檸檬皇后小蛋糕

夜晚九點幾,先記得同左悠悠講今晚整蛋糕....話明天再整,悠又唔制..

好啦..搵個最簡單既小蛋糕做啦..一於做牛油蛋糕,唔洗分蛋法嘛..

屋企有檸檬,刨啲皮,唧埋啲汁落去先...再加悠悠最中意既提子乾...

唔洗半個鐘就攪掂...如果唔係同悠一齊整...依個蛋糕,15分鐘就入得爐架喇..

焗左大約20分鐘..叮...明天有早餐了...

瞓覺去....晚安...

材料 :

牛油 100g
糖 80g
自發粉 150g
雞蛋 2個
檸檬皮
一個
檸檬汁 半個
提子乾 適量

做法 :

1. 牛油室溫放軟, 加糖打至軟滑
2. 分2-3次加入雞蛋,打勻
3.
加入檸檬皮及汁拌勻
4. 加入已過篩自發粉及提子乾拌勻
5. 入杯仔,放入已預熱焗爐, 180度,約15-20分鐘,面金黃色即可

牛奶白吐司

好開心好開心好開心....

一直以尼,睇住何師奶既吐司...真係好好好吸引我...

但佢既食譜麵團係超濕,佢講明,新手勿試...

雖然我都搓左唔少包包出尼..但吐司..我真係無一次叫做好成功既...

今次瞻粗粗..試下...個麵團真係好濕好痴手...我用麵包切刀幫手摌起麵團,係咁撻撻撻..撻到手都軟...睇住超濕既一pet野..慢慢成為一舊麵團...個感覺真係好感動...

以下張相係何師奶既..想比大家睇下個麵團有幾濕..因為我搓個時,痴到成手都係..拎唔到電話影相呀....唯有借張相尼分享下..keke

搓完放入袋..室溫發酵15分鐘,就放入雪柜過一晚...大約過左20個鐘我先拎返佢出尼...再室溫放15分鐘...分割兩份,滾圓,靜置10分鐘,做型,入模..

放左入模後,我就開始煮飯,今日天氣唔算好熱,我將個麵團放近爐頭,等煮飯時既熱力幫佢發酵..

今日煎牛扒..加上又要清野...買左兩條青瓜,加埋啲蘋果同乳酪,就做左個沙律..

仲有兩條粟米,切件,用牛油煎焗..

跟住就有前幾日去學既法包,仲有半條,切片,焗脆,用牛奶同忌廉煮個忌廉磨菇湯..

再尼就用紅酒同唔知乜菇,煮個紅酒汁拌下牛扒同白飯...

攪掂...超豐富晚餐...好飽呀...

食飽飯後,睇返個吐司先...發到九成囉喎...入爐..180度..30分鐘..依個溫度同時間都真係岩岩好..之前個啲多數寫200-210度..次次都焗得唔多夠熟,但面又就燶..以後吐司我都知要點焗啦..

出爐喇..焗吐司每次都好緊張,因為佢係個模入面,又睇唔到焗成點,只係靠食譜既時間,真係好驚呢..一打開..哇..靚仔..倒出尼..哇..超靚仔...再尼放涼切開...哇哇哇...超軟綿..好難切呀...

好開心,真係好開心...成功挑戰到個超濕麵團喇...証明左..我唔係新手啦..kakakaka

法包&香草包 - 學習編

團購課程,經歷過一啲不知名既課程,學左一啲不知所謂既蛋糕班之後,有啲怕左團購,但知名既課程又唔同喎..今次見到I Love
Cake攪既法包班..仲要係灣仔,就係公司附近..一於gogogog..

課程一開始就係搓搓搓啦...跟住發酵啦..原來除左法包,仲有香草包,我都無留意到添..

我地搓既係香草包,而法包係一早已經用機打起左,放係雪柜發酵左八小時..拎出尼只要做型就得..跟住就入爐了..

香草包做完第一次發酵後,就滾圓,靜置5分鐘,再按扁放上加左油既長方型焗盤上,第二次發酵後就係面按啲手指洞,然後就可以入爐了..

跟住啲時間都係等等等等等....

由7點整到10點,完成...出爐好香好香...拎住袋包包搭車..成程車都聞到麵包香..

經過今次法包課程,我知道自己學包包叫做學晒喇..餘下就係自己練習練習再練習...我會努力比心機,做出一手好包包既..加油!!!!

各款腸仔包

今日中午同悠悠姨媽去左行姨媽傢俬,買左一套戶外枱椅,好期待送貨尼,要打理好個天台,招呼下人先得..keke...

返到屋企都成5點..同悠悠上廚房整包包先...

屋企有腸仔,有蟹柳,有菠蘿,全部都係淨餘物資....叫悠悠幫手切腸仔同蟹柳,我就搓包包..

整左三款包,全部有腸仔既...

有腸仔包,芝士沙律腸仔包,同埋有腸仔既Pizza包...好味道^^

三色腸拿破崙螺絲長通粉

星期六,唔知係唔係病仲未清,攰攰地咁,收工係屋企附近食午飯,行一陣就返屋企瞓晏覺..

今晚餐飯好簡單,只要買兩隻青椒..

因為今日要清理雪柜既餘下物資..

冰箱有兩款腸仔,一粗一幼..下格仲有德國腸片,同埋有一樽媽咪比我既意粉醬,再加埋兩包都食左一半既螺絲粉同長通粉,咁就做到一個三色腸拿破崙螺絲長通粉喇...

上次食個意粉醬,唔多好食,太重香草味,我自己平時好少買意粉醬,覺得係要自己煮既先好食,今次媽咪買多左,咁我唯有用埋佢啦,自己加啲茄汁同檸檬汁,出尼估唔到咁好味喎....

 

鮮忌廉草莓蛋糕

星期日,緊係心思思想攪啲野啦...不過由上次係廣州返尼後,一直係咁反反覆覆病唔好,今朝同悠出去踩單車食早餐,返到尼成個人散晒咁..本來唔想郁架喇..但悠悠係咁叫我整啦整啦...唔係佢想食喎,係佢想一齊整咋...佢都好中意煮野食呢..

好啦...見冰格放左啲甜忌廉,都要用埋佢啦...將佢放落下層,就去整個海綿蛋糕先..

整好海綿蛋糕,跟住執下屋,仲有洗返兩機衫,太耐無見太陽伯伯啦..難得見到佢..梗係要洗衫啦..

跟住同悠出去,同悠悠姨媽,同老公一齊食個午飯..買埋餸就返去..真係成個人都好攰咁..同悠悠去瞓個晏覺先...

瞓醒5點幾...打起個忌廉,炆埋個蛋糕先..一邊炆,悠悠一邊係咁食啲士多啤梨...哎呀..得返5粒做裝飾,比佢激死...唯有唧多啲忌廉啦..個樣好似單調得好緊要...咁..灑小小彩針囉...OK啦,自己食啫..

冧酒乾果合桃磅蛋糕

好勤力,好勤力,今日又開工...

好中意夜晚做好,第二朝有早餐,唔洗諗食乜野...

今日又係Carol既食譜,佢係雜果乾磅蛋糕,但因為悠仔唔中意食雜果乾入面既橙皮,所以我改用提子乾同紅莓乾...同埋Carol用白蘭地尼浸乾果幾日,我用冧酒浸十分鐘...

又係好快咁,15分鐘攪掂入爐...明天有早餐吃了...yeah~~

蜂蜜小蛋糕

終於搵返之前個個蘋果焗蛋糕既食譜喇..原來係Carol自在生活既食譜,之前無留意到添..

見上次個食譜出尼咁好食..一於再試下佢既其他食譜..

佢既食譜做法同其他人既有啲唔同架...好似上次個蘋果蛋糕咁..平時個啲都係打鬆牛油同糖後加蛋..但佢係打企晒啲蛋,再加入切粒既牛油..咁既做法真係未試過,但估唔到咁好食..

今次試佢既蜂蜜蛋糕,又係我好中意既全蛋法..因為唔想分兩次打呀..kaka..佢係加入溶牛油既,所以好放便,半個鐘頭左右就食得喇...

依個蛋糕食唔出蜂蜜未,可以我依隻蜜糖唔係咁香,但個蛋糕好軟綿綿,好好食,悠悠少有地一次食左兩個..仲話想食多個添呀..唔阻止佢,真係變肥妹仔呢...

試左Carol兩個食譜都咁掂...好...收工去書店搵下佢本書先....

材料 :

低筋麵粉 100g
泡打粉 1茶匙
雞蛋 3隻
細砂糖 60g
無鹽牛油
50g
雲尼拿油 1茶匙
蜂蜜 15g

做法 :

1. 雞蛋左熱水加糖打,約40度離熱水,打至企身
2.
分4-5次加入已過篩底筋粉及泡打粉,拌勻
3. 加入雲尼拿油,蜂蜜及己溶牛油拌勻
4. 入杯仔,170度,焗約20分鐘

以上食譜我係簡單化寫出尼..如果比較新手既,請去Carol個邊睇,佢有埋詳細做法架
:
http://tw.myblog.yahoo.com/carol-jay/article?mid=16159&prev=17127&next=15355&l=f&fid=39

抹茶紅豆鬆餅

今日原定一早起身去拜山,但由大陸返尼後,我地一家三口都病晒,睇左一次醫生都唔好,今朝悠悠眼睛既分泌勁多,痴實晒隻眼,唯有再去睇一次醫生~~

兩個一齊睇完醫生,就同家人出發去拜山,今日天氣陰陰涼涼,直頭有啲凍,所以行上山完全無問題..到兩點左右就落返山了..

跟住我地去左油塘既新商場"大本型"行街,尋日同媽咪悠悠尼行過一次,都幾好行,又多野睇,至少唔係全部連鎖店先..尋日行唔晒,今日再尼行過...

行到六點幾,買左啲壽司返屋企食,加埋拜山既燒肉雞,咁又一餐..

食飽飯..又手痕痕,心癢癢...開工...整左個抺茶紅豆鬆餅...個鬆餅口感好特別..粉粉地..老公話好似食紅豆糕咁....哈哈

日式菠蘿包 & 焦糖蘋果蛋糕

返左香港兩日,病足兩日..但都好乖,有煮飯...

今日精神好啲..要整下野啦..

尋晚已經搓定舊麵團,今早中午就有日式菠蘿包出爐,

因為悠悠爭住要搓,但舊面團都幾濕..我唯有搓好先比佢..可能係咁..有點搓過度..有小小煙煙韌韌咁...

整完包包,悠悠幫手洗碗..真係乖...可惜佢對洗潔精又係敏感....下次唔比佢洗了
>_<

中午就出去同屋企人飲茶,買埋餸返屋企,有時間..又整個蛋糕..睇左好耐..諗起買左一包好多個蘋果..就整蘋果蛋糕...

出爐時好香...個樣唔錯...

夜晚沖完涼...沖杯茉莉綠茶..嘆返件先...哇..又幾好食喎..食晒一件..仲想再食添...好味呀...

依個蛋糕食譜....我點都再搵唔返食譜主人...所以..唔寫出尼喇...想要再PM我啦...keke