大開眼界既飯局

約咗老公既親友飯局

上去佢地屋企,美儀姐負責煮飯

十幾人飯餸,真係令我大開眼界呀

上去到,佢已經忙住洗洗切切

但佢一啲都無手忙腳亂

先切好晒一碗碗蒜頭,薑,蔥

一人幫佢手洗野,一人幫手切野..

我同悠係到行行企企,等開飯..

兩個鐘後開飯...

睇吓有乜野食..睇到你哇哇聲呀...

有超好食既韓式粉絲,真係好好食,我食左兩大碗

跟住有個韓式既豬朒肉,係用生菜包住食既,不過都幾辣,我食唔到呢

再尼有小炒王,好足料,好好食,我狂食

再有肉鬆四季豆,又係買飛忽

仲有白切雞啦,炒蝦啦,茄子白咖喱,紅酒炆羊肉,洋蔥豬扒,

仲有掛住食,無影相既炒蟹,蒜蓉蒸聖子,炒飯,炒意粉,仲有雜果乳酪做甜品呀

真係太太太勁....好似去左食私房菜咁呀

我的豪華生日會

9月17日係我生日,我係同蔡少芬同一日生日既,

記得N年前,佢岩岩出道時,

開左個豪華生日會,引尼唔少話題,

今日,我都有個豪華生日會,人地豪華百萬,

我就由老公豪花千元..哈哈

有幾豪?我真係未試過,食刺身食到飽架..

好,唔講咁多,去相,你地睇下豪唔豪啦..

三文魚一磅,仲有我至愛--赤貝

甜蝦, 巴馬火朖配超甜蜜瓜

超大大大隻帆立貝呀...

仲有好淋既牛扒,媽咪既拿手滷水,

仲有我指明一定要有既蔬菜啦

仲有好貴又好靚,又食得既花籃....應該係果籃先岩..kaka

最後出場,大愛..Tony Wong又一名作....

好開心,好滿足既一日呢 ^_^..

 

元氣新產品 & Smile Yogurt & Dessert Bar

出完尖沙咀交貨,一家三口就去食晚飯

悠悠話想食壽司,所以去左食元氣壽司

元氣壽司我地都算係常客,因為我同悠悠都好中意食壽司呢..

第一次去尖東依間,舖隻細細,位置唔多,

但又好彩唔洗點等位喎..

我一向最欣賞元氣壽司既等位安排,

佢可以係到前10個時電話通知你,

咁拎左張飛,我地可以出去行街啦,

如果你係會員,仲可以上網攞飛,跟住等電話添呀,

行得一陣間電話就到,去到等多一陣就有位了,

前後大約只係10-15分鐘,都幾快

一座底就見到佢出左新野喎,叫左個八爪魚小丸子食,

佢個小丸子同出面有小小唔同,個面炸到有啲硬,麻麻地

另外都有一款新食品,係甜品尼,一碟有三杯仔既,

分別有綠茶,吉士同意大利芝士

三杯都好好食,綠茶好香濃茶味,吉士其實係焦糖,

都好香滑,而意大利芝士都好香濃

依個好想再去食多次,岩晒我地一家三口,

仲要係我至愛綠茶,我老公至愛意大利芝士..

悠悠就係甜品都中意架啦..KAKA

飯後好飽要散散步,行左去K11,

其實係為左去Smile Yogurt & Dessert Bar 買笆菲食

依到既笆菲係用乳酪雪糕整既,而且仲超靚添喎

淨係門口依個show window都睇到花多眼亂,

細細既鋪仔,迫左好多人係到,買好快出好快,

係啲人揀最慢呢...kaka

我揀左依個叫做Golden Smile, 面有一片好脆既菠蘿乾,

酸酸甜甜幾好味呢,另外有粒士多啤梨,

上面搽左金粉糖漿,真係靚到震

中間白色係乳酪雪糕,入面仲有紅桑子果凍,

有啲脆脆片咁,跟住我已經好飽,唔知個底仲有乜野了...

整體尼講,都幾好味既, 一杯65蚊,可以一試!!

Full/half @ The one

兩位舊同事,菲菲&煖煖提早和我慶祝生日,

 揀咗The One 8 樓既 Full/half

 

因為事出突然,所以已Full Booking,
 

幸好兩位幫手收工趕去walk in,咁先座到張門口位咋..
 

座底睇睇張Meun,食物選擇真係唔多,但甜品款式就好多喎..
 

咁中意食甜品既我,決定三人食兩份Set Dinnie,
然後再點三款甜品先..
 

頭盤有沙律同湯,個南瓜湯都幾香濃,唔錯,不過唔記得影相
 

而沙律都OK,但汁比較少左啲,令到食個菜有啲Dry..

主菜有蘋果極黑豬鞍脾,豬肉好淋,好入味,但其實蘋果還蘋果,

 

如果豬肉入面可以有蘋果味就更好

另一個主菜係龍蝦天使麵配辣龍蝦汁,依個麻麻地,

 

龍蝦無龍蝦味,龍蝦汁係茄汁味...

跟住到甜品出場,有焦糖香蕉太妃批,依個唔錯,

 

蕉糖香蕉好食,不過唔係好覺有Toffee

之後到榛子朱古力蛋糕,幾濃榛子味,唔錯

最後係店員推介既apple crumble, 用鐵板上,幾特別,

 

但朋友仔都唔太愛玉桂味..所以我食晒咁濟..

 

食多兩啖就覺得太甜..越食越甜..

 

如果想叫依個,一定要同多幾個人分享,

 

食兩啖就very good喇...

埋單三人 $710, 多謝晒兩位...^_^

另外,值得一提既係依到服務幾好,

員工有笑容,見到朋友仔手用拎住豬骨食,

會主動遞上濕紙巾,用不停會尼加水,貼心既服務,

而家真係好少有了, 底比個讚 !!
 

豪門夜宴之火間土 + Haggen Dazs

今日約左兩個舊同事聚舊,約左去尖沙咀北間道一號既火間土食日本菜,好多人一聽到我話去火間土,都話,好貴個喎..係咩?咁就豪一次..尼個豪門夜宴啦...

北京道一號依幢大廈,因為向海,所以多數係高級餐廳..

我地去依間火間土,間有好多獨立房間,好岩一大班人,又或者二人談心..大房係他他咪..要除鞋..細房全部向海景,二人談心實好浪漫...不過我地三人行,又唔係談心,唔洗座房,因為座房有最底消費架...座大廳都有海景啦...

首先點左一枝梅酒..290元一支,720ml,夠晒我地三人飲...

跟住叫左啲魚生壽司都OK..但魚生我覺得少咗啲..好似290元左右,但加埋得四款,每款兩件..

沙律唔好食,有舊豆腐係底,但同啲西式沙律菜好唔夾...串燒仲差..燒到又乾又硬..no
good..

不過無影响我地聚舊心情啦...依餐每位要4XX..但我覺得和民仲好食過佢..無下次..

之後轉戰The one Haggen
Dazs,依間鋪好細,後幾張枱仔..幸好岩岩有人走..依間既食品唔同其他店既..佢得一啲外賣既款式..唔同平時有堂食既門市既...

依餐飯後甜品有人請客,多謝晒
^^..希望你快啲再升職,再可以請客啦...kaka

預祝老公生日飯 & 忌廉榴槤蛋糕

尼緊星期五係老公生日,今日屋企人話同佢食飯慶祝,正日就梗係留比我地自己一家三口啦..

今日去一間係將軍澳叫魚味既日本餐廳到食,細細間既餐廳仔,好彩又唔洗等好耐位..好快有位啦..

叫左好多野食,好開心..睇下有乜食..

依個芝麻八瓜魚其中一舊有問題,壞左腦..黑色既...同個待應講,佢只係收走左,無回應...=_=..唔好意思都無句呢...

算啦,唔好應該今日大家開心既心情...

食飽飯..返到屋企拎個我驚喜出尼...

榴槤忌廉蛋糕..老公好中意食榴槤...本來想拎埋去餐廳切,多啲人一齊食架..但陣味真係好勁..怕餐廳趕我地走呢..所以..都係返屋企三個人切啦..

依個蛋糕要做驚喜,真係好難呢..要打開雪柜都唔好比老公聞到陣味,連垃圾都要處理得好好先得,最難係..要悠悠守秘密,唔好爆比爸爸知呀...

幸好一切順利...yeah...祝老公生日快樂...

食譜如下 :

材料 : 雞蛋三隻,低筋麵粉60g,菜油25g,砂糖70g,甜忌廉 適量, 榴槤肉 適量

做法 :
1. 榴槤起肉去核,最好用比較熟,軟身既榴槤肉
2. 甜忌廉分兩份,一份直接打起,另一份加入綠色素打起
3. 雞蛋室溫放暖(或可用微暖水浸暖),加糖打起至杰身
4. 分三次加入低筋麵粉,切拌勻
5. 加入菜油,拌勻
6. 放入6吋圓模,180度,焗約30-35分鐘至熟
7. 蛋糕出爐係倒扣放涼,脫模切為三片
8. 分三層,每層中間唧入白色忌廉,加入槤榴肉(加多啲好味啲,但會好高身)
9. 放入榴槤肉後再加忌廉,放上蛋糕,再重覆8步驟
10. 蛋糕面唧上綠色忌廉,再加上玉桂枝做榴槤樣(用手指餅都可以架),完成!!

堂島卷

頂頂大名既堂島卷,一直好想試下,但因為見150元一個卷蛋,實在又買唔落手...

前兩日分別係唔同既Blog到,都見到有Blogger試過,終於都忍唔住佢既魔力..加上細妹去完歐洲三星期,岩岩今日返,就買個返去一齊試下啦..

上網講到個堂島卷好搶手咁,又話排晒隊,我一收工即衝去買啦..點知大把..仲唔洗排添...

食完飯就即刻拎出尼試...蛋糕幾軟熟,忌廉好軟滑,幾香奶味,唔錯..係就係幾好食..但150元,我唔會再買囉...KAKA...試一次都值既...