聖誕樹Capcake

又就尼到最開心既聖誕節..聖誕節好有氣氛,又有連續兩日假期,真係好好好開心..而家有小朋友,就更加覺得開心..

睇左好多聖誕食譜,有好多野想整,上年整過樹頭蛋糕,今年應該唔整啦...

見到一個朱古力香蕉小蛋糕,好唔錯咁..不過整緊時先發現我無晒可可粉..爭左樣野,真係有啲可惜...

不過都完成左啦...蛋糕係香蕉提子小蛋糕,面係抺茶芝士牛油,加啲雪花糖粒上去..好有聖誕味道呢
^^....

學校旅行

天氣晴朗,今日係悠悠學校一年一度旅行日..一家三口開開心心出發~~~

8:30係學校對開空地上車,首先出發去搭山頂覽車..悠悠第一次搭覽車,仲要同成班小朋友,開心到佢呢....

上到山頂,有部份小朋友自費去參觀臘像館,我地怕悠悠會驚,所以無去,就係山頂四圍行下,最受歡迎既當然係兒童遊樂場...

係山頂玩左一陣,到11點就搭覽車返上旅遊巴,有個媽媽遲晒大到,差唔到成12點先落到尼,要我地成車人等佢呢...

之後到左香港仔一間酒樓食午餐,食物質素一般,服務質素唔多掂,上菜好似掉上尼,好似餵豬咁=_=...

食飽飯,大家再到香港公園玩,全程我地都係同悠悠最好既朋友仔,梁諾文一齊行,一齊玩,睇見佢地就真係好好笑...大約3點,我地就要係出口集合,回程返去喇..

今日見到全班小朋友,我就知道點解平時悠悠提起既,來來去去都係個幾個..原來有部份小朋友,感覺上都怪怪地..都係比較沉默,只係痴住媽媽,無點同其他人玩既...

返到屋企,大家都好攰...不過我都仲有煮個美味晚餐 ^^...就咁過左個happy day
啦..

菠菜肉鬆紫菜包

7/12,
星期五,今日同BB姨姨食生日飯,一家人去左坑口村扒房,食左一餐好豐富既晚餐,媽咪唔太岩食依啲鬼佬野,太肉太濃了..keke..

8/12,
老公話好想煮羊腩煲,BB姨姨打尼,話原先同媽咪去澳門玩既,但因為媽咪既咳一直未好,所以取消左,變左佢地今日無野做...所以就叫埋佢地幾個過尼我屋企齊齊食羊腩煲啦..

除左個羊腩煲,老公仲整左個臘味飯,買左一包肥牛,生菜,脆肉鯇,炸魚皮,响鈴等等...配埋自家既荔枝酒,一家人食得好鬼開心...比尋日出去食要開心啲添呢...kaka...

今日我仲跟Angie整左個菠菜肉鬆紫菜包,個菠菜係前幾日買既,買左一斤,有半斤打左做菜蓉,放左入冰格,今日拎返出尼解凍...本來係就咁菠菜包既,岩岩今日係Angie到又見到佢整左紫菜肉鬆包喎..諗起配埋菠菜都夾味呀,就係咁,係食飯時間個包包就出爐,一出爐佢地都話要食..一邊羊腩煲,一邊再食包,攪到我相都影唔切,只係影到一張....不過感覺真係好開心...原來包包一出爐,咁多人响應,係一件咁開心既事...平時只係一家三口時,好難有依種感受呢...keke

紅酒燴牛尾 + 心太軟

今朝起身,同悠兩個人去行Mega
Box,可能時間仲早,商場好少人,好好行,行完IKEA,再行吉之島...尋日同兩父囡先行完銅鑼灣既IKEA,仲買左幾隻玻璃碗碟同一對燭台,為聖誕做好準備..今日又再行,仲要係少人既,真係太好行..又可以去兒童部比悠悠玩下..

就咁行左半日,返到屋企都成4點了,尋日買定啲材料,返到即刻開工,煮紅酒燴牛尾,又係為聖誕做準備,要搵一個very
good既食譜..

上次用炆焗炆焗方式,攪左半日都唔係好夠淋,今日改做炆兩個鐘,出尼效果唔錯,軟硬適中,不過味道唔係太入,下次試下早一日炆好,浸佢一晚,咁應該very
good喇...

另外仲做左個甜品,心太軟,係就係好流呀..但食落去,好朱古力,好似食緊朱古力咁,唔係咁似蛋糕,下次試下第二個食譜先...

香港國際烘焙展2012

最近係地鐵見到依個廣告..香港國際烘焙展2012

見到烘焙兩個字,我對眼即刻發光,上網了解過,依個烘焙展本身應該係for商業用既,但都會有for烘焙發燒友,個展覽會有啲用具,原材料賣,亦都有一啲課程可以報,仲有一啲蛋糕示範咁..

我依個新加入既發燒友,一定要去學下野啦...可惜我身邊無人愛好烘培,唯有單拖出馬,掃得就掃,順便去見識下..我諗係烘焙學入面,我仲有好多好多野唔識呢...

一於gogogog...開展日期係5/12/2012 - 7/12/2012,
係灣仔會展,有興趣既朋友可以到時去行下啦 ^^

芒果拿破崙~~學習編

之前係團購用150元,買左一張300元代用劵,係Cake一Cake既代用劵,之前我話過團購既野真係唔多可信,但我知道,Cake一Cake會係唔同既,因為一來佢出名,二來我有去佢到學過,Miss真係幾好架...

今次多得Fiona,佢做晒買代用劵,Booking既野,原先想整另一款cake既,但實在點都就唔到佢開班時間,最後我地揀左芒果拿破崙,酥皮,真係要出去學一次架呢..

今日由7點整到11點,Miss真係好好,講得好詳細,有問必答,同之前既團購真係差好遠,不過其實佢一堂真係唔平,我地用左coupon都要260元,如果無就差唔多成400元呢...不過我相信,物超所值,老師好有心機慢慢教,如果平個啲,佢會幫你手整,咋咋淋趕你走囉..最好笑係整完之後,Miss仲好有心機咁同大家逐一影相,仲要睇晒燈光角度,教埋你點擺pose呢...真係下次可以開班教攝影..哈哈哈..

三個鐘,學咗好多野..了解晒塊酥皮..諗起屋企雪柜個舊酥油..我要快啲決解咗佢...加油加油gogogog!!!

柚子芝士焗餅 + 草莓馬卡龍

最近天氣又凍又熱,又乾又濕,都唔知想點,成個衣柜冬天衫同夏天衫放晒係到,前一日著住短袖,第二日可以要著褸既...前一日著涼鞋,第二日著boot...玩死,,,

今日又係落雨天,濕濕凍凍咁,唔想出街,想打邊爐..

放工返將軍澳食個午飯,買埋材料,就返屋企,今日懶,全部材料係惠康買,不過真係好唔掂..
佢新鮮切左條脆肉鯇,真係好新鮮喎..點知唔脆既,仲有啲粉粉地...=_=
炸魚皮,唔係脆,唔係淋..係韌既..象拔蚌,唔脆...蝦滑,又淋又腥又臭,掉左..唯一好食既係粟米...唉..

下午唔洗準備煮飯既野,得得閒閒就試做馬卡龍,不過真係唔岩時間,由4點幾整好,吹到9點都唔乾...算..超入爐..出尼好醜,又爆,又乾咁,仲要條裙仔超迷仔.....不過第一次做,有咁既效果都算啦..

尋日仲整左個柚子芝士焗餅,今日甩模後,搽啲果醬上去,食得,唔錯..不過都係..樣有啲衰..

都唔知點解,芝士焗餅係我人生第一個餅,但越做越差...

今日我整野時,悠悠好專心係到畫畫,座係梳化到畫畫下,仲要跪埋落地,但就唔肯去枱到畫,真係咁有藝術家脾氣??