再見2012 @ 帝苑Buffet

2012年最後一天,公司兩點收工,係要大家食埋個Lunch先放人...仲要無人通知,無通告..幸好偷聽到,唔係都唔知閃得....唉...

返到屋企hea呀,今日真係好鬼凍,一家三口係被窩到,唔想郁..兩父囡瞓覺,我拎住個電話煲台劇..

6點就出發去尖東帝苑食Buffet喇..公司年年都有既,但以往係平安夜食既,今年改左31號呢,

一去到,見到有Live
Band,氣氛幾好,成枱面都係party玩具,悠悠玩到唔願出去拎野食,我就第一時間去拎返碗湯暖下身先,今日真係好鬼凍呢..西湯得一款,好似係龍蝦魚翅湯,想話配個包,但全部凍冰冰,硬邦邦咁,睇見到唔想食..

暖左身就食刺身喇...啊..有好多款..仲要有我最愛既帶子,大大粒...好正呀..一人份量都好多,成晚我食左9粒帶子呢..真係好味到暈

見到有成隻Ham係到,有專人係到片出尼,再卷舊哈蜜瓜...唔掂,食到停唔到口...

仲有座龍蝦山..不過蝦蟹我要少吃,只係食左一隻,都好滿足了..

到食熱盤,竟然有做法覆雜既威靈頓牛柳..好少可呢...

仲有好淋入口即溶既和牛...

甜品有好好食既馬卡龍,唔太甜,好味,食左好多粒呢 ^^, 其他甜唔都好好食,款式唔多,但味道唔錯

食食下,Live
band轉尼一場勁歌熱舞,氣氛突然熱起尼..悠悠都企埋出去跳舞呢..跟住到一個小胖小出尼,扮近排超熱既江南style,炒起全晚最熱既氣氛,好多人走出去跳舞呀,拍片呀,勁開心呢...

食到咁上下,有人尼問我地餐飲,跟住先知道原來一座底時,有人拎住啲果汁尼問我地要唔要飲品個啲飲品,係唔算餐飲,要六十元杯..竟然啲人無出聲,太過份,我去問清楚個秘書,先知全場好多人中招,後來應該老細都有照找數啦...依樣野就真係太過分..明屈咩...

9點幾我地就走喇..返屋企睇住電話倒數...Happy New
Year~~~~

焗蠔砵 + 芝士粟米釀雞翼 + 檸檬梳乎厘

今日收工返去同屋企人飲茶,跟住細細妹尼我屋企學做蛋糕,佢話明天要拎去畫室請大家食噃..

返到屋企四點幾開始,細細妹依然係滋滋油油既個性,要開住音樂,倒杯荔枝酒,悠悠閒閒咁做蛋糕..今次全程我都只係用口講,唔幫手,平時我只要一個小時做好既蛋糕,佢整左兩個幾鐘仲未完成,襯佢放左個蛋糕入雪柜定型時,我就拿拿淋煮飯啦..成六點幾喇..

今日我仲要整既係芝士粟米釀雞翼,好彩一邊教佢做蛋糕時,我一邊起晒啲骨先,唔係真係天光都未有晚飯食..

釀好啲雞翼就入焗爐佢...切左舊雞搥出尼,就醃一醃,煎香佢,再用蜜糖檸檬煮個汁,好開胃呢..

另外再整左個蠔砵,蠔同蒸蛋我一向都麻麻地,但依個食譜見佢有油炸鬼係面,好吸引我,所以一試,不過係蒸蛋時出左意外,啲水滾起晒,走左入個砵到..又沖左一啲蛋出尼..總之就大件事啦
=_=...跟住再有一個意外,係原來放埋油炸鬼先蒸蛋既,我走去蒸完蛋先放油炸鬼,好笨,攪到好似油炸鬼同蛋分離咁...so
bad...出尼啲蛋蛋老老地,幸好中間還好...加左果皮同莞茜既蒸蛋,無左蛋腥味,岩晒我呢...

跟住睇返啲釀雞翼,啲芝士流晒出尼...好香好香呢...不過可能醃得唔夠時間,唔係太夠味,不過總算唔錯啦...

食飽飯,細妹又心思思想食甜品,但材料同時間有限,我地決定整梳乎厘,梳乎厘我好中意食,但因為一出爐要即食,所以我未整過,因為好難一次整三丁人分量架ma..今次一於試下,2隻蛋就做左5杯出尼..簡單加左檸檬汁,都幾唔錯,不過檸檬同蛋白味真唔係咁夾呢...kakaka

食埋甜品後,細細妹再攪埋個蛋糕...今次連啲裝飾用公仔都係自己搓埋,都幾唔錯啦...之後聽佢講返,食既人都讚好呢...開心開心
^^

白酒蘋果焗豬排

玩左幾日,大人又攰,小朋友又攰,今日係休息日..

Boxing
Day原先係應該拆禮物既,但全家都係心急之人,又點會等到今日先拆啦..早就拆晒囉..

今日瞓到十點幾,帶悠悠出去踩單車食早午餐...前一排成日落雨,好耐無同佢出去踩單車啦..

食飽買埋晚餐材料就返屋企啦..

返到屋企洗左三機衫,再執埋啲夏季衫..kaka係呀..而家先執呀..成個衣柜冬夏季都放晒係到,亂到垃圾岡咁呀..

等悠悠瞓午覺時,我就準備晚餐先...今日整個白汁蘋果焗豬扒...因為屋企人有兩個蘋果未食...

首先豬扒醃一醃,拍啲麵粉去煎一煎,等佢封住啲肉汁,之後放入焗盤,加小小白酒,用鍚紙封住,180度焗10分鐘

之後蘋果切片,用洋蔥爆鑊,加入蘋果炒,加入約2-3湯匙砂糖,加小小白酒,煮至汁杰身

蘋果鋪係豬扒面,倒入白酒蘋果汁,再加啲提子乾,紅莓乾,再放入焗爐焗8分鐘,加入杏仁片再焗至金黃

出尼估唔到咁好食...我以為豬扒唔會有蘋果味..但竟然啲蘋果味入晒去,好清甜..超級好味呀...

聖誕節~~元朗摘士多啤梨去..

前一日同屋企人講好,今日去元朗摘士多啤梨..講好十一點出門口..

到左十一點,我地出門口,打比婆婆..佢話BB姨姨岩岩先起身...=_=...又係咁..遲到王幾時先可以改善呀...

我同悠先去座底飲杯啡,食件餅..座到悠都吽晒...等到12:20..佢地終於尼...早知我就瞓晏啲..浪費晒我美好既假期....唉...

跟住我地出發去元朗...搭地鐵,轉西鐵,轉的士..終於到喇..

一入去悠悠見到吹波波就話要買...跟住見到小朋友單車..就比佢去踩下啦..

仲有好多公仔款既,不過佢都唔中意,係要踩啲單車款既..

唯一一個上左去三秒比我影張相,又即刻落返尼...

跟住就去玩電動..依個電動要50元,玩一圈,都幾貴呢...

之後見到好多向日葵...我至愛啊...即刻衝去影影影...今日無乜太陽,佢地都望住地下呢...

再去草地吹下泡泡..玩下彈彈床..跑下步咁..就去摘士多啤梨啦...

啲士多啤梨好細粒,又唔太紅,可能因為今日多人,又大又紅個啲都比人摘晒啦...

不過都幾甜幾新鮮好味呢...

玩完就一齊出發去我屋企BBQ喇...悠悠又瞓左,大家輪流抱佢..都攰到死死下呢...

平安夜~~公司party

平安夜,依然係要返工,但今年老細無啦啦話開party,仲比帶小朋友返去喎...咁正,我一定帶埋悠悠返尼玩啦..

朝早如常工作,好彩有其他小朋友陪悠玩,唔係我邊度做到野呢..

到12點幾,啲人開始準備,我都無晒心情工作喇...

好勁,老細好有心機咁係到執野,開檔...攪到好似食buffet咁...勁呀..

party大約三點幾完左..大家又返自己位,但人人都無心情做野啦..我就陪住悠玩..kakaka..

到左5點鐘,老細先叫收工...唉..都好過無啦..閃...

跟住同悠去左時代廣場影Lago,好多人,我地只係影到戶外,而且悠無瞓晏覺,有啲扭計..都係算喇..回歸...

行到地鐵站,個傻豬攰到咪埋眼行..我一抱起佢即瞓著....

之後返婆婆到食飯,飯後返屋企,瞓覺時聽到隔離左右屋都係到BBQ,跟住到12點倒數,我同老公瞓係床上聽住..跟住老公話,係喎..今日係平安夜,點解我地咁無氣氛既....kakaka

聖誕party at Home

今日係屋企開party,為咗依個Party,準備咗好耐好耐......

準備食物啦,佈置啦,遊戲咭等等等等...

前幾日,睇電視一個外國人教整咗一個甜品,幾特別,好有美國味道,做法又簡單,一於試下..

只係用一個半圓模,係底放一片片既Panettone,
然後搽一層果醬,再放一層雲尼拿雪糕,中間放乾果同果仁,再放雪糕,之後係底層再加乾果,然後再放幾片Panetton,跟住壓實佢,放返入冰格,
食之前拎出尼,係面淋朱古力,就完成架喇...佢個食譜係再有淋酒既,但因為要for小朋友,所以我無左依一part啦...一食到啲乾果同果仁,就好有聖誕感覺呢..

另外,前菜就準備咗三文魚雜果沙律,巴馬火腿配哈蜜瓜,芝士配牛角包

而主菜就有紅酒燴牛尾配法包,美式豬仔骨,迷迭香燒雞,拿破崙螺絲粉,香煎新薯,脆玉瓜配紅蘿白

甜品除左個聖誕雪糕蛋糕外,就係好有聖誕味道既麵包布甸配自家製雲尼拿醬..食譜跟上次大師比我既..今次試用牛角包,真係好好好得...好食過方包多多聲呢...

攪左兩日,終於完成個PARTY,真係好開心好開心呢...

聖誕樹玻璃曲奇

星期五,係悠悠學校聖誕party,老師出通告請我地帶12隻雞翼..另外再私底下同悠悠講,叫佢整聖誕樹曲奇餅返去..因為老師知我係亞茂呢...哈哈

星期四約左人出街食飯,唯有今晚要攪掂..點知今晚媽咪又話打邊爐..打邊爐食得耐啲嘛,返到屋企都成9:30,但都要開工啦...

一早買左聖誕樹模...Lunch時間再去百佳買左一大包果汁糖...開工..

聖誕樹玻璃曲奇(大大小小加埋約60塊)~~

材料 :
牛油 200g
幼砂糖 130g (已經係小甜,唔好再減喇..)
雞蛋
80g
底筋粉 370g
綠茶粉 30g
泡打粉 2g
鹽 小許
果汁糖 約30-40粒
(因為我有一半係無落果汁糖,如果全部都係落既,就預一塊餅一粒啦)

做法 :
1. 牛油室溫放軟,加幼砂糖打至鬆發
2.
分2-3次加入雞蛋及鹽,打勻
3. 全部粉類拌勻過篩,分3-4次加入牛油雞蛋糊中,拌勻
4.
放入雪櫃約一小時至硬,(天氣凍都可以唔雪既)
5. 果汁糖分開各種顏色,搥打至碎
6.
放入已預熱175度焗約8分鐘,取出,放上碎果汁糖,再焗約5分鐘
7.
如果汁糖唔夠填滿個空位,再加入碎糖,完成後取出,放涼至糖變硬身便成

p.s.

1.要留意唔好放太多糖,會滿瀉出尼,太少填唔滿可再加,太厚既糖都會無咁好食架..
2.
我中意果汁糖部份有出現水泡泡,如果你唔想要水泡,可以再遲少少放糖,佢唔滾起就唔會起泡泡,如果餅已經金黃,但糖仲未溶晒,可以取出,放係焗爐既頂部,用個到既熱力令糖溶,咁又唔會滾起有泡泡架喇...
3.
印模時,先印左大個part,放係焗盤再印走中間細果個,如果係枱面印,個大模得返個框,就比較難拎去焗盤上架喇..
4.
如果啲果汁糖一邊厚一邊簿,可以襯熱時輕輕放斜佢,等佢流返去簿個邊,但要留意睇住全部餅餅,唔係倒左出尼呀 ^^

仲買咗啲靚靚包裝袋...小朋友見到實好開心呢

一邊焗曲奇,仲一邊整埋個可樂雞翼....攪完成12點..好眼瞓喇...