悠悠結業禮

yeah....等左好耐....等到悠悠學校結業禮喇....

雖然悠悠只係K1生..仲有兩年先畢業,但結業禮上佢會表演,所以我好期待呢...

先尼校長致詞

小朋友出場,個個一舊飯咁..都唔知乜野事...

連有獎攞都唔識笑...

連我都有獎攞,係年頭既親子揮春設計比賽,好開心有份參與呢 ^^

跟住表演,見到成班小朋友,各有各跳,錯漏百出,但覺得佢地真係好可愛,好純真..比起上年,真係進步好多呢..

而K3畢業既小朋友,係到唱再見歌時,又播返佢地BB仔既相,同畢業相,見到佢地真係長大喇..我都覺得好感觸,如果到悠悠畢業時,可能我會喊呢...

結業禮完咗,我地就去食午飯,之後去睇今期最熱既電影...怪獸大學..

不過睇左第一集,第二集少左好多驚喜位..叫做不過不失啦..不過可以同悠悠去睇戲,真係好開心既事..希望第日到佢大個囡,會帶返媽咪去睇戲啦...

咸香芝士酥餅

前兩日整左三盤馬卡龍,都係失敗...完全唔知點解..點解點解...之前出去學過一次,都係失敗,吹唔乾既....之後再整過一次,都係失敗...前兩日再尼三次...依然係失敗..想點...想點...

淨左三隻蛋黃,今日要解決埋佢..唔想整布丁,因為肥..因為只可以放係屋企食...

所以整餅餅,可以派街坊...哈哈...

依個餅又方面,唔洗開機打,一個大碗攪掂..

材料 :

低筋麵粉 240g
粟粉 60g
蛋黃 3個
鹽
適量
Rosemary 適量
水 4-6湯匙
片裝芝士 5-6片 (切絲, 或可用芝士碎)
牛油 180g
(不要放軟)

做法 :
1. 底筋粉加粟粉過篩
2.
牛油由雪櫃取出,切細粒,加入面粉內,用手指按壓拌勻成沙
3. 加入水, 鹽及Rosemary搓成團
4. 輕手加入芝士拌勻
5.
碌平,印模,面塗上少許蛋液,灑上芝麻
6. 180度,焗約20分鐘至金黃色

 

醬汁雞扒沙律

減肥..減肥...減肥....

依排真係前所未有咁努力減肥...我真係太頂我自己唔順...真係太肥啦...岩岩生完悠悠都未有而家咁肥呀..

好多人話,你成日整蛋糕,美食..梗係肥啦...但...我每次整..整完我都只係食兩啖,有時啲海綿蛋糕呀,麵包我都係第二日做早餐既..而曲奇就多數派街坊啦..至多下午肚餓先食兩塊咁大把...又關乜野事呢...

我諗我肥既原因..最大係因為自從生左悠悠後,日日返媽咪到食飯..必定最少四餸一湯,白飯任裝..咁...點唔肥啦...

而家唯有努力減肥...星期日我都係自己煮既..兩父囡唔洗陪我減..佢地食麵,我食沙律...

用煎焗方法煮左幾塊雞扒,用日本豉油,老抽,糖去收一收汁,雞扒岩岩熟,好滑,好味..

再整個紅酒醋汁..伴蔬菜食..好清新...

努力減減減....

第三支蛋糕order - 鮮忌廉香蕉蛋糕

今日要做第三支蛋糕order,主人家好中意寵物寶寶,難度超高呀...

今日仲要遇上好多問題..首先係返到屋企先知得四隻蛋,我要整三磅大既蛋糕,三層海綿,點都要六隻蛋啦...點算....

唯有每層再整薄啲啦...好彩第一關過到...

第二關..校色...我弱行....攪到用晒成枝甜忌廉...唉..好浪費...

第三關..打忌廉..今次好似打得唔夠..唧個時溶溶地...

第四關...最大鑊...反轉個廚房都搵到5邊花花唧咀...唯有用個三邊既頂檔,但真係唔係個回事囉...

第五關..焗盤唔夠大,要用海綿左砌右砌..點知又買唔到大盒...又要就返個盒.. 

中間夾左香蕉,本來想話個海綿整朱古力味既..原來又無晒可可粉...

想係香蕉面加啲朱古力針..又得返彩針..仲要加左一層..漏左一層無架添..大懵..

再尼,,大間夾心既忌廉...本應係白色..但我忘記左...全部加左色..唯有用有色既,希望食既人唔會太不安啦...

唯有覺得滿意既,係難度最高既眼晴,我用朱古力整,都總算整得唔錯...

原圖係咁樣既 :

 

而家我個成品變左咁 ....都...OK卦....嘻嘻!! 

6週年-結婚紀念日

每年7月1日,大家都走去遊行時,我同老公就慶祝結婚紀念日..

今日原先老公要開工既,但佢偷懶,十點就返尼同我地去食早餐,之後就一家三口去泳池游水..

今朝打緊一號風球,都有啲擔心會落雨...但睇見出面陽光普照,唔理啦,去左先算..

去到11:40,
點知泳池原來12:00-1:00休館既...噢..個邊有無野好行..唯有去圖書館,同悠悠睇下書啦...

跟住一點正入場,換衫,落水...正呀..最中意中午又曬又熱既時候落水...

今年悠悠第一次下水,佢好開心,好勇敢添喎..自己走尼走去,成個頭落水都唔驚...好叻囡呢..

游完水,食個下午茶就返屋企啦..今日紀念日,點都要整個cake既,雖然好攰...

睇下雪柜有乜野物資...就整鮮忌廉藍莓蛋糕啦..夠快整好呀..

晚餐就由老公整啦,我真係好攰喇..今日晚餐主要係清雪柜,再另加一件牛扒...咁就攪掂...

不經不覺就六週年了....出年唔知會唔會真係七年之癢呢....老公..你癢我幫你抓下...哈哈

好友聚會 High tea

星期日啦...九點幾起身,梳洗,食個包,開工!!!!!

上廚房整整整....好彩尋日預先做定好多野,食朝叫做輕鬆好多,係出左少少意外..

諗住整木糠布甸,個淡忌廉打極都打唔起,座埋冰都唔得..可能係我落練奶落得太急太快....唯有即刻去浸片啲魚膠片,再入去凝固到就算..點知又出奇到成功,仲幾好味喎..

到左12點幾,朋友仔出發過尼,佢話勁熱呀....咁我地原先諗住飲茶既..但咁熱,點飲熱茶啦...

我再走上廚房,用左5-6個茶包,煲左一煲苿莉綠茶,再加啲冰,再蜂蜜,放入冰格,等佢地一尼到就凍野飲先...

個Tea兩點就開始喇..睇下有乜野食 ...

有牛油果三文魚牛角包..

乳酪雜果沙律

香茅雞肉串燒

肉醬薯蓉批

自家制玉桂甜甜圈

仲有甜品,木糠布甸..

餐後,朋友仔教我用部相機,我依隻笨喵,至多吸收到1/10...哈哈..好笨...之後老公返尼,又要人地再教一次...真係辛苦晒...

今次都係朋友仔提供既相,佢真係影得好靚呢...我要努力學下野,第日將我煮既成品,唔好食都要影到睇落好好食先得...kakaka

雞絲芝麻醬冷麵

天氣勁曬勁熱..有個風打緊尼..熱到爆,原先想去游水,但老公又病喎..咁唯有放工返屋企啦..

不過唔好游水都好既,因為明天有朋友探訪,我要預備high tea,如果游完水返尼,實攰死,唔想郁啦..

於是我返到屋企就走上廚房,整整整,洗洗洗,切切切....熱熱熱...係到同大家講下,我屋企係村屋, 我地住三樓連天台,而廚房係係天台既,所以..無冷氣...如果開埋焗爐,真係溶得架..

預備完明天下午茶既野,就要做晚飯,熱成咁,真係唔想食,所以最好整冷麵,整好放落雪櫃, 到晚餐時間先拎出尼,咁就食得落啦...