話咁快.中秋節加國慶假期到了...一連幾日假期,太開心啦..
尋日已經整好埋個冰皮月餅...係綠茶紅豆同朱古力味...味道都唔錯,但外表真係要再改善
>_<
今日下午同姨媽,婆婆出去食茶..再去買齊今晚BBQ既野...今日有12人BBQ,預早兩日前已經先買左部份野,但今日仍然係要拎到死死下...
返到屋企,即刻開始整野,BBQ晚會開始...
三個月前我浸既荔枝酒都係時間開張喇...我加啲梳打水同七起...好好味呀...不勝酒力既我就要再沖淡小小..好香荔枝味..我好中意..
仲有..中秋節係我既舊曆生日,去街市買野時見到壽包,叫媽咪買左兩個比我..kaka..
就係咁...過左一個好開心既中秋節啦...
各位..中秋節快樂呀 !!!
尋日做完奶皇餡,淨咗啲椰漿同花奶,未諗到做乜..
今日係媽咪到叫到佢買左香芋,準備用尼過節既..於是..我拎左一個..
屋企仲有西米,係有次我又老人痴呆發作..買完又買,所以有多左係到..
材料齊晒,就可以做個"椰汁香芋西米露"喇..
做法好簡單,材料分量可以自己調較..
1. 西米用水煮十分鐘,再焗至全透明,用冰水沖洗幾次至無膠質
2.
香芋去皮切粒,煮至軟身
3. 開約兩碗水,加冰糖煮至溶...甜味自行調較..
4.
加入西米及香芋,加入椰漿花奶,滾起即熄火(因椰漿煮一陣都會無晒香味架)
就咁就完成喇..椰漿花奶落幾多都係自行調較啦,每個人口味唔同..最重要係同西米個份量夾到..如果凍食,西米會再發大,調較水量時要預埋依一點呀..
再戰月餅..因為上次個咸蛋太大..所以再尼多次,今次壓碎左撈埋入奶黃到,好味好多..
加上悠悠學校星期五要開中秋節party,我地負責帶月餅,咁我就整啲小甜既多啦A夢比佢拎返去,等啲小朋友開心下..
買材料時見到有底糖蓮蓉,我又忍唔住買左添..嘻嘻...
老公話上次係街市幫我買咸蛋時,見到有一包包既咸蛋黃賣,寫明係好粉個喎..
所以今之叫佢幫我買返包試下先...
返媽咪到即蒸...哇..真係正喎..啲油多到呀...我上次原隻咸蛋個啲無乜油架
>_<
一家三口係到整...老公磅,悠悠搓圓,我印模..好快手攪掂..
今次因為悠悠係到攪攪震,所以印得唔係咁靚添
我既寶貝受傷了.
親眼睇住成件事既經過...而且都係我既疏忽,真係好心痛好心痛..
沖完涼,我用毛巾包住佢,其實一直以來都知咁樣有危險性,
包埋佢對手,跌倒時想扶一下都扶唔到..但偏偏我一直只有諗,但仲係走去包住佢..
今日出事了...佢就係我兩步前跌倒,我反應遲鈍,無及時扶住佢..
跌後我見到牆邊既一條鐵支,心寒了...
馬上抱起佢一睇..咀角都流血了...心都慌了...
不幸中之大幸,係撞到咀唇...如果係頭或眼...我真不敢想像...
望住佢大喊大叫...我只可以不停呵顧住佢..用水同佢沖洗傷口,心真係痛到不得了..
我不段自責...點解明知用毛巾包實佢有危險,我仲要包...點解佢跌既時候我反應咁慢...點解明明佢放左拖鞋係門口,我係要拎左入尼,攪到佢因為著拖鞋而企唔穩跌倒...
至左血,我知道佢無事..我知道過幾日傷口會好..但我仲係好心痛,好自責,好內疚...
瞓覺時,我腦海仲不段浮現出佢跌倒既一幕,眼淚又流下來了...
今日做一個蛋糕送比老公既9月份生日朋友,
幾個大男人,甜品都興趣不大架啦...一於做個酒味既,
佢地之前都有飲開百利甜酒..所以我要做過重酒味啲既,加埋脆脆底,應該岩佢地口味卦..
材料 :
百利甜酒 90g
忌廉芝士 220g
淡忌廉 150g
糖 45g
魚膠片
8-9g
做法 :
1.
我先做一個朱古力海綿蛋糕,切出兩簿片,脆脆加溶朱古力拌勻,我無份量,只係隨手加,唔好太多朱古力,唔係啲脆脆會變硬..然後用兩片海綿蛋糕夾住脆脆,以保持脆度..
2.
魚膠片浸軟,撈起,隔熱水座溶
3. 忌廉芝士加糖打勻,分次加入甜酒拌勻
4. 淡忌廉打起至7成,分三次用切拌法拌入芝士糊中,加入已溶魚膠
5.
入模,雪最少三小時至凝固,脫模,做裝飾,完成
我寫既食譜比較簡化,如果想知道詳細啲,又或者係做蛋糕新手既,歡迎留言比我
今日係我既生日,一樣揍囡返學,返工,放工..
不一樣係,中午同事請我同另一個9月生日既同事飲茶..
仲有就係,今晚唔返媽咪到食飯..
老公BOOK左坑口村一間扒房,入到去,環境都唔錯,有西貢細細間個啲餐廳既feel,
同埋都有啲外國人係到..感覺幾好..
一座底,佢地就拎一碗沙律同麵包尼,原來係唔洗錢架..正..
菜單全英文,講真,真係唔係太識睇,但點都順利點到菜既..kaka..
叫左一份12oz肉眼扒,一份卡邦尼意大利粉,
意粉一尼到,好大碟,又足料..仲好好味添..
到牛扒,我選擇左跟焗薯,牛扒好好好好食,煎到外脆內軟,一流呀..
兩個菜都好大份,食到好飽好飽..
埋單三百幾,仲要無收加一..真係太抵食喇...必定有下次!!
返到屋企,我急不及待打開雪柜,睇下有無驚喜....
果然...Kaka...係Tony
Wong啊..........餅神呀....
老公買左朱古力蛋糕,雖然唔係我心頭好,但Tony
Wong最出名係拿破倫同朱古力ma..
拿破倫我食過,所以老公買朱古力都岩既..
佢個朱古力真係好好好好食..入面有榛子味,有脆脆,慕絲好滑好滑..至緊要係成個蛋糕唔會太甜..
今個生日,真係好開心呢...
差啲忘記左我個澳門兩天遊,第二日仲未寫既添...哈哈...唔好意思...而家講返應該都未遲卦...^_^
第二日,七點幾就瞓醒..生陌床,睡不好..又比個悠豬伸左幾腳..
見悠悠都醒埋..就起身梳洗去食早餐..
落到餐廳好少人,得幾枱,正..
三星酒店..估唔到佢個buffet早餐又OK喎..飲品有成4款果汁,有鮮奶,有茶有啡,
西式有腸,有薯餅,有茄汁豆,有煙肉等等等仲有即叫煎蛋或炒蛋..中式有粥有點心,
仲有方包有牛角包,有幾款酥皮,有餅乾,有芝士,有水果,乾果,沙律菜....
食到好飽就返上房收拾行李check out去..
之後就打的直接去熊貓公園...不過悠暈車浪..嘔晒啲早餐出尼
>_<
去到公園,見到熊貓,成個人精神返晒..熊貓開緊飯....好可愛..
睇完熊貓,四圍行下,見到仲有啲唔同種既猴子,鳥類,
跟住就見到大鴕鳥喇..好大隻下呢..
之後仲見到有隻梅花鹿...好大..成隻馬咁大呢...我都係第一次見到梅花鹿呢..
睇完動物,有個展覽館,可以入去休息下,仲有得比小朋友畫下畫,睇下書架..
離開熊貓公園,就搭巴士去威尼斯人,
係間cafe到休息下,食啲野,悠悠好眼瞓,我係cafe抱佢瞓一陣,爸爸就去玩兩手..
之後想話去冰fun世界..點知要三歲先入得...好失望..悠悠仲扁扁咀,咸左出尼..
無計啦..唯有去搵個lunch食先...係一間葡國菜館門口見到班日本人,爸爸幫佢地影相,之後順便問下佢地間野好唔好食,佢地話OK..
咁就入去試下..間野入面全部外國人,一座底就比左幾個包我地,跟住我點左幾款菜..
前菜係葡國腊腸..佢係你面前燒脆表皮,再切片..
係就係幾香口..但食第二片就覺得好咸同好硬下...0趙到有啲牙軟..
其他菜式都算OK啦..但又唔太特別好食...可能太正宗既葡國菜唔係咁岩我地口味..
佢仲有一碟仔橄欖既野..勁咸...我放左入口都要吐返出尼..但見有一個鬼佬食得好滋味,一粒一粒咁"梅"...好可怕....
埋單要八百幾元,好貴好貴..後來先知原來依間係米芝蓮餐廳...
食飽出去見到有小市集,見到依啲小手工..好靚,忍唔住買左好多個..
之後返去大三巴個邊行下...其實成個澳門,都真係得個邊比較旺呢..
去食埋個豆腐花,再去買埋杏仁餅同蝦子麵..咁就完成左要做既事..
見時間仲早..諗住同悠去永利睇吉祥樹,但好多人搭的士..我地唯有行路去...
行到好鬼攰..等一陣就開始...點知......唔見棵樹,走左條龍出尼..轉左兩圈就返左入去..
悠悠好驚..係咁話走...好無聊喎...行到咁鬼攰..點解變左條龍架
>_<
仲有個幾鐘時間..老公話過埋三盞燈..好啦..打的過到...求其食碗麵..見到有間野好多人排隊..原來買豬腳薑..又買盒上船食啦..
之後幾經辛苦先搵到的士去碼頭...食麵個時悠瞓左..無食到..碼頭又無乜野岩佢食..就咁買個雪粒比佢,就完成左依個旅程了..
生日週..今次到屋企人喇..
一家人去左黃金海岸食lunch buffet,二妹仲帶埋佢個兒甥囡尼,
黃金海岸既buffet好似進步左喎..魚生新鮮,款式都算多,係甜品就少啲啲,但個麵包布甸好食..
食完就過去沙灘同啲小朋友玩沙,
今日雖然好曬,但係有陰既地方就都好涼快,好大風..
我地租左一把遮,係沙灘到舒舒服服過左一個下午..
夜晚返屋企,煮個簡單住家飯,
有欖菜肉鬆四季豆同埋照燒雞扒,
上星期BBQ仲有兩個蕃茄未食..竟然無穿無爛無變壞喎...
拎埋尼煮多個蕃茄炒蛋..我中意食蕃茄炒蛋係有加茄汁同醋既..咁先夠味..好好送飯呢
聽日約左舊同事呈呈食飯,今日要做好啲奶黃月餅送禮.順便又托佢拎啲返去舊公司先,
尋日整定個皮,雪一晚,今日就整奶黃
買左16隻咸蛋,媽咪幫我洗乾淨晒,有媽咪真好 ^_^
返到屋企,先開晒啲蛋黃出尼,加啲酒去蒸熟,
之後就蒸奶黃,個奶黃同上一次一樣,蒸完都仲水流流..
叮一聲諗起之前見過有人做奶黃唔係蒸既,係炒既..
一於開隻白鑊,慢火炒..都唔洗一分鐘就收晒水,成為一舊團喇..
咁就順便放係鑊上面搓滑佢啦..
買左個新模,中間寫住中秋既,好靚..印出尼比花花更靚呢,好中意,
63g大既模,我走去一餅一蛋黃..好似攪到奶黃得好少咁添...
但啲蛋黃蒸左..又唔想浪費喎...算啦...多蛋黃就多蛋黃啦..kaka
今次焗法同上年唔同,先180度焗8分鐘左右,再搽蛋液,今次個蛋液打發再仲有過篩,所以焗出尼個圖按仲好出..好靚呢..搽左蛋液焗多2-3分鐘至金黃就得啦..
記得唔好太深色呀..佢出左爐一陣就會再變深色啲架..
依個就係岩岩出爐
過左一陣,係唔係成個都深色左呢..
比上年進步左,真係好開心呢
包裝好先
送禮喇,希望你地中意啦 ^^
笨貓既我...其中一個特別扁身既,我都奇怪,明明個個都有磅過架ma..
於是切尼試身...發現依個係無包奶黃既....哈哈哈哈
