寶石寵物蛋糕

去完紅磡上架,跟住就返去揍悠悠返學

再趕返屋企開工

同事訂左個寶石寵物蛋糕比囡囡

依個莎菲公仔上次做過一次

今次做個改良版

比較立體感既做法

而兩邊用左個新既唧花方法,睇上去比較有動感呢

希望小主角今日收到會好開心好中意啦 ^_^

DIY曲奇套裝上架啦~~~

今日有事要請假

辦完事就出去紅磡廣場

去做乜?

因為有朋友仔係個度開左間格仔鋪

為咗支持吓朋友仔,我都租左一格尼玩吓

買乜野好...當然係我最拿手既野啦

原先想話賣曲奇餅既

但食物保存期真係有限,

咁一於整DIY自家制曲奇套裝啦

入面磅好晒材料,除左牛油同雞蛋外,

有齊晒各種粉類呀,糖,鹽,雲呢拿油同曲奇模等等

仲有埋食譜添架

咁樣,新手都可以輕鬆做到自家曲奇啦

又唔洗擔心買一大包麵粉,一大樽雲尼拿油..餘下個啲點算喎..

有興趣既朋友仔,快啲去紅磡廣場既The WoW Shop睇下啦...

順便去佢地Facebook專頁到比個讚啦 ^_^

https://www.facebook.com/WEOFFERWOWSHOP?directed_target_id=0

超勁台風??

中秋過後,玉兔就殺到,講到吹得好正,個風好勁..點點點咁...

老公都忙於收拾好天台,包好枱椅,做足準備

今日原先約左舅父一家食飯既

仲要係舅母既生日,我諗左一款蛋糕送比佢既

點知打風,飯食唔成,但我蛋糕照整..

整個細既,自家人吃啦..

無買定水果,唯有整綠茶海綿,配紅豆蓉餡,

而個裝飾就浪漫到暈..

係紫玫塊花籃,靚唔靚呢?

做完蛋糕,出面開始落晒大雨咁

成日同悠悠係屋企咁悶..

一於同佢整下曲奇餅啦

反正我都要整張曲奇相,

點解要曲奇相?..下回分解..keke

夜晚開始掛八號波

不過我地住村屋既,附近有座山靠吓

而且樓同樓痴得好近

所以,我一啲感覺都無...

不過上次個風有吹到天台啲野跌晒,又有吹爛野

但今次乜事都無?

個風真係好勁???

大開眼界既飯局

約咗老公既親友飯局

上去佢地屋企,美儀姐負責煮飯

十幾人飯餸,真係令我大開眼界呀

上去到,佢已經忙住洗洗切切

但佢一啲都無手忙腳亂

先切好晒一碗碗蒜頭,薑,蔥

一人幫佢手洗野,一人幫手切野..

我同悠係到行行企企,等開飯..

兩個鐘後開飯...

睇吓有乜野食..睇到你哇哇聲呀...

有超好食既韓式粉絲,真係好好食,我食左兩大碗

跟住有個韓式既豬朒肉,係用生菜包住食既,不過都幾辣,我食唔到呢

再尼有小炒王,好足料,好好食,我狂食

再有肉鬆四季豆,又係買飛忽

仲有白切雞啦,炒蝦啦,茄子白咖喱,紅酒炆羊肉,洋蔥豬扒,

仲有掛住食,無影相既炒蟹,蒜蓉蒸聖子,炒飯,炒意粉,仲有雜果乳酪做甜品呀

真係太太太勁....好似去左食私房菜咁呀

2013中秋節

話咁快又一年中秋節了

今年都係天台BBQ

公司少有地收4點,往年多數4點半架

收工衝返去接悠悠放學

學校個姐姐都話,今日好多平時唔會尼揍放學

 

既家長都出現咗...哈哈

跟住帶住悠悠,衝上百佳掃貨,

百佳好多人都係買BBQ既野呢,

買完野,全家人都到齊,齊齊拎野出發去我家

set好個場,掛上燈籠,睇住個圓圓大大月亮BBQ...

幸福快樂既一晚

祝大家中秋節快樂~~

糖皮火車唧花蛋糕

又有一個蛋糕order, 主角係7歲小男生,

 

佢媽媽話要火車蛋糕..

今次試下糖皮加唧花,早兩日用糖皮做好做好架火車,

 

放左係柜頂吹乾,

第二日返去,發現比野咬左幾口..

 

好恐佈..唔知係乜野..

唯有再整過,今次用袋包好...

本來想買芒果,但買唔到,真係秋天喇..

 

唯有都係用香蕉啦

做左個改良版既海綿蛋糕,出尼好鬆軟,好滿意呢..

面唧左啲草草,用朱古力做咗啲花花....

完成,糖皮火車好重,好驚佢會跌落山崖....

 

後面加塊朱古力頂一頂先...

我的豪華生日會

9月17日係我生日,我係同蔡少芬同一日生日既,

記得N年前,佢岩岩出道時,

開左個豪華生日會,引尼唔少話題,

今日,我都有個豪華生日會,人地豪華百萬,

我就由老公豪花千元..哈哈

有幾豪?我真係未試過,食刺身食到飽架..

好,唔講咁多,去相,你地睇下豪唔豪啦..

三文魚一磅,仲有我至愛--赤貝

甜蝦, 巴馬火朖配超甜蜜瓜

超大大大隻帆立貝呀...

仲有好淋既牛扒,媽咪既拿手滷水,

仲有我指明一定要有既蔬菜啦

仲有好貴又好靚,又食得既花籃....應該係果籃先岩..kaka

最後出場,大愛..Tony Wong又一名作....

好開心,好滿足既一日呢 ^_^..

 

咸蛋超人蛋糕

今日要交一支order,三點左右又有朋友仔尼屋企玩

一早起身就要開工

今次試左另一個海綿蛋糕譜,真係幾好,以後就用佢

客人要求做咸蛋超人,鮮紅色既褲仔好難上色,

整極都係有啲粉紅咁...但實在又唔想加太多太多既色素喎

唔知有邊隻色素係可以少少都好上色既呢?

用錯左銀色面既底咭,隻超人好似穩咗形,

 

得返對眼同條褲咁..哈哈

脆皮奶皇月餅

不經不覺,仲有幾日就到中秋節喇,order月餅鳳梨酥做左好多,

 

但仲未為自己做幾個過節添

 

老公又order話要整幾盒送比親友喎

 

咁襯今日有啲時間,開工啦

 

上網見到一個食譜既奶皇係用煮,炒,再搓既方式,唔洗蒸喎

 

唔洗蒸,就必定唔會有蒸過老既問題啦

 

咁就試吓啦,而且個餅皮唔洗開機打

 

話咁快就做好26個,老公悠悠即食一個..

 

喂,留返幾個用尼過節架...

第一次開班

係一次真正開班收錢教人整餅..

但因為無地方,只可以係屋企個小小客廳,

自己屋企,當然只接受朋友啦,

自己唔算乜野大師傅,所以只係想開親子班,

唔係for大家學野,係for大人同小朋友開心吓,

不過整整吓,啲小朋友太攪攪震,最後叫左悠悠幫手,

帶晒佢地入房玩..哈哈..終於得返啲大人係到整..

睇下大家啲作品,都幾唔錯呀..

之後就入盒,包裝,仲比佢地自己揀貼紙,

烹飪班突然好似變咗美術班咁呀...

玩左三個鐘,大家都餓了吧...

我一大早焗左個玉桂香蕉蛋糕比大家做下午茶,

有得食又有得玩,希望大家對今次滿意啦..

第一次開班,工具同準備都好不足,希望大家體諒,

下次一定做得更好!!

元氣新產品 & Smile Yogurt & Dessert Bar

出完尖沙咀交貨,一家三口就去食晚飯

悠悠話想食壽司,所以去左食元氣壽司

元氣壽司我地都算係常客,因為我同悠悠都好中意食壽司呢..

第一次去尖東依間,舖隻細細,位置唔多,

但又好彩唔洗點等位喎..

我一向最欣賞元氣壽司既等位安排,

佢可以係到前10個時電話通知你,

咁拎左張飛,我地可以出去行街啦,

如果你係會員,仲可以上網攞飛,跟住等電話添呀,

行得一陣間電話就到,去到等多一陣就有位了,

前後大約只係10-15分鐘,都幾快

一座底就見到佢出左新野喎,叫左個八爪魚小丸子食,

佢個小丸子同出面有小小唔同,個面炸到有啲硬,麻麻地

另外都有一款新食品,係甜品尼,一碟有三杯仔既,

分別有綠茶,吉士同意大利芝士

三杯都好好食,綠茶好香濃茶味,吉士其實係焦糖,

都好香滑,而意大利芝士都好香濃

依個好想再去食多次,岩晒我地一家三口,

仲要係我至愛綠茶,我老公至愛意大利芝士..

悠悠就係甜品都中意架啦..KAKA

飯後好飽要散散步,行左去K11,

其實係為左去Smile Yogurt & Dessert Bar 買笆菲食

依到既笆菲係用乳酪雪糕整既,而且仲超靚添喎

淨係門口依個show window都睇到花多眼亂,

細細既鋪仔,迫左好多人係到,買好快出好快,

係啲人揀最慢呢...kaka

我揀左依個叫做Golden Smile, 面有一片好脆既菠蘿乾,

酸酸甜甜幾好味呢,另外有粒士多啤梨,

上面搽左金粉糖漿,真係靚到震

中間白色係乳酪雪糕,入面仲有紅桑子果凍,

有啲脆脆片咁,跟住我已經好飽,唔知個底仲有乜野了...

整體尼講,都幾好味既, 一杯65蚊,可以一試!!

80個酥酥order

又接左單大生意,客人訂40個鳳梨酥同40個紅豆酥,

 

岩岩又遇著有人訂左蛋糕,

 

所以做到無停手,好彩老公好幫手啫..

 

幫手磅材料,入埋包裝,同埋揍住悠悠..

 

好順利咁準時完成,出去尖沙咀交貨啦

 

希望客人收到滿意啦

阿拱

你地知唔知邊個叫阿拱?

佢就係係怪獸大學入面,紫色,成日拱橋個個呀..哈哈

今次既蛋糕order主角就係佢

睇佢簡簡單單,原來都幾難整

因為佢就係太簡單,無野突出到佢

唔知點解係調色方面,硬係調得唔太好

啲色都係唔太出

下次試下買其他既色素先得..

搬舊文方法分享

我見好多blog友都唔係好攪得掂依個blogspot,

 

我都攪左好幾日,終於叫做攪掂啦,

 

而搬舊文,我用左一個方法,我唔知叫唔叫最好,最正確,

 

但我搬到囉,搬到就得啦,係唔係?

 

第一,去Yahoo到備份舊文

 

首先跟Yahoo所講既方法,先download咗你既舊文先,

 

之後佢會比條link你,你將啲舊文全部備份落去你既電腦到,

 

記得要揀備份去電腦邊個位置呀,唔係一陣搵唔返

 

http://download.blog.yahoo.com/download

 

 

第二,下載程式,將備文轉為XML檔

 

download一個叫做"blogtrans"既程式

 

https://sites.google.com/site/gaagaaga2/blogtrans

 

程式download後,係一個壓縮檔,要先解壓喎,

 

解壓後打開,係入面有個files叫做blogtrans既,

 

按一下出現個框,再按執行,

 

跟住就再出現個框,框上面有個匯入既制,

 

跟住按下匯入,然後揀返你Yahoo個個備份入面既一個files,

 

個名後面會係Moveable-Type既,

 

跟住就會show晒你既舊文出尼,之後再按匯出,

 

你可隨意改個files名,但記得係個名後面加返 " .xml " 呀,

 

咁就可以將你個Yahoo備份,由HTML檔,變左做XML檔啦

 

第三,將已轉當既舊文搬到blogspot

 

跟住去返你個新blog到,頭頂按一下設計,

 

之後係左手邊最底個位,有個設定,按一下,再選其他,

 

之後中間就會出現個匯入既制,

 

按一下就可以去揀返你個XML檔既備份,

 

跟住打埋個驗証碼,按匯入,

 

等一陣你既舊文就返晒尼架喇..

 

 

 

 

 

 

Full/half @ The one

兩位舊同事,菲菲&煖煖提早和我慶祝生日,

 揀咗The One 8 樓既 Full/half

 

因為事出突然,所以已Full Booking,
 

幸好兩位幫手收工趕去walk in,咁先座到張門口位咋..
 

座底睇睇張Meun,食物選擇真係唔多,但甜品款式就好多喎..
 

咁中意食甜品既我,決定三人食兩份Set Dinnie,
然後再點三款甜品先..
 

頭盤有沙律同湯,個南瓜湯都幾香濃,唔錯,不過唔記得影相
 

而沙律都OK,但汁比較少左啲,令到食個菜有啲Dry..

主菜有蘋果極黑豬鞍脾,豬肉好淋,好入味,但其實蘋果還蘋果,

 

如果豬肉入面可以有蘋果味就更好

另一個主菜係龍蝦天使麵配辣龍蝦汁,依個麻麻地,

 

龍蝦無龍蝦味,龍蝦汁係茄汁味...

跟住到甜品出場,有焦糖香蕉太妃批,依個唔錯,

 

蕉糖香蕉好食,不過唔係好覺有Toffee

之後到榛子朱古力蛋糕,幾濃榛子味,唔錯

最後係店員推介既apple crumble, 用鐵板上,幾特別,

 

但朋友仔都唔太愛玉桂味..所以我食晒咁濟..

 

食多兩啖就覺得太甜..越食越甜..

 

如果想叫依個,一定要同多幾個人分享,

 

食兩啖就very good喇...

埋單三人 $710, 多謝晒兩位...^_^

另外,值得一提既係依到服務幾好,

員工有笑容,見到朋友仔手用拎住豬骨食,

會主動遞上濕紙巾,用不停會尼加水,貼心既服務,

而家真係好少有了, 底比個讚 !!
 

累了

又再完成一個訂單

有十六個鳳梨酥

八個紫薯紅豆月餅

八個椰汁香芋月餅

仲有八個奶皇月餅

 

不幸地,又生病了

又要帶病做餅

可能真係太攰喇

尼緊仲有一轉

做埋就收爐

下年中秋再努力喇~~

 

新家

隨著Yahoo的Blog要關閉,
跟著大伙兒搬到這邊來,
笨笨的我要慢慢從新適應了!

 

一切從新開始,
寫作方式也想一嘗新意,
來點不一樣的,可以嗎?

再見

慘....Yahoo Blog要停止了....無得用了...我岩岩先尼左無耐咋...乜咁架..可惡...
難得係到識到幾位blog友...激死人啦...
但我唔會停止寫blog架..我會繼續努力!!
係依個blog停止前,我會盡快找新家架喇...希望到時再見到你地啦!!


Yahoo 公佈 :

重要公告：Yahoo! Blog將於2013年10月30日進入唯讀模式，2013年12月26日關閉服務

經過評估全球資源及整體發展方向後，我們決定在2013年12月26日正式終止 Yahoo! Blog。為保障用戶權益，自2013年9月2日起，Yahoo! Blog將開放用戶的資料備份申請、下載、「輕鬆搬家」、通知我們新網址服務。

玩沙樂

我一直有皮膚既問題,之前係西貢遇上一檔賣手工皂既,佢既皂成份天然,於是買左返去一試..

用完感覺都幾好,後尼再係佢FB發現佢地有做紫雲膏,有主婦手問題既我又試下呢,但效果唔係咁得,後來再知道佢地可以跟據你既問題去調制香油,所以今日就去到西貢,調返一支岩我既香油,希望可以解決到煩左我十幾年既主婦手啦....

一場入到西貢,梗唔係買完支油就走啦,天氣咁好,帶埋玩沙玩具,同悠悠去吸下新鮮空氣..

藍天白雲,真係好舒服,可惜係西貢依個小沙灘仔啲沙好粗,又多貝殼碎片呢..但無損大家玩樂心情..^_^

依張相有我地一家三口係到架....kaka

走個時又見到好多牛牛喇,比之前多左好多呢,仲有小牛仔,好可愛呢 ^^

玫瑰抺茶紅豆忌廉蛋糕

終於個病完完全全好返晒喇...手痕痕要做蛋糕啦 ^^

今日唔係有order要做,只係因為手痕,咁要諗下做乜野蛋糕好呢..

其實,會訂個蛋糕送比人既,就代表依個人係你心目中係一個重要既人,你想令佢開心..

多數,都會係親人,好好朋友,而最多既,一定係情人啦...

今次依個蛋糕好浪漫,女仔收到一定好冧,除左粉紅色,你都可以選擇紫色,藍色,都係咁浪漫架..

除左情人,依款蛋糕都好岩孝敬母親大人既,媽媽收到,都會好窩心呢..

氹人開心,唔一定要生日架,如果你都想氹人歡喜,快啲加入我地facebook群組,拎個蛋糕返去一齊冧下啦 ^_^ : https://www.facebook.com/groups/154423308087475/