火焰紫菜肉鬆蛋糕 @ 西貢獅子會&BBQ @ 媽咪生日

好長既主題...但其實又只係好簡單既事情....未就係媽咪生日,然後我整左個蛋糕,又後再去西貢玩囉....

尋日先做好個紫菜肉鬆雪芳蛋糕,因為媽咪有糖尿病,不宜食甜,所以最好做咸蛋糕啦,好小糖好小鹽就得...不過就咁雪芳又唔夠靚喎..左諗右諗...

今朝一早起身,三個蛋白加小小糖打起..炆落蛋糕面,再整個火燒燒佢...攪掂...火焰紫菜肉鬆蛋糕,夠晒健康啦...不過炆蛋白,我實在唔識點樣整啲鈎角出尼...唔夠雪山feel添..知道媽咪好中意食果仁,搵下,屋企有榛子同合桃,焗香佢,放係雪芳蛋糕中間個洞洞到,媽咪好意啲果仁呢..

11點半到媽咪屋企,切埋蛋糕..等到12點半先出發到..原先想去粉嶺食齋..但睇下時間..去到都兩三點啦..都唔知仲有無得食...大家諗左一輪,決定改去西貢近近地算了..

最後去左西貢既獅子會行下...依到都算幾多野睇啦..啲花種都幾多呢...

 

行完獅子會,就搭的士落西貢碼頭行下,然後又去BBQ,而家要188元一位了,真係好貴,依間野由當年98元就幫襯佢..都而家188,都仲幫襯佢..咁佢啲食物真係款式多,又乾淨既,全部放係雪柜入面,飲品又任飲,連熟食款式都好多..188都算可以接受啦...

 

Haggan Dazs 雪糕火鍋

約左momo一家人,為既係同細細佬慶祝5歲生日,我一早講明,要請佢地食雪糕火鍋..

momo因為唔工作照顧兩個小朋友,所以平日都知慳識儉,好少比兩個小朋友食依啲又貴又無益既野..所以我一諗起佢地食雪糕火鍋個樣,一定係爆開心啦...

因為就家姐係黃埔學跳舞,所以我地就約係黃埔,先去食碗麵,就拉大隊出發去Haggan
Dazs..

黃埔依間店真係超級咁細...得兩三張枱..我地六個人迫埋一張細細枱到..

未食先,三個小朋友已經好興奮..雪糕尼到,好難先叫到佢地影張相,就急不及待開餐啦.....

三隻貓仔..狂吹掃落葉....16個球..我只係食到一個....不過想佢地開心,都係留返佢地食啦..

食晒啲雪糕..連啲朱古力漿都唔放過...就咁用匙"不"尼食.....哇...............諗起都爆甜...

估唔到佢地食得咁快...早知我叫個大架啦..原來16個球都唔係好多咋...

攪到四圍都係..事後三個大人要清理場面..加上佢地又嘈..食完都急急腳閃人囉...

但真係過左開心既一個晚上啦..

睇下佢地食到個貓樣啦....

啤梨小紅莓合桃白朱古力蛋糕

瞓到成11點,起身同悠悠出去食啲野,行一陣...

今日見個豬仔幾乖,行到3點,同佢去食雪糕啦...其實係自己好想食..kaka..

我好中意去Haagen
dazs食雪糕,雖然係幾貴,但見佢裝飾到啲雪糕咁鬼靚,真係睇下都開心架..

食完雪糕,返去屋企又隌悠悠午睡,依啲懶人生活真係好正呀....

瞓醒覺,準備晚餐,今日整悠悠好中意食既可樂排骨同炒烏冬...個豬仔食排骨時問我..點解啲可樂排骨無可樂味既....kakakaka...唔通你想仲有氣既咩....笑死我..需然無可樂味,但佢都食到津津有味呢..

煮飯時我再整左個啤梨小紅莓合桃白朱古力小蛋糕,食譜用160度焗1個鐘又15分鐘,但我諗我起碼焗左1個鐘又45分鐘先熟得晒..仲要見好多油係個底到流晒出尼...場面有啲恐怖..

蛋糕出爐試一口,都唔錯,好香口好滿足呢

食譜參考自 : http://www.ricebowltales.com/2013/01/pear-cranberry-white-chocolate-and.html

晚餐 @ 法式焦糖燉蛋

今晚約左好朋友呈呈尼屋企作客,又係我練習既時間...

呈呈指定要燒雞同紅酒燴牛尾,紅酒燴牛尾煮過好多次,今次算係好熟手了,尋日已經先煮定,今日番熱就得...

中午開始先整定甜品,放落雪柜,跟住就醃好隻雞,放係到風乾..再尼卷好啲風乾火腿哈蜜瓜,再煮好湯,整沙律,煮埋個飯,焗返啲包就總算完成..忙左半日呢..

呈呈同亞沖5點左右就到,呈呈幫我團購買左牆貼,我地一齊係到貼,玩左一論就準備食飯啦..

佢地仲帶左支香檳尼,不過酒精成份太高,我地唔多飲酒既都覺得太濃了..下次我再為你地準備果酒啦
^^

好,唔講咁多...開飯~~~

而個飯後甜品,就係我第一次整既法式焦糖燉蛋,估唔到好成功,好香滑,第一次用支火熗,燒得有啲醜...但塊焦糖好脆好好味呢 ^^

法式焦糖燉蛋食譜參考自 :
 http://www.rthk.org.hk/elearning/dessert/cake_cremebrulee.htm

杏仁小紅莓曲奇

心思思又想整野,但收左工,返媽咪到食埋飯再返屋企都成九點,時間有限既情況下,只可以做簡單既野,咁不如做曲奇啦,但如果做唧花同印模都比較花時間,諗落最好都係切開一塊塊既,快靚正呀..

之前整過好多曲奇都係比較鬆,入口融化個種,今次好想做一個鬆脆既,仲要係面加啲砂糖,咁悠悠一定好中意食呢,入面選擇咗小紅莓同杏仁粒,一出爐好香啊..即時忍唔住要食,真係好好食,悠悠都食左兩個,食個時仲係熱,所以好鬆化,我諗凍左會脆口啲...

材料 :

無鹽牛油
100g
低筋麵粉
140g
粟粉 10g
糖粉
75g
蛋
半隻
小紅莓及杏仁 約50g
(可除意)

做法 :
1.
牛油室溫放軟後打軟,加糖粉打至發白
2. 加入蛋液打勻至鬆發
3. 伴入小紅莓及杏仁拌勻
4. 篩入底筋麵粉及粟粉拌勻
5.
用保鮮紙卷起,放入凍格雪半小時至硬
6. 切片,面灑砂糖,放入已預熱180度之焗爐內,焗約20分鐘至金黃色

聖誕前買左啲小袋仔,諗住聖誕整曲奇送禮既,最後曲奇無做到,袋仔都無用到...唯有快啲用埋佢啦..唔係要放到出年聖誕喇...啲袋仔好靚架..

旺角半天遊@haagen dazs high tea + 屋企BBQ

之前係團購買咗啲野,要出旺角拎,所以今日收左工,就一家三口行下好耐無行既旺角,

一出到去先去栢裕拎野,之後去食個午飯,再去行商場...旺角啲商場真係好耐無行,又人多又熱,悠悠行一陣就開始嗌攰嗌熱...帶住個細既,真係行唔到街啦..

見佢都肯開左一陣,就同佢去食下雪糕,氹下佢開心啦..上網睇左,朗豪坊有haagen dazs,
去到要等位,好彩岩岩有幾枱都走,好快有位啦...

tea set同雪糕火鍋價錢一樣係$228, 火鍋有成16個球,費是悠悠食太多雪糕啦,所以叫左tea
set,仲貪佢有兩杯飲品..

個tea
set有四個雪糕球,有兩件好似雪糕三文治咁既野..影埋相都溶溶地...我叫左我最中意既綠茶同紅桑子,超好味,老公要左一個百利甜酒味既,佢話無乜酒味..悠悠就梗係要朱古力啦...食到連隻碟都想食埋..

第二層有兩杯奶凍咁既野,上面有啲士多啤梨粒,奶凍無奶味,仲好實下,一啲都唔滑...另外有兩塊餅仔,上面有粒朱古力,無乜特別,仲有無件應該係杏仁蛋糕,有四份一粒仔士啤梨係面既,依個OK好味,但實在勁細件..第三層都係水果,士多啤梨好大粒....

食完雪糕,就買食材返屋企,又玩BBQ...個BBQ爐大大話話用左5,6次...一定要襯天氣凍時用多啲,唔可以比佢打入冷宮...

今次攪咗啲新花款,除左基本既雞翼,豬頸肉,牛肉粒之外..整左個金菇肥牛卷..仲有芝士雜豆釀磨菇,芝士白汁螺絲粉同芝士年糕..

係百佳見到有依隻pizza芝士,係有兩隻芝士係入面,好似幾方便,又唔貴,只係39.9...不過芝士味真係淡左啲囉...平野都係無好啦..

仲有我好中意既燒菠蘿,當食肉食到好漏既時候,食片燒菠蘿,即刻舒服晒...

食飽飽,悠悠就開始玩今日出旺角拎既團購玩具喇..就係依個貼牆黑板啦...30幾元好大張,依到剪左三份一左右咋..幾方便既呢...