瞓到成11點,起身同悠悠出去食啲野,行一陣...
今日見個豬仔幾乖,行到3點,同佢去食雪糕啦...其實係自己好想食..kaka..
我好中意去Haagen
dazs食雪糕,雖然係幾貴,但見佢裝飾到啲雪糕咁鬼靚,真係睇下都開心架..
食完雪糕,返去屋企又隌悠悠午睡,依啲懶人生活真係好正呀....
瞓醒覺,準備晚餐,今日整悠悠好中意食既可樂排骨同炒烏冬...個豬仔食排骨時問我..點解啲可樂排骨無可樂味既....kakakaka...唔通你想仲有氣既咩....笑死我..需然無可樂味,但佢都食到津津有味呢..
煮飯時我再整左個啤梨小紅莓合桃白朱古力小蛋糕,食譜用160度焗1個鐘又15分鐘,但我諗我起碼焗左1個鐘又45分鐘先熟得晒..仲要見好多油係個底到流晒出尼...場面有啲恐怖..
蛋糕出爐試一口,都唔錯,好香口好滿足呢
今晚約左好朋友呈呈尼屋企作客,又係我練習既時間...
呈呈指定要燒雞同紅酒燴牛尾,紅酒燴牛尾煮過好多次,今次算係好熟手了,尋日已經先煮定,今日番熱就得...
中午開始先整定甜品,放落雪柜,跟住就醃好隻雞,放係到風乾..再尼卷好啲風乾火腿哈蜜瓜,再煮好湯,整沙律,煮埋個飯,焗返啲包就總算完成..忙左半日呢..
呈呈同亞沖5點左右就到,呈呈幫我團購買左牆貼,我地一齊係到貼,玩左一論就準備食飯啦..
佢地仲帶左支香檳尼,不過酒精成份太高,我地唔多飲酒既都覺得太濃了..下次我再為你地準備果酒啦
^^
好,唔講咁多...開飯~~~
而個飯後甜品,就係我第一次整既法式焦糖燉蛋,估唔到好成功,好香滑,第一次用支火熗,燒得有啲醜...但塊焦糖好脆好好味呢 ^^
法式焦糖燉蛋食譜參考自 :
http://www.rthk.org.hk/elearning/dessert/cake_cremebrulee.htm
心思思又想整野,但收左工,返媽咪到食埋飯再返屋企都成九點,時間有限既情況下,只可以做簡單既野,咁不如做曲奇啦,但如果做唧花同印模都比較花時間,諗落最好都係切開一塊塊既,快靚正呀..
之前整過好多曲奇都係比較鬆,入口融化個種,今次好想做一個鬆脆既,仲要係面加啲砂糖,咁悠悠一定好中意食呢,入面選擇咗小紅莓同杏仁粒,一出爐好香啊..即時忍唔住要食,真係好好食,悠悠都食左兩個,食個時仲係熱,所以好鬆化,我諗凍左會脆口啲...
材料 :
無鹽牛油
100g
低筋麵粉
140g
粟粉 10g
糖粉
75g
蛋
半隻
小紅莓及杏仁 約50g
(可除意)
做法 :
1.
牛油室溫放軟後打軟,加糖粉打至發白
2. 加入蛋液打勻至鬆發
3. 伴入小紅莓及杏仁拌勻
4. 篩入底筋麵粉及粟粉拌勻
5.
用保鮮紙卷起,放入凍格雪半小時至硬
6. 切片,面灑砂糖,放入已預熱180度之焗爐內,焗約20分鐘至金黃色
聖誕前買左啲小袋仔,諗住聖誕整曲奇送禮既,最後曲奇無做到,袋仔都無用到...唯有快啲用埋佢啦..唔係要放到出年聖誕喇...啲袋仔好靚架..
之前係團購買咗啲野,要出旺角拎,所以今日收左工,就一家三口行下好耐無行既旺角,
一出到去先去栢裕拎野,之後去食個午飯,再去行商場...旺角啲商場真係好耐無行,又人多又熱,悠悠行一陣就開始嗌攰嗌熱...帶住個細既,真係行唔到街啦..
見佢都肯開左一陣,就同佢去食下雪糕,氹下佢開心啦..上網睇左,朗豪坊有haagen dazs,
去到要等位,好彩岩岩有幾枱都走,好快有位啦...
tea set同雪糕火鍋價錢一樣係$228, 火鍋有成16個球,費是悠悠食太多雪糕啦,所以叫左tea
set,仲貪佢有兩杯飲品..
個tea
set有四個雪糕球,有兩件好似雪糕三文治咁既野..影埋相都溶溶地...我叫左我最中意既綠茶同紅桑子,超好味,老公要左一個百利甜酒味既,佢話無乜酒味..悠悠就梗係要朱古力啦...食到連隻碟都想食埋..
第二層有兩杯奶凍咁既野,上面有啲士多啤梨粒,奶凍無奶味,仲好實下,一啲都唔滑...另外有兩塊餅仔,上面有粒朱古力,無乜特別,仲有無件應該係杏仁蛋糕,有四份一粒仔士啤梨係面既,依個OK好味,但實在勁細件..第三層都係水果,士多啤梨好大粒....
食完雪糕,就買食材返屋企,又玩BBQ...個BBQ爐大大話話用左5,6次...一定要襯天氣凍時用多啲,唔可以比佢打入冷宮...
今次攪咗啲新花款,除左基本既雞翼,豬頸肉,牛肉粒之外..整左個金菇肥牛卷..仲有芝士雜豆釀磨菇,芝士白汁螺絲粉同芝士年糕..
係百佳見到有依隻pizza芝士,係有兩隻芝士係入面,好似幾方便,又唔貴,只係39.9...不過芝士味真係淡左啲囉...平野都係無好啦..
仲有我好中意既燒菠蘿,當食肉食到好漏既時候,食片燒菠蘿,即刻舒服晒...
食飽飽,悠悠就開始玩今日出旺角拎既團購玩具喇..就係依個貼牆黑板啦...30幾元好大張,依到剪左三份一左右咋..幾方便既呢...
2012年最後一天,公司兩點收工,係要大家食埋個Lunch先放人...仲要無人通知,無通告..幸好偷聽到,唔係都唔知閃得....唉...
返到屋企hea呀,今日真係好鬼凍,一家三口係被窩到,唔想郁..兩父囡瞓覺,我拎住個電話煲台劇..
6點就出發去尖東帝苑食Buffet喇..公司年年都有既,但以往係平安夜食既,今年改左31號呢,
一去到,見到有Live
Band,氣氛幾好,成枱面都係party玩具,悠悠玩到唔願出去拎野食,我就第一時間去拎返碗湯暖下身先,今日真係好鬼凍呢..西湯得一款,好似係龍蝦魚翅湯,想話配個包,但全部凍冰冰,硬邦邦咁,睇見到唔想食..
暖左身就食刺身喇...啊..有好多款..仲要有我最愛既帶子,大大粒...好正呀..一人份量都好多,成晚我食左9粒帶子呢..真係好味到暈
見到有成隻Ham係到,有專人係到片出尼,再卷舊哈蜜瓜...唔掂,食到停唔到口...
仲有座龍蝦山..不過蝦蟹我要少吃,只係食左一隻,都好滿足了..
到食熱盤,竟然有做法覆雜既威靈頓牛柳..好少可呢...
仲有好淋入口即溶既和牛...
甜品有好好食既馬卡龍,唔太甜,好味,食左好多粒呢 ^^, 其他甜唔都好好食,款式唔多,但味道唔錯
食食下,Live
band轉尼一場勁歌熱舞,氣氛突然熱起尼..悠悠都企埋出去跳舞呢..跟住到一個小胖小出尼,扮近排超熱既江南style,炒起全晚最熱既氣氛,好多人走出去跳舞呀,拍片呀,勁開心呢...
食到咁上下,有人尼問我地餐飲,跟住先知道原來一座底時,有人拎住啲果汁尼問我地要唔要飲品個啲飲品,係唔算餐飲,要六十元杯..竟然啲人無出聲,太過份,我去問清楚個秘書,先知全場好多人中招,後來應該老細都有照找數啦...依樣野就真係太過分..明屈咩...
9點幾我地就走喇..返屋企睇住電話倒數...Happy New
Year~~~~
今日收工返去同屋企人飲茶,跟住細細妹尼我屋企學做蛋糕,佢話明天要拎去畫室請大家食噃..
返到屋企四點幾開始,細細妹依然係滋滋油油既個性,要開住音樂,倒杯荔枝酒,悠悠閒閒咁做蛋糕..今次全程我都只係用口講,唔幫手,平時我只要一個小時做好既蛋糕,佢整左兩個幾鐘仲未完成,襯佢放左個蛋糕入雪柜定型時,我就拿拿淋煮飯啦..成六點幾喇..
今日我仲要整既係芝士粟米釀雞翼,好彩一邊教佢做蛋糕時,我一邊起晒啲骨先,唔係真係天光都未有晚飯食..
釀好啲雞翼就入焗爐佢...切左舊雞搥出尼,就醃一醃,煎香佢,再用蜜糖檸檬煮個汁,好開胃呢..
另外再整左個蠔砵,蠔同蒸蛋我一向都麻麻地,但依個食譜見佢有油炸鬼係面,好吸引我,所以一試,不過係蒸蛋時出左意外,啲水滾起晒,走左入個砵到..又沖左一啲蛋出尼..總之就大件事啦
=_=...跟住再有一個意外,係原來放埋油炸鬼先蒸蛋既,我走去蒸完蛋先放油炸鬼,好笨,攪到好似油炸鬼同蛋分離咁...so
bad...出尼啲蛋蛋老老地,幸好中間還好...加左果皮同莞茜既蒸蛋,無左蛋腥味,岩晒我呢...
跟住睇返啲釀雞翼,啲芝士流晒出尼...好香好香呢...不過可能醃得唔夠時間,唔係太夠味,不過總算唔錯啦...
食飽飯,細妹又心思思想食甜品,但材料同時間有限,我地決定整梳乎厘,梳乎厘我好中意食,但因為一出爐要即食,所以我未整過,因為好難一次整三丁人分量架ma..今次一於試下,2隻蛋就做左5杯出尼..簡單加左檸檬汁,都幾唔錯,不過檸檬同蛋白味真唔係咁夾呢...kakaka
食埋甜品後,細細妹再攪埋個蛋糕...今次連啲裝飾用公仔都係自己搓埋,都幾唔錯啦...之後聽佢講返,食既人都讚好呢...開心開心
^^
玩左幾日,大人又攰,小朋友又攰,今日係休息日..
Boxing
Day原先係應該拆禮物既,但全家都係心急之人,又點會等到今日先拆啦..早就拆晒囉..
今日瞓到十點幾,帶悠悠出去踩單車食早午餐...前一排成日落雨,好耐無同佢出去踩單車啦..
食飽買埋晚餐材料就返屋企啦..
返到屋企洗左三機衫,再執埋啲夏季衫..kaka係呀..而家先執呀..成個衣柜冬夏季都放晒係到,亂到垃圾岡咁呀..
等悠悠瞓午覺時,我就準備晚餐先...今日整個白汁蘋果焗豬扒...因為屋企人有兩個蘋果未食...
首先豬扒醃一醃,拍啲麵粉去煎一煎,等佢封住啲肉汁,之後放入焗盤,加小小白酒,用鍚紙封住,180度焗10分鐘
之後蘋果切片,用洋蔥爆鑊,加入蘋果炒,加入約2-3湯匙砂糖,加小小白酒,煮至汁杰身
蘋果鋪係豬扒面,倒入白酒蘋果汁,再加啲提子乾,紅莓乾,再放入焗爐焗8分鐘,加入杏仁片再焗至金黃
出尼估唔到咁好食...我以為豬扒唔會有蘋果味..但竟然啲蘋果味入晒去,好清甜..超級好味呀...
