沙律

香茅雞肉串燒

肉醬薯蓉批

自家制玉桂甜甜圈

仲有甜品,木糠布甸..

餐後,朋友仔教我用部相機,我依隻笨喵,至多吸收到1/10...哈哈..好笨...之後老公返尼,又要人地再教一次...真係辛苦晒...

今次都係朋友仔提供既相,佢真係影得好靚呢...我要努力學下野,第日將我煮既成品,唔好食都要影到睇落好好食先得...kakaka

雞絲芝麻醬冷麵

天氣勁曬勁熱..有個風打緊尼..熱到爆,原先想去游水,但老公又病喎..咁唯有放工返屋企啦..

不過唔好游水都好既,因為明天有朋友探訪,我要預備high tea,如果游完水返尼,實攰死,唔想郁啦..

於是我返到屋企就走上廚房,整整整,洗洗洗,切切切....熱熱熱...係到同大家講下,我屋企係村屋, 我地住三樓連天台,而廚房係係天台既,所以..無冷氣...如果開埋焗爐,真係溶得架..

預備完明天下午茶既野,就要做晚飯,熱成咁,真係唔想食,所以最好整冷麵,整好放落雪櫃, 到晚餐時間先拎出尼,咁就食得落啦...

迷你小椰撻

今朝好好太陽,一放同悠悠去踩下單車,嘆個早餐,同隻豬仔撐下枱腳先 ^^

跟住返到屋企又開始就上廚房..其實真係有啲內疚..我一放假就埋頭係廚房入面,都無點陪悠悠玩添...悠悠,媽咪下星期陪你玩吓...乖...kaka..

今日想整迷你小椰撻,想整好耐架喇,椰蓉都買左返尼,等左我好耐..今日終於動手..

搓好個撻皮,煮好個椰蓉,放晒入雪櫃,就同悠悠出去食午餐啦..

返到屋企,悠悠去瞓午覺,我就慢慢入模,啲椰撻係迷你版,所以可以整好多個,但撻模有限,要焗完一批再整第二批,第一批焗左17-18個左右,入爐時我又準備煮飯啦..

今日整味噌豬扒,好seafood咁整左個便當,不過材料有限,都係求求其其咁..

飯後再尼第二批椰撻,今次同悠悠一齊玩,佢整得好開心,出爐仲好中意食添喎,好滿足呢
^^

食飽飽,一家三口座係到睇電視,兩父囡都好中意盤座係地下,好得意呢...

芝士草莓藍莓批 & 啤酒燉牛肋條

又一個落雨天既星期六,收工買啲餸就返屋企啦...又無街去..

尋日有個朋友去街時,見到有間CAFE係到整梗蛋糕,佢就影咗啲相比我睇下..見到我又好想試下整添..

佢影個張相,個批應該係檸檬批底,面再加藍莓咁既...但因為我老公對酸味既野都唔太大興趣,所以我就改為芝士餅底,用美式芝士餅既做法尼做個底,跟住再係面上放水果..

今次個批皮幾唔錯,鬆脆唔硬,又唔會太濕軟,好容易壓入模內..

今日另外整左個黑啤燉牛肋條,係廚房一邊燉緊牛肋條,一邊預熱緊焗爐..熱到差啲連我都煮熟...

個牛肋條煮左差唔多三個鐘,好淋好味,原先睇個食譜係落黑啤,蕃茄去燉,調味就得鹽同黑椒..好似怪怪地..咁未好啖囉?於是我加啲雞湯去燉,出尼都唔係好濃味,都算清淡..唔知用原食譜出尼會點呢
>_<

另外仲好簡單咁整個香草焗雜草,加入左南瓜,好清甜,小小香草,鹽同橄欖油,就焗出好好味既雜菜^^

堂島卷

頂頂大名既堂島卷,一直好想試下,但因為見150元一個卷蛋,實在又買唔落手...

前兩日分別係唔同既Blog到,都見到有Blogger試過,終於都忍唔住佢既魔力..加上細妹去完歐洲三星期,岩岩今日返,就買個返去一齊試下啦..

上網講到個堂島卷好搶手咁,又話排晒隊,我一收工即衝去買啦..點知大把..仲唔洗排添...

食完飯就即刻拎出尼試...蛋糕幾軟熟,忌廉好軟滑,幾香奶味,唔錯..係就係幾好食..但150元,我唔會再買囉...KAKA...試一次都值既...

藍莓牛油小蛋糕

上網見到小小米桶整咗好靚既藍莓牛油小蛋糕,又幾岩悠悠朝早食喎,最近藍莓又平返,放工就走去買返盒藍莓先...

佢個食譜原先仲有燕麥糠既,但我買唔到,改用埋底筋麵粉好了..

新鮮出爐香噴噴...軟綿綿,好濕潤呢...

食譜參考自 : 小小米桶

父親節大餐

一早忙完個蛋糕order,下午出去食完午飯,就趕返屋企準備父親節晚餐,同老公慶祝啦..

今日菜單有尋日食淨既芝士洋蔥煙肉包,切片焗成多士,香口好味..

主菜就有跟阿V食譜整既黑椒炆德國豬手,好好食,大家可以去參考下 : http://blog.yahoo.com/happy_Mrs.T/articles/1218498/index

香煎德國香腸配BBQ汁

蔬菜就有芝士溫泉蛋焗菠菜, 香草煎新薯..

甜品就係跟悠悠既偶像Jamie
Oilver整既香蕉Baileys麵包布甸,佢既食譜真係唔錯架,大家可以去參考下 : http://www.jamieoliver.com/recipes/bread-recipes/banana-baileys-bread-butter-pud

伴埋雪糕食,真係好好味呢...不過大家記得減糖呀,外國人真係食得好甜既...我減左10g都仲係覺得甜,下次再減多啲先得...

 

鮮忌廉雜果父親節蛋糕

星期日,少有九點幾就起身,因為今日接左第二個蛋糕Order..

訂蛋糕既,係悠悠同學仔,小雅既媽媽..

佢地訂左個父親節蛋糕,比左張圖我,係一個爸爸樣子既蛋糕,入面就要求海綿忌廉水果..

尋日去買左奇異果同蜜桃,今朝整蛋糕時,諗起我仲有脆脆,一於整個脆脆底,比啲驚喜佢地..

整到差唔多12點先攪掂,第一次咁樣整,真係有啲考到我..面用忌廉炆平,因為兩邊有耳仔,好似炆極都唔係咁平咁...頭髮又唔知點樣唧好...

最後攪完先發現...漏左條眉...哈哈哈...算啦..都唔係好覺啫..係少左份英氣...kakaka

芝士洋蔥煙肉包 &amp; 西班牙炒飯

今日全日都係咁落雨,放工即刻返去,買埋餸同午餐就返屋企..

食完午餐,就上廚房搓包,同準備晚餐

今日搓個咸包..邊搓邊諗..搓搓下先諗起可以用洋蔥煙肉..即刻切碎,炒香,放埋入麵團,再搓到薄膜,發酵時就準備晚餐既沙律...

今次個沙律用青瓜,蕃茄仔同紅蘿白,第一次試用紅酒醋,加小小豉酒,檸檬汁,碎洋蔥,蜜糖,又幾好味幾清新喎..

跟住再整埋個包,發酵第一次後,分割三分滾圓,靜置十分鐘,排氣,再滾圓,入模,發酵至兩倍大,面放己炒香洋蔥煙肉碎,再磨上芝士碎,180度焗大約15分鐘至金黃色,完成..

而今次主菜係西班牙炒飯,我平平地用壽司米做,先炒香煙肉碎,洋蔥,蒜頭,跟住落米,加少少白酒炒,乾少後再加再炒,之後就加雞湯,蓋過米就夠,跟住蓋好,中慢火煮,煮到仲有小小水時,加入茄汁(正常無既,但我中意有蕃茄味..同埋我無加好貴既蕃紅花,所以補啲色水),再加入已汆過既海鮮,放面,再蓋住煮至收水乾身..咁就完成啦..

依個飯我最中意係原鍋上枱..碟都洗少隻..哈哈哈

香煎魚柳配南瓜汁長通粉

尋日係超市見到迷你南瓜仔,諗起有間食意大利粉既舖頭,上碟時有原隻迷你南瓜仔既,隻南瓜仔好甜好好食既,一於抄考下佢先...另外買左一包魚柳,十幾蚊有兩件..抵食..

今日中午預先蒸熟隻大南瓜先,跟住再蒸埋兩隻細既...

然後大個隻就加啲奶,打成蓉,再過篩...過程真係好煩..過篩壓左好耐..好攰呀...

夜晚煎魚柳,用下好朋友係沖繩帶返尼既胡椒鹽先...好似特別香咁...哈哈哈

跟住煮埋個南瓜汁..攪掂...開飯!!

酥皮牛角包

今日係端午節假期,出面一陣係到落雨,尋日已經買好晒餸,今日全日係屋企閉關..

朝早食完早餐,同悠悠一齊睇碟,睇龍貓..真係估唔到..龍貓,悠悠都可以睇到喊到豬頭咁...洗唔洗咁感性呀..

下午無無聊聊,見今日天氣又涼涼地..好..玩下酥皮先...

首先,120g高粉,加30g底粉,再加30g糖,1g鹽,10g奶粉,4g酵母,同埋10g牛油...搓到光滑..

然後發酵20分鐘,再放入雪櫃雪凍..

另外70g牛油,碌扁成長方型..雪硬..

跟住就要開行冷氣,將雪凍既麵團拎出尼,碌平,放入牛油,摺三摺,再碌,再摺三摺,再碌,再摺,再碌,今次摺四次,跟住碌平,切成三角型,卷起成牛角型..

室溫發酵至兩倍大,面搽蛋液,190度焗13-15分鐘..

一出爐...老公一口氣食左三個....我..真係而家先知..原來佢好中意食酥皮既....

雖然煩..但見佢咁中意食,真係好開心好滿足呢...

大蝦喇沙米線

之前係FB見有人推介,話百勝廚既咖喱即食麵好食喎..再睇睇下,原來佢有我至愛既喇沙,仲係全球即食麵No.1喎...咁梗係要試下啦..

知道係一田有得賣,打去叫家姐買,佢公司附近就有間一田..比埋相佢..條友竟然買左..

喇沙湯料...得湯料咋...無麵架.....

咁唔買都買左..佢都係百勝廚既,唔緊要啦..試下啦..

買幾包米線,加啲豆卜,芽菜,仲有煎幾隻大蝦,咁就攪掂..

佢確實係幾香濃好味喎...可能我開太多水,唔夠咸味..但香味好足..我愛呀..下次一定要買返即食麵個隻試下先..

冬甩麵包

尋日一家三口去左赤柱玩,今朝成個人散到不行...手腳酸軟到震...

攰還攰,今日都有整包包..話說婆婆樓下商場開左間A1,悠悠同啲同學仔差唔多朝朝都去買個冬甩麵包,然後一人一半..見佢地咁中意食..我又心思思想整下..

於是食完個早餐就上廚房搓包..搓左幾分鐘,對手已經酸到爆...無力添...求其搓多一陣算啦..

發酵,做型,整比小朋友,整個迷你版,另外整四個大既..大人當然唔好食朱古力彩針啦,所以我係面灑啲玉桂粉同砂糖先焗

迷你版首先出爐,溶啲朱古力搽係面,再加朱古力彩針..攪掂..靚晒..

而玉桂味既都出爐喇...哇...香到..真係成條村都聞到呀...哈哈哈

今次手軟軟咁搓包..又估唔到幾得喎..個質感好好好好食呢...依個包..要encone!!

鮮忌廉芒果鬆馳熊蛋糕

今日病左,喉嚨勁痛,睇左醫生,開左八隻藥比我,仲要包括抗生素,食完藥個人散到爆..但散還散,今日有重要事要做..

就係我接左人生第一支蛋糕order..仲係一個各不相識既人..因為我有係FB幫襯佢買衫,佢就睇到我放上FB既蛋糕,就係咁..開始左我第一次收錢既蛋糕..

尋晚一早食完飯返屋企,先焗好三層海綿,因為個蛋糕有成三磅,我又無咁大既蛋糕模..唯有直接用焗盤焗,所以要分三次,但又怕第二第三次放太耐會消泡,就分開三次尼打蛋囉...

焗好三層海綿後,就cut個熊型出尼..跟住溶啲朱古力,整定眼同鼻..

到今日,病左,無返工,下午成個人散住咁打忌廉..唧花...雖然手震震,力度掌握得唔係好好,啲花又大又細,又唔係咁齊,但今次忌廉打得夠企,咁熱天都唔溶,出尼個樣都幾好呢...

最重要客人收左都好滿意...好順利咁完成左第一次既交易...希望慢慢會再進步多啲..加油!!