豪門夜宴之火間土 + Haggen Dazs

今日約左兩個舊同事聚舊,約左去尖沙咀北間道一號既火間土食日本菜,好多人一聽到我話去火間土,都話,好貴個喎..係咩?咁就豪一次..尼個豪門夜宴啦...

北京道一號依幢大廈,因為向海,所以多數係高級餐廳..

我地去依間火間土,間有好多獨立房間,好岩一大班人,又或者二人談心..大房係他他咪..要除鞋..細房全部向海景,二人談心實好浪漫...不過我地三人行,又唔係談心,唔洗座房,因為座房有最底消費架...座大廳都有海景啦...

首先點左一枝梅酒..290元一支,720ml,夠晒我地三人飲...

跟住叫左啲魚生壽司都OK..但魚生我覺得少咗啲..好似290元左右,但加埋得四款,每款兩件..

沙律唔好食,有舊豆腐係底,但同啲西式沙律菜好唔夾...串燒仲差..燒到又乾又硬..no
good..

不過無影响我地聚舊心情啦...依餐每位要4XX..但我覺得和民仲好食過佢..無下次..

之後轉戰The one Haggen
Dazs,依間鋪好細,後幾張枱仔..幸好岩岩有人走..依間既食品唔同其他店既..佢得一啲外賣既款式..唔同平時有堂食既門市既...

依餐飯後甜品有人請客,多謝晒
^^..希望你快啲再升職,再可以請客啦...kaka

暢遊香港科技大學

約左悠悠姨媽,同朋友仔韋韋去科大行吓,影吓相咁..

約左一點係寶琳地鐵站集合,一齊搭巴士入去...巴士經過科大(南),我地都唔知,一心以為係經大門口,過左後,我發然唔對路..架巴士好似想出九龍囉喎...即上網睇睇..果然...即刻落車..去對面馬路搭返對頭車..去到科大正門..哈哈...好彩只係幾個站啫...

先尼梗係要同依個火把影張相啦..佢係科大既標誌呢...佢係一個鐘尼架...好似係用太陽尼睇時間既...不過我都唔係太了解係點啦..keke

之後先去食個下午茶..原先想去飲唐茶既..點知..佢話cut左order,無茶飲喇...噢...

諗住仲有另一間酒樓既,但又唔識路喎..走尼走去..係咁搭lift上上落落..最後都係去左一間飯堂到食下午茶..好似大家樂咁既..普普通通啦..

食飽飽就開始四圍行下影下相啦...

依到風景真係好靚..但源住海邊都有個高高既石級圍住,落唔到石灘既..真係好可惜呀..雖然有好多人都會爬出去釣魚..但我帶住個小朋友,太危險啦...

唯有舉高相機影下相啦...哈哈...依到真係好舒服..今日有太陽,但風好涼,好舒服..學生係到住真係一大享受呢...

我地行到5點左右,原先想話落西貢食海鮮既,但太攰了,都係返去將軍澳打個邊爐啦...仲係東港城見到佢呀..上次我整蛋糕既主角...

咁又過左一日假期啦...^^

親子馬灣團

一早約好朋友,同朋友既朋友,尼個親子遊,但因為天氣問題,一直都未講定地點...

今早突然決定馬灣..馬上起床..趕去搭船..

因為一個鐘先一班船,所以一趕唔到就要等一個鐘架喇...唯有一落地鐵就狂奔....

跑左15分鐘,順利上到11:30既船....好彩....好彩.....

上到船,點解無乜冷氣架...熱死我...連水都趕唔切買..架船仲要好拋..悠悠好快就唔掂,要嘔了..

好彩只係搭半個鐘..好快落船..空住肚子既我地即去買野食..

跟住同朋友既朋友會合埋,就係路邊既大樹下,兩張長椅邊,開始小朋友既活動..

悠悠好似餵馬騮咁....好好笑..又有啲不文...kaka

佢地有佢地玩,我地有我地食食食,天文台話陰天有驟雨...大大個太陽曬到燶呀,好彩有樹陰..

尋晚夜瞓加今朝狂奔..我已經無力氣玩,全程個Pet痴左係張凳到.....

睇住啲小朋友玩得幾開心,辛苦都值既...悠悠平時身邊無小朋友陪佢玩,難得今日有咁大班小朋友呢..

朗朗媽媽好勁...可以抱住個仔同佢地玩,仲同佢地跑..唔怪得生左兩個都可以咁瘦,我要學習下先得...

Baby太細..全程只可以座係BB車到....

小魚仔好食得...好愛吃蕉蕉..

小朋友狂跑,跑極都唔攰既...

玩到兩點幾,我地就去搭三點鐘既船...回程成個人散晒...

藝術文學士畢業展2013

我細妹終於畢業了...讀咗三年既藝術文學士...咁就二十萬....

不過佢似乎未夠...可能仲要再讀讀讀.....

今日去左佢既畢業展,雖然佢只有放一張畫...雖然我地全家都唔識欣賞...不過算啦..點都要去支持吓既...

書展 + 老公生日飯@Davinci Cook

7月19日,老公正日生日,當然留比我地一家三口啦...

今日請左假,去行書展..一早就出發去,由11點行到5點,真係攰到爆..

而家既書展,啲人其實都唔係真係睇書,雖然我都唔係..kaka..以前我去書展都會買小說,但自從有悠悠後,真係無時候靜靜地睇小說了...但而家去書展,見啲英文書呀,文章既書都好少人睇,最多人圍住既係食譜,寫真,雜誌,繪本同埋啲減肥健身個一類既書...不過我今次目標都係食譜同兒童書啦...哈哈..

行左成日,好彩都有唔少收鑊...其中我最中意係小王子媽媽既書...入面教左好多餅面裝飾,朱古力花,糖花既做法,係一本真係學到野既書呢...

到夜晚,就返到去將軍澳既坑口村既意大利餐廳 Davinci Cook
,同老公一家三口食生日飯

依到既食物唔可以講得上酒店級,但似依個價錢,我覺得可以接受,都算係有用心制作既食物呢..

食飽飯後,待應熄燈送上蛋糕,依個當然係我比老公既驚喜啦..全場得三枱人,但全部人齊齊唱生日歌,好開心,好好氣氛呢 ^^

依個心太軟好好食,好香濃朱古力味...好中意依間小店咁有人情味...(因為我問過另一間店,佢話無做依啲服務...)

其實我覺得啲小店,係可以靈活變通下,配合下客人需要啫...因為另一間店有幾款甜品蛋糕,都係有唧上朱古力漿既..咁唧做字樣都問題不大卦...只係你願唔願去做啫...

所以,我好中意依間店既安排..老公仲話比多啲Tips....好開心既一晚呢..

預祝老公生日飯 & 忌廉榴槤蛋糕

尼緊星期五係老公生日,今日屋企人話同佢食飯慶祝,正日就梗係留比我地自己一家三口啦..

今日去一間係將軍澳叫魚味既日本餐廳到食,細細間既餐廳仔,好彩又唔洗等好耐位..好快有位啦..

叫左好多野食,好開心..睇下有乜食..

依個芝麻八瓜魚其中一舊有問題,壞左腦..黑色既...同個待應講,佢只係收走左,無回應...=_=..唔好意思都無句呢...

算啦,唔好應該今日大家開心既心情...

食飽飯..返到屋企拎個我驚喜出尼...

榴槤忌廉蛋糕..老公好中意食榴槤...本來想拎埋去餐廳切,多啲人一齊食架..但陣味真係好勁..怕餐廳趕我地走呢..所以..都係返屋企三個人切啦..

依個蛋糕要做驚喜,真係好難呢..要打開雪柜都唔好比老公聞到陣味,連垃圾都要處理得好好先得,最難係..要悠悠守秘密,唔好爆比爸爸知呀...

幸好一切順利...yeah...祝老公生日快樂...

食譜如下 :

材料 : 雞蛋三隻,低筋麵粉60g,菜油25g,砂糖70g,甜忌廉 適量, 榴槤肉 適量

做法 :
1. 榴槤起肉去核,最好用比較熟,軟身既榴槤肉
2. 甜忌廉分兩份,一份直接打起,另一份加入綠色素打起
3. 雞蛋室溫放暖(或可用微暖水浸暖),加糖打起至杰身
4. 分三次加入低筋麵粉,切拌勻
5. 加入菜油,拌勻
6. 放入6吋圓模,180度,焗約30-35分鐘至熟
7. 蛋糕出爐係倒扣放涼,脫模切為三片
8. 分三層,每層中間唧入白色忌廉,加入槤榴肉(加多啲好味啲,但會好高身)
9. 放入榴槤肉後再加忌廉,放上蛋糕,再重覆8步驟
10. 蛋糕面唧上綠色忌廉,再加上玉桂枝做榴槤樣(用手指餅都可以架),完成!!