DIY曲奇套裝上架啦~~~

今日有事要請假

辦完事就出去紅磡廣場

去做乜?

因為有朋友仔係個度開左間格仔鋪

為咗支持吓朋友仔,我都租左一格尼玩吓

買乜野好...當然係我最拿手既野啦

原先想話賣曲奇餅既

但食物保存期真係有限,

咁一於整DIY自家制曲奇套裝啦

入面磅好晒材料,除左牛油同雞蛋外,

有齊晒各種粉類呀,糖,鹽,雲呢拿油同曲奇模等等

仲有埋食譜添架

咁樣,新手都可以輕鬆做到自家曲奇啦

又唔洗擔心買一大包麵粉,一大樽雲尼拿油..餘下個啲點算喎..

有興趣既朋友仔,快啲去紅磡廣場既The WoW Shop睇下啦...

順便去佢地Facebook專頁到比個讚啦 ^_^

https://www.facebook.com/WEOFFERWOWSHOP?directed_target_id=0

超勁台風??

中秋過後,玉兔就殺到,講到吹得好正,個風好勁..點點點咁...

老公都忙於收拾好天台,包好枱椅,做足準備

今日原先約左舅父一家食飯既

仲要係舅母既生日,我諗左一款蛋糕送比佢既

點知打風,飯食唔成,但我蛋糕照整..

整個細既,自家人吃啦..

無買定水果,唯有整綠茶海綿,配紅豆蓉餡,

而個裝飾就浪漫到暈..

係紫玫塊花籃,靚唔靚呢?

做完蛋糕,出面開始落晒大雨咁

成日同悠悠係屋企咁悶..

一於同佢整下曲奇餅啦

反正我都要整張曲奇相,

點解要曲奇相?..下回分解..keke

夜晚開始掛八號波

不過我地住村屋既,附近有座山靠吓

而且樓同樓痴得好近

所以,我一啲感覺都無...

不過上次個風有吹到天台啲野跌晒,又有吹爛野

但今次乜事都無?

個風真係好勁???

第一次開班

係一次真正開班收錢教人整餅..

但因為無地方,只可以係屋企個小小客廳,

自己屋企,當然只接受朋友啦,

自己唔算乜野大師傅,所以只係想開親子班,

唔係for大家學野,係for大人同小朋友開心吓,

不過整整吓,啲小朋友太攪攪震,最後叫左悠悠幫手,

帶晒佢地入房玩..哈哈..終於得返啲大人係到整..

睇下大家啲作品,都幾唔錯呀..

之後就入盒,包裝,仲比佢地自己揀貼紙,

烹飪班突然好似變咗美術班咁呀...

玩左三個鐘,大家都餓了吧...

我一大早焗左個玉桂香蕉蛋糕比大家做下午茶,

有得食又有得玩,希望大家對今次滿意啦..

第一次開班,工具同準備都好不足,希望大家體諒,

下次一定做得更好!!

80個酥酥order

又接左單大生意,客人訂40個鳳梨酥同40個紅豆酥,

 

岩岩又遇著有人訂左蛋糕,

 

所以做到無停手,好彩老公好幫手啫..

 

幫手磅材料,入埋包裝,同埋揍住悠悠..

 

好順利咁準時完成,出去尖沙咀交貨啦

 

希望客人收到滿意啦

天助我也之鳳梨酥加紅豆酥

接左好大單order...其實係公司同事,集體訂購鳳梨酥同紅豆酥...加埋要做136個...仲要今個星期內起貨....

尋晚放工時三號風球,風大雨大去入材料...仲要係同老公拍拖忌念日,一家三口出街食飯...

食完就返屋企,打好個餅皮先,第一次攪咁大單,要打成1kg牛油,要篩2kg麵粉...用晒全屋最大既盤呀,煲呀...

今朝早..八號風球...唔洗返工..yeah....個天都比日時間我..多謝晒..一於開工,攪點單大野啦....

全家人出動幫手..老公幫手磅麵團同餡,悠悠幫手搓圓..我就包好同印模..入焗爐...

由朝早十點幾..做做做...做到夜晚....你睇..叮噹尼喇....哈哈哈...

包裝好埋,入好盒..完成喇...明天順利抬返公司...真係要抬先得呀..好重呀
>_<

鮑魚撻

今日去街市買左15隻鮮鮑魚,諗住整返個雞肉鮑魚撻返公司...點知..意外又發生....

買左鮑魚,雞肉,返媽咪到食飯...飯後只顧帶走鮑魚..忘記了雞肉....

返到屋企先發現...唯有..照整先啦..雞肉第二朝早啲打的送悠返學後,上媽咪到整埋佢...

咁先做好個撻皮...煮埋個鮑魚..就去瞓覺了..

第二朝,悠悠好扭計...遲左少少出門...

出左門...諗起身上無晒錢...搭唔到的士....

即刻衝去巴士站..平時差唔多時間有架巴士去悠悠學校個邊...

點知..送車尾....

唯有上另一架巴士..去到地鐵站,提款..再去搭的士..

的士站大排長龍...仲好耐先有一架車尼....等車等左半個鐘...連悠悠返學都遲到埋..

放底佢我要即走..趕去返工.....

雞肉...你留係媽咪到..今晚做餸啦.....

所以...雞肉鮑魚撻...變左....走雞肉...

個撻底好好食...鮑魚無乜鮑魚味...果然..中菜式唔係我個主菜...都係做返阿茂好了...

咸香芝士酥餅

前兩日整左三盤馬卡龍,都係失敗...完全唔知點解..點解點解...之前出去學過一次,都係失敗,吹唔乾既....之後再整過一次,都係失敗...前兩日再尼三次...依然係失敗..想點...想點...

淨左三隻蛋黃,今日要解決埋佢..唔想整布丁,因為肥..因為只可以放係屋企食...

所以整餅餅,可以派街坊...哈哈...

依個餅又方面,唔洗開機打,一個大碗攪掂..

材料 :

低筋麵粉 240g
粟粉 60g
蛋黃 3個
鹽
適量
Rosemary 適量
水 4-6湯匙
片裝芝士 5-6片 (切絲, 或可用芝士碎)
牛油 180g
(不要放軟)

做法 :
1. 底筋粉加粟粉過篩
2.
牛油由雪櫃取出,切細粒,加入面粉內,用手指按壓拌勻成沙
3. 加入水, 鹽及Rosemary搓成團
4. 輕手加入芝士拌勻
5.
碌平,印模,面塗上少許蛋液,灑上芝麻
6. 180度,焗約20分鐘至金黃色

 

迷你小椰撻

今朝好好太陽,一放同悠悠去踩下單車,嘆個早餐,同隻豬仔撐下枱腳先 ^^

跟住返到屋企又開始就上廚房..其實真係有啲內疚..我一放假就埋頭係廚房入面,都無點陪悠悠玩添...悠悠,媽咪下星期陪你玩吓...乖...kaka..

今日想整迷你小椰撻,想整好耐架喇,椰蓉都買左返尼,等左我好耐..今日終於動手..

搓好個撻皮,煮好個椰蓉,放晒入雪櫃,就同悠悠出去食午餐啦..

返到屋企,悠悠去瞓午覺,我就慢慢入模,啲椰撻係迷你版,所以可以整好多個,但撻模有限,要焗完一批再整第二批,第一批焗左17-18個左右,入爐時我又準備煮飯啦..

今日整味噌豬扒,好seafood咁整左個便當,不過材料有限,都係求求其其咁..

飯後再尼第二批椰撻,今次同悠悠一齊玩,佢整得好開心,出爐仲好中意食添喎,好滿足呢
^^

食飽飽,一家三口座係到睇電視,兩父囡都好中意盤座係地下,好得意呢...

芝士草莓藍莓批 &amp; 啤酒燉牛肋條

又一個落雨天既星期六,收工買啲餸就返屋企啦...又無街去..

尋日有個朋友去街時,見到有間CAFE係到整梗蛋糕,佢就影咗啲相比我睇下..見到我又好想試下整添..

佢影個張相,個批應該係檸檬批底,面再加藍莓咁既...但因為我老公對酸味既野都唔太大興趣,所以我就改為芝士餅底,用美式芝士餅既做法尼做個底,跟住再係面上放水果..

今次個批皮幾唔錯,鬆脆唔硬,又唔會太濕軟,好容易壓入模內..

今日另外整左個黑啤燉牛肋條,係廚房一邊燉緊牛肋條,一邊預熱緊焗爐..熱到差啲連我都煮熟...

個牛肋條煮左差唔多三個鐘,好淋好味,原先睇個食譜係落黑啤,蕃茄去燉,調味就得鹽同黑椒..好似怪怪地..咁未好啖囉?於是我加啲雞湯去燉,出尼都唔係好濃味,都算清淡..唔知用原食譜出尼會點呢
>_<

另外仲好簡單咁整個香草焗雜草,加入左南瓜,好清甜,小小香草,鹽同橄欖油,就焗出好好味既雜菜^^

檸檬芝士夾心曲奇

今個星期真係好勤力,幾乎日日都野出爐...

尋日個包包唔太成功...成個人灰心晒...今日整返個曲奇餅,簡單啲,搵返啲滿足感先..

其實係尋日焗包包既時候,就搓好依個曲奇餅,碌平左佢放入雪柜,

再整等個檸檬芝士夾心,咁今日返尼只要印模,焗就得...

但真係世事無咁順利...個餅好淋好淋,雪硬左出尼,印左幾個就淋晒..又要走去放入雪柜,

雪一陣又再印...至慘雪柜係樓下,廚房係樓上...就係咁..跑上跑落..夠晒運動量..

雪左四次..焗左四批...終於焗好晒...唧埋個夾心,攪掂...靚晒 ^^

依個夾心好好味,好香好清新...我愛!!

食譜參考自 : http://blog.yahoo.com/KellyandRuby-mami/articles/675935/category/%E8%9B%8B%E7%B3%95%E7%AF%87.%E6%9B%B2%E5%A5%87%E9%A4%85

杏仁提子曲奇 + 印模藍罐曲奇 + 煙三文魚卡邦尼長通粉

病....

星期日BBQ完,尋日喉龍超級痛,真係超級痛個隻,Lunch時間走去藥房買藥,佢比左盒中藥成份既消炎止痛藥我,食左三次一啲好轉都無..仲成59元得8粒...可惡...

今朝一早喉龍仲係好痛...仲成個人都好攰咁...算..請病假...好唔想郁..所以連悠都唔返學..我依個亞媽真係懶...

瞓到十點幾,悠悠起身有幾聲咳..唔係咁快傳染咋呀...唯有兩個齊齊睇醫生,睇完醫生去食個麵,食完麵餵左悠食藥先...跟住去超市買小小晚餐料..都未買完野,悠就係咁話好攰好眼瞓..睇尼佢啲藥好勁...睇見佢個可憐樣,真陰公

返到屋企,兩母囡大覺瞓...由兩點瞓到五點..跟住我就去煲個雪梨海底椰糖水,係係超市買既湯包,個湯包有海底椰,有三條紅蘿白,一條粟米同南北杏蜜棗
,我再買四個雪梨,加小小冰糖去煲,原先想加糖冬瓜..但成17元一包仔,洗唔洗咁貴呀...所以都係加冰糖算了..

煲落糖水,悠悠話好悶..諗起星期日整完媽咪個生日蛋糕,有四個蛋黃淨左,唔放得好耐..於是同悠悠一齊整下曲奇啦..記得網上流傳一個藍罐曲奇既食譜,係用四個蛋黃既...份量岩岩好..就整佢啦..做好麵團後,將佢份一半,一半加入杏仁碎同提子乾,卷成條狀雪硬切片焗,
一半就壓平,雪硬,同悠悠一齊印下模,等佢開心吓...分量出尼好多,比悠悠帶返學校同小朋友一齊分享..

(依個食譜係網上好多人流傳,我都唔知係出自邊個發明者了,不過係到多謝佢既分享,個食譜真係好得!!)

材料 :

無鹽牛油 250g
糖粉 160g
蛋黃 1隻
熟蛋黃 3隻
低筋麵粉
350g
雲呢拿油 1g
鹽 小許

做法 :

1. 熟蛋黃切碎,低筋麵粉過篩,焗爐預熱180度,10分鐘
2.
牛油切粒室溫放軟,加入糖粉及鹽打至鬆發
3. 慢慢加入生蛋黃,拌勻,再加入雲呢拿油,熟蛋黃拌勻
4. 分次慢慢加入麵粉,搓成團
5. 雪硬,
切片或者印模, 放入焗爐焗10-15分鐘至金黃色

p.s.
1.
如想加入杏仁及提子乾,可以係搓成麵團後再加入拌勻就可,可隨意加入唔同既乾果同果仁..
2.
如想印模,最好先碌平,放入雪柜雪硬,拎出尼即印模,咁就好易印,如果見個麵團軟化,就再碌平再雪硬再印啦..

整完曲奇,就煮我個簡單晚餐,煙三文魚卡邦尼長通粉,買左包鮮磨菇切片,長通粉我最中意係凍水入煲,一水滾就熄火,等佢自己焗淋,依個方法又可以煮得淋啲粉,又唔會過淋,岩岩好架,跟住開鑊下油炒磨菇,加入卡邦尼汁(之前係吉之島買落一包包既),再加入長通粉,煮至收汁,面放上煙三文魚,灑啲蕃茜...食得..成個過程都唔洗15分鐘....

今日老公要出街食飯,我要自己洗碗,好攰...一個病人,仲要揍住另一個病人,仲要煮飯焗餅洗碗..好攰..真係好攰...要去休息了...

杏仁小紅莓曲奇

心思思又想整野,但收左工,返媽咪到食埋飯再返屋企都成九點,時間有限既情況下,只可以做簡單既野,咁不如做曲奇啦,但如果做唧花同印模都比較花時間,諗落最好都係切開一塊塊既,快靚正呀..

之前整過好多曲奇都係比較鬆,入口融化個種,今次好想做一個鬆脆既,仲要係面加啲砂糖,咁悠悠一定好中意食呢,入面選擇咗小紅莓同杏仁粒,一出爐好香啊..即時忍唔住要食,真係好好食,悠悠都食左兩個,食個時仲係熱,所以好鬆化,我諗凍左會脆口啲...

材料 :

無鹽牛油
100g
低筋麵粉
140g
粟粉 10g
糖粉
75g
蛋
半隻
小紅莓及杏仁 約50g
(可除意)

做法 :
1.
牛油室溫放軟後打軟,加糖粉打至發白
2. 加入蛋液打勻至鬆發
3. 伴入小紅莓及杏仁拌勻
4. 篩入底筋麵粉及粟粉拌勻
5.
用保鮮紙卷起,放入凍格雪半小時至硬
6. 切片,面灑砂糖,放入已預熱180度之焗爐內,焗約20分鐘至金黃色

聖誕前買左啲小袋仔,諗住聖誕整曲奇送禮既,最後曲奇無做到,袋仔都無用到...唯有快啲用埋佢啦..唔係要放到出年聖誕喇...啲袋仔好靚架..

聖誕樹玻璃曲奇

星期五,係悠悠學校聖誕party,老師出通告請我地帶12隻雞翼..另外再私底下同悠悠講,叫佢整聖誕樹曲奇餅返去..因為老師知我係亞茂呢...哈哈

星期四約左人出街食飯,唯有今晚要攪掂..點知今晚媽咪又話打邊爐..打邊爐食得耐啲嘛,返到屋企都成9:30,但都要開工啦...

一早買左聖誕樹模...Lunch時間再去百佳買左一大包果汁糖...開工..

聖誕樹玻璃曲奇(大大小小加埋約60塊)~~

材料 :
牛油 200g
幼砂糖 130g (已經係小甜,唔好再減喇..)
雞蛋
80g
底筋粉 370g
綠茶粉 30g
泡打粉 2g
鹽 小許
果汁糖 約30-40粒
(因為我有一半係無落果汁糖,如果全部都係落既,就預一塊餅一粒啦)

做法 :
1. 牛油室溫放軟,加幼砂糖打至鬆發
2.
分2-3次加入雞蛋及鹽,打勻
3. 全部粉類拌勻過篩,分3-4次加入牛油雞蛋糊中,拌勻
4.
放入雪櫃約一小時至硬,(天氣凍都可以唔雪既)
5. 果汁糖分開各種顏色,搥打至碎
6.
放入已預熱175度焗約8分鐘,取出,放上碎果汁糖,再焗約5分鐘
7.
如果汁糖唔夠填滿個空位,再加入碎糖,完成後取出,放涼至糖變硬身便成

p.s.

1.要留意唔好放太多糖,會滿瀉出尼,太少填唔滿可再加,太厚既糖都會無咁好食架..
2.
我中意果汁糖部份有出現水泡泡,如果你唔想要水泡,可以再遲少少放糖,佢唔滾起就唔會起泡泡,如果餅已經金黃,但糖仲未溶晒,可以取出,放係焗爐既頂部,用個到既熱力令糖溶,咁又唔會滾起有泡泡架喇...
3.
印模時,先印左大個part,放係焗盤再印走中間細果個,如果係枱面印,個大模得返個框,就比較難拎去焗盤上架喇..
4.
如果啲果汁糖一邊厚一邊簿,可以襯熱時輕輕放斜佢,等佢流返去簿個邊,但要留意睇住全部餅餅,唔係倒左出尼呀 ^^

仲買咗啲靚靚包裝袋...小朋友見到實好開心呢

一邊焗曲奇,仲一邊整埋個可樂雞翼....攪完成12點..好眼瞓喇...

柚子芝士焗餅 + 草莓馬卡龍

最近天氣又凍又熱,又乾又濕,都唔知想點,成個衣柜冬天衫同夏天衫放晒係到,前一日著住短袖,第二日可以要著褸既...前一日著涼鞋,第二日著boot...玩死,,,

今日又係落雨天,濕濕凍凍咁,唔想出街,想打邊爐..

放工返將軍澳食個午飯,買埋材料,就返屋企,今日懶,全部材料係惠康買,不過真係好唔掂..
佢新鮮切左條脆肉鯇,真係好新鮮喎..點知唔脆既,仲有啲粉粉地...=_=
炸魚皮,唔係脆,唔係淋..係韌既..象拔蚌,唔脆...蝦滑,又淋又腥又臭,掉左..唯一好食既係粟米...唉..

下午唔洗準備煮飯既野,得得閒閒就試做馬卡龍,不過真係唔岩時間,由4點幾整好,吹到9點都唔乾...算..超入爐..出尼好醜,又爆,又乾咁,仲要條裙仔超迷仔.....不過第一次做,有咁既效果都算啦..

尋日仲整左個柚子芝士焗餅,今日甩模後,搽啲果醬上去,食得,唔錯..不過都係..樣有啲衰..

都唔知點解,芝士焗餅係我人生第一個餅,但越做越差...

今日我整野時,悠悠好專心係到畫畫,座係梳化到畫畫下,仲要跪埋落地,但就唔肯去枱到畫,真係咁有藝術家脾氣??

Halloween 南瓜曲奇

26-10-2012 星期五..悠悠學校十月份生日會加Halloween
party..

我地兩個都好期待依日,幫悠悠扮小惡魔,做啲小曲奇比佢帶返學,諗起都開心...

悠悠日日都問住幾時開party...今日..終於等到喇....

睇下個豬仔幾可愛...可愛既小惡魔..

再整個可怕既小惡魔樣.......其實都係好可愛呢..kaka

睇下個Halloween曲奇先...有兩款..點解會整兩款咁多呢...係咁既...

話說早兩日我已經焗好個餅,唧好左橙色底既糖霜,到左第二朝..個面變鞋左既???仲要唔乾????唔通係糖霜開得太稀?????

大鑊....今日收工即返屋企,整過叻一個款式先..依個款式真係有加入南瓜茸加..面仲有粒南瓜籽..咁先係真正既南瓜曲奇呢..

返到屋企,發現個糖霜曲奇乾左喎...雖然個面唔平,又唔令身...但...都OK啦....一於用埋佢啦..

溶啲朱古力漿...劃埋對眼同個咀...攪掂...兩款南瓜曲奇出世喇...

你又中意邊款呢 ??

朱古力香蕉批

又到星期六,返半日,放工返入將軍澳同兩父囡食午餐,

見到餐廳到有個香蕉批,好吸引...但我無點到..因為我想自己整...嘿嘿..

食飽先去左坑口新開既體育館,入面有個兒童遊戲室,人好少,唔洗排隊,好新淨,但無乜野玩,係比小朋友入去跑跑跳跳既地方~~

之後去買梳蕉,買包淡忌廉...返屋企開工..

我又大頭蝦發作..將啲分量攪錯晒..攪到個皮好稀先發現..重新尼過..氣死..

焗好個皮..打埋個淡忌廉...淡忌廉打出尼真係稀身好多...

搵唔到個唧咀...就咁剪個窿都OK既...

原先想話溶朱古力漿唧落去...但見個淡忌廉應該頂唔到幾耐...

唯有灑啲可可粉算了..都OK啦...幾好味..

不過個批底mama地..下次唔會再用依個譜...

所以都唔公開了...