話咁快,尼到假期最後一日,真係超唔捨得......
今日約左菲菲去迪迪尼酒店食tea
buffet,未去前一直好擔心悠會怕卡通人物,因為以往經驗佢都好驚既..今次再三問佢,佢話唔驚,佢會同米奇影相..我先再夠瞻試下..
一入到酒店餐廳,一座底就見到Pluto,悠悠即大叫好驚.....我心諗...大鑊.....算啦,食野先,等佢冷靜下先..又估唔到依度幾多野食喎,雖然無任何海產類,只有壽司..但其他食物都幾精致,都唔錯啦...
食食下野,又見到Daisy,悠悠竟然唔驚,主動話要去影相,仲摸下佢..叻喎...
再尼到高飛..高飛真係好高..悠悠又好驚啦.....咁我自己影相喇..kaka
最後到Mickey尼喇..悠超開心,同佢影相,又攬又鍚,仲同Mickey拖住手,同其他小朋友一齊轉圈圈,排火車...開心到佢...
好彩今日人唔多,得半場人,所以啲卡通人物都好得閒,可以慢慢影相,慢慢玩..不過最可惜係無見到悠悠最中意既Minnie呢...
今次悠悠唔再驚卡通人物(除咗狗隻類..keke)..咁下次我地可以入迪迪尼玩啦..yeah!!!
又到星期六喇..老公放假..yeah..
瞓到十點幾,老公起身煮早餐過我地食,好開心,好難得一家三口一齊食早餐呢...
食完早餐,係屋企hea一陣,點幾鐘就出門口,去尖沙咀行下....
見到舊同事菲菲去The One影鴨仔,我又想去影..老公話想去行City
Super,岩喇...尖沙咀啦..
係The
One影左一輪相,鴨仔真係好靚,影相勁靚,加上日頭去,玻璃外透入陽光,出尼啲相睇到都開心..跟住我地落吉之島行,有12蚊點同超市,岩晒我掃貨..我同老公都中意行吉之島同City
Super依啲外國超市,中意每件貨慢慢睇,睇下有乜新奇特別既新產品..
真係估唔到,The
One咁細..我地只係行頂樓個間精品店同吉之島,都行成個幾鐘...
之後就轉戰海港城,一入去..見到朱古力佈置,又狂影一輪..之後去City
Super行,慢慢睇,買左幾樽香草返去,返到屋企都十點幾囉...好攰,但好滿足既一日
今日係19/2,
終於有時間寫返之前既blog,成個新年,真係無望個部電腦,無拎起過隻老鼠...尋日第一日開工,全公司人返晒尼,啲大粒係到,又唔放便寫blog..今日終於寫得啦...由於今年新年公公既離開,我地唔派得利是,唔去得人地屋企,唔返得媽咪到拜年..所以成個新年係無乜新年氣氛既...初一只係屋企附近飲茶行下,初二就一家人去左愉景灣逛逛,夜晚就一齊食飯同家姐慶祝生日...所以無乜特別要寫...咁就尼寫情人節啦...
今年情人節係初四,係紅日,好開心,可以係屋企慢慢整整整...情人節我多數中意自己係屋企整,因為真係接受唔到出面座地起價,仲要同人迫囉...
今日既主菜係豬手,老公一早想食,今次做法係開一煲水,加入黑椒,八里香,鹽,放入豬手,滾起後慢火炆煮兩個鐘,抺乾,再放入220度既焗爐入面,豬手面每5分鐘掃一次啤酒,直至金黃色..
不過今次炆得太耐,啲肉過淋咗啲,下次改炆一個鐘,然後浸住佢好了...
係焗豬手時,個焗爐突然卟一聲,然後個發燒線熄左...唔通燒左???豬手未焗好..唯有改為煎..又OK喎..個面好脆口呀...
以為要換新焗爐添..點知第二日開返又無事喎??奇怪..點都好..慳返..kaka
情人節,唔少得甜品,今次做左個黑加倫子白朱古力芝士蛋糕,好中意個浪漫既紫色..只係睇都覺得淘醉呢...不過整左先知原來黑加倫子係咁酸既,仲以為係甜既添..我中意酸呀,但我老公中意甜呢...咁岩啦..佢食朱古力個層,我食黑加倫子個層..kaka..
係之前份工,成日都要出差上深圳公司,個陣時係深圳,午餐時間好長,由12:15-2:00,好鬼happy既..我地成日都會去一間菜館食午飯,國內人午飯,唔興一人一碟,佢地偏愛小菜型式,其中一道菜,霸皇雞,係我超中意既其中一邊,其實每次上深圳,都好期待午飯,因為上面好多間食店既野都好好味既,香港既快餐式真係要學習一下....
而家轉左工,唔洗再上深圳,我成日都會好掛念依道霸皇雞,唯有自己動手...首先一定要準備大量蒽,切成絲,再加啲莞茜備用..
雞洗淨,放入一煲加左薑蒽既大滾水入面,煮約5分鐘,熄火焗約半小時至熟透..
拎出尼吹乾,切件,面放上蒽花莞茜
開鑊,放一碗浸完雞既湯,加入兩匙雞粉,加幾滴魚露,然後埋欠,淋上雞面..再燒熱約三湯匙酒,加入薑絲,爆香,油滾時即淋上雞面...完成
上枱時係完全唔見雞架...kaka...
寶物係裡面呢...滑到呢...........尼多碗飯唔該!!!
卷蛋,又叫瑞士卷,又有人叫蛋卷,但偏偏我愛叫佢做卷蛋,感覺依個名字好可愛..
紅豆餡放左係屋企個雪柜好耐...係時候要整..整一條,一家三口食唔晒,返尼公司又唔夠分..一於整夠兩條...整多啲香蕉朱古力..
之前已經有個好唔錯既卷蛋食譜
參考自 : http://hk.myblog.yahoo.com/diana-world/article?mid=5231
材料 :
蛋白 120g
蛋黃 80g
砂糖 60g(我減至50g都夠甜),
20g
菜油60g (我都減至50g,,怕肥)
牛奶 60g (因為菜油減左,怕唔夠水份,我加至67g)
低筋粉 80g
泡打粉
1/2茶匙
梳打粉 1/4茶匙
餡料可自行喜好
做法 :
1. 蛋白打至起泡,分2-3次加入50g砂糖,打至企身
2.
用另一個碗,蛋黃打散,加入20g砂糖,打至淡黃色
3. 分次加入菜油及牛奶,打勻
4. 分次加入已過師低筋粉,泡打粉及梳打粉,打勻
5.
取出三分一蛋白,加入蛋黃糊內,拌勻,再倒入餘下蛋白內,拌勻
6. 放入已預熱焗爐,180度焗15分鐘
7.
出爐馬上倒轉在另一張牛油紙上,撕走底紙,再返反轉,咁就唔會痴住張紙架喇
8.
搽上餡料,卷實,用保鮮紙包好,放入雪柜雪一小時定型,切件完成
打起一盤淡忌廉,一半加入紅豆餡...完成..
你中意邊一種口味 ??
病....
星期日BBQ完,尋日喉龍超級痛,真係超級痛個隻,Lunch時間走去藥房買藥,佢比左盒中藥成份既消炎止痛藥我,食左三次一啲好轉都無..仲成59元得8粒...可惡...
今朝一早喉龍仲係好痛...仲成個人都好攰咁...算..請病假...好唔想郁..所以連悠都唔返學..我依個亞媽真係懶...
瞓到十點幾,悠悠起身有幾聲咳..唔係咁快傳染咋呀...唯有兩個齊齊睇醫生,睇完醫生去食個麵,食完麵餵左悠食藥先...跟住去超市買小小晚餐料..都未買完野,悠就係咁話好攰好眼瞓..睇尼佢啲藥好勁...睇見佢個可憐樣,真陰公
返到屋企,兩母囡大覺瞓...由兩點瞓到五點..跟住我就去煲個雪梨海底椰糖水,係係超市買既湯包,個湯包有海底椰,有三條紅蘿白,一條粟米同南北杏蜜棗
,我再買四個雪梨,加小小冰糖去煲,原先想加糖冬瓜..但成17元一包仔,洗唔洗咁貴呀...所以都係加冰糖算了..
煲落糖水,悠悠話好悶..諗起星期日整完媽咪個生日蛋糕,有四個蛋黃淨左,唔放得好耐..於是同悠悠一齊整下曲奇啦..記得網上流傳一個藍罐曲奇既食譜,係用四個蛋黃既...份量岩岩好..就整佢啦..做好麵團後,將佢份一半,一半加入杏仁碎同提子乾,卷成條狀雪硬切片焗,
一半就壓平,雪硬,同悠悠一齊印下模,等佢開心吓...分量出尼好多,比悠悠帶返學校同小朋友一齊分享..
(依個食譜係網上好多人流傳,我都唔知係出自邊個發明者了,不過係到多謝佢既分享,個食譜真係好得!!)
材料 :
無鹽牛油 250g
糖粉 160g
蛋黃 1隻
熟蛋黃 3隻
低筋麵粉
350g
雲呢拿油 1g
鹽 小許
做法 :
1. 熟蛋黃切碎,低筋麵粉過篩,焗爐預熱180度,10分鐘
2.
牛油切粒室溫放軟,加入糖粉及鹽打至鬆發
3. 慢慢加入生蛋黃,拌勻,再加入雲呢拿油,熟蛋黃拌勻
4. 分次慢慢加入麵粉,搓成團
5. 雪硬,
切片或者印模, 放入焗爐焗10-15分鐘至金黃色
p.s.
1.
如想加入杏仁及提子乾,可以係搓成麵團後再加入拌勻就可,可隨意加入唔同既乾果同果仁..
2.
如想印模,最好先碌平,放入雪柜雪硬,拎出尼即印模,咁就好易印,如果見個麵團軟化,就再碌平再雪硬再印啦..
整完曲奇,就煮我個簡單晚餐,煙三文魚卡邦尼長通粉,買左包鮮磨菇切片,長通粉我最中意係凍水入煲,一水滾就熄火,等佢自己焗淋,依個方法又可以煮得淋啲粉,又唔會過淋,岩岩好架,跟住開鑊下油炒磨菇,加入卡邦尼汁(之前係吉之島買落一包包既),再加入長通粉,煮至收汁,面放上煙三文魚,灑啲蕃茜...食得..成個過程都唔洗15分鐘....
今日老公要出街食飯,我要自己洗碗,好攰...一個病人,仲要揍住另一個病人,仲要煮飯焗餅洗碗..好攰..真係好攰...要去休息了...
