學習 . 美食 . 新朋友

之前,家姐係facebook到介紹左一個大師比我識,

佢做蛋糕,麵包,西餐都好叻...好多時我係煮食烘焙上有問題,都會係FB到問佢..

知道佢地今日一班舊同事有聚會,仲有大師付負晚餐..我就叫我家姐帶埋我去偷師呢..

4點到達,開始煮野..大師真係大師,洗菜都好講究..切野又快手..仲要每一樣野都會自己整..

今日真係學左好多好多...仲有好多好野食呢..

第一次同一班陌生人一齊聚會,好開心,佢地每個人都好nice,好好人..令我感覺好舒服,好開心呢..

熊貓不見了

做左咁多包包,有成功有失敗..但吐司就仲未有一次叫做非常成功..

上網見到個熊貓吐司,好想好想做...但又好無勇氣..

今日同同事講開,佢一句話,未試下囉,唔得又唔洗死既..

咁又係...好..比啲勇氣...做!!!

搓面團時,覺得面團好濕..有啲擔心..

做型時更甚...壓平係好黏,做到一petpet咁...

今日天氣好熱下..發酵得好快..依個係最開心既..

入爐後...好香好香好香...綠茶味好濃...點解入左吐司模都會咁香呢?

睇清楚..原來發到漏晒出尼喇...真係好勁呢...

出爐後..真係頂角喎...梗係頂啦..頂到瀉添啦...

係個邊見到啡色..就知個熊貓實走晒樣了...

一切...變左Snoopy既????kakaka

雖然變左樣..但質地好好,味道好好..算係我一次好成功既吐司了...yeah~~~

綠茶紅豆花花包

今日請左假係屋企,有時間就梗係要搓下包啦..

好耐之前買左一個花花模,一直都未用..

今日就的起心肝..整個綠茶紅豆花花包啦..

紅豆用左之前開左既紅豆蓉,一齊加入麵團搓,所以唔係好見到佢啦....食都唔多覺呢 >_<

第二次發酵時,要包好個花花模,都唔知發到乜野程度..

原定發酵一個鐘,我都發左個半鐘..就係怕佢發唔大..

焗完出尼,都真係唔夠大呢..只有半邊花花...

但味道好好...食完一片又一片..

日式海鮮炒麵并可樂雞翼

生病了....晚餐煮點簡單的...

買咗一包日式炒麵,附有醬汁既..再買咗一包海鮮雜錦,椰菜同洋蔥..

先用清水煮開麵餅,待用,

同一煲水,加入鹽..煮一下海鮮,

開鑊,炒香洋蔥同椰菜,再炒炒麵,下醬,炒勻,加入海鮮,椰菜同洋蔥,完成..十分鐘攪掂..

另外再煮左個可樂雞翼,悠悠最愛..

都好簡單...雞翼大火煎香表皮,加入可樂,小小生抽老抽..慢火煮左10分鐘至收水..完成..

簡單又好味既一餐 ^_^

遇上假蛋

國內經常報導有假蛋,一隻蛋只係一個幾毫既事,點解仲要整假呢?

唔通..咁都仲可以有錢搵...為左錢,真係可以無惡不作?

假蛋我就從未遇到過喇..

今日我就自己製造...哈哈...

之前係依個網頁http://www.icook.hk/html/index.php?option=com_rapidrecipe&page=viewrecipe&recipe_id=345&Itemid=30&lang=en見到依個食譜...好有趣..加上我已經有材料入面既檸檬醬..

一於自己製造假像....假蛋出場...

其實佢係白朱古力檸檬醬芝士杯..

後面放埋啲真蛋係度,都幾可亂真喎...

我就係用依隻檸檬醬架喇..之前係Tasty買既...好中意佢,好香濃架..酸酸地,整海綿蛋糕用尼做夾心又得,做餅乾餡又得..馬卡龍餡一樣得..

十週年紀念 @ 栢寧酒店27樓自助餐

好耐之前係團購買左栢寧酒店既Buffet,諗住老公生日去食既,

點知預早成個星期book都book唔到,7月頭個時話個booking去到8月...洗唔洗咁誇呀..

於是改為13/8...即係我地拍拖十週年紀念日喇..

依間5星級酒店..個大堂只有3星,好細..

上到去...間餐廳細到...放食物位都好細..

團購二百六十幾元,另收加一..算啦..預左依種質素..

不過講真,佢真係只值二百幾元囉..絕對唔係購團優惠左囉...

我地早左小小上去,一夠鐘佢通知我地可以開始拎野食,啲人就湧晒出去魚生位..

佢有長腳蟹,有螺,有青口,有大蝦,有幾款魚生,但可以話,全部都無乜味既..

太多人,我就諗住先攞沙律..沙律有三款菜..蕃茄仔.....無喇..真係無喇..汁料有三款,無麵包粒,無芝士碎,無煙肉碎...想食粟米同青瓜都無呀
>_<

到熱盤...大約10款左右,食晒會加,但唔會變...我只係拎左幾樣,好記得一個紅酒燴雞,雞肉無味,而且鞋到爆..好似食刷膠咁...有個椰汁蝦比較好,入到味..

磨菇忌廉湯OK,麵包有三款,全部都好硬..

到甜品,款式當然唔多,我一次拎晒咁多款..當中有得蘋果慕絲同朱古力慕絲好食,其他都食兩啖放棄...

仲有..佢每位送半隻波士頓龍蝦,完全無味..點解可以一啲龍蝦味都無既???我見有好多枱人都無食到呢...

今次又經歷一次,團購無好野...下次真係要小心睇清楚先喇...=_=..

芒果拿破崙

人生有幾多個十年呢...

咁就到左我同老公第一個拍拖十週年...

其實我地識左5年先至拍拖,所以,大大話話都識左15年,都算睇住對方長大囉..

十週年..有乜慶祝活動呢...其實來來去去都係食餐飯,整個cake啦..

聽日先係正日,我BOOK左銅鑼灣既栢寧酒店Buffet,係之前團購左架喇..

聽日食完再同大家講吓得唔得啦..

今日整左個簡易拿破崙蛋糕,因為冰箱個幾塊現成酥皮,再唔用就掉得架喇,

所以,懶懶地,就做佢啦..

一早切好酥皮,叉啲窿,200度焗15分鐘左右就攪掂,

以為屋企仲有即食個隻吉士粉..原來無晒,得返要煮個隻..

加啲奶同糖,慢火煮一陣就得啦..都好easy..

切好粒粒芒果,一層一層咁砌上去..攪掂...

即刻食啲酥皮,中間都有小小淋左了..有機會都係試下自己搓酥皮..

唔知點解出面個啲可以唔淋呢???