突然心血來潮的澳門行(上)

老公星期日都請左假..諗左好耐都未諗到去邊..就係前兩日突然好想去澳門行下..

就係咁..好急切咁搵左間酒店..book埋船飛就出發喇

下午一點收工,準時閃人..打的去港澳碼頭,買啲麵包就上船啦..

落左船先去酒店check in
,今次住依間係萊斯酒店,只係三星,但價錢又唔係平,要18XX,

但入到去..好靚好靚呢...歐陸式房間,仲有個小露台,海景靚爆..依間酒店無泳池呀,Spa個啲既..想享受依啲就要去高星級啲啦..但我地唔要既..間房靚就掂啦..kaka..

放底行李,第一站係二龍喉公園,目的係帶悠悠去睇黑熊既..

去到我地先搭攬車上山,再上東望洋燈塔同悠悠影下相啦.之後慢慢行返落山..

落返山諗住睇黑熊...點知隻bearbear返左房大覺瞓..無得睇,個傻豬即刻喊左出尼...陰公
>_<

離開左公園,就係附近一間cafe休息一下..佢有件士多啤梨忌廉蛋糕超好食,個忌廉好香好滑,同我平時打起個啲好唔同..海綿蛋糕又鬆軟,真係一讚呢..

休息完,就過去大三巴..經過見到有個土耳其人係到賣土耳其雪糕,佢好攪笑既,係咁逗人笑,逗人玩,我就帶悠悠去買,佢見到悠悠就捉住佢隻手鍚左一啖..悠即咸..好好笑...佢賣依個雪糕口感好特別,又唔甜,煙煙韌韌既..我幾中意..

終於到大三巴,其實大三巴真係影過好多相..但今次係想帶悠悠去影..所以又去一轉啦..

影完相都天黑了,之前諗定去買野既小店子都關門了..只係買到椰子雪糕...椰子雪糕都幾好味..其實我覺得應該叫椰子雪芭呢..

路過祥記..無乜人喎...咁又去食下先..我中意佢個金沙炸鯪魚球..悠悠就好中意個魚皮..食個不停..

食飽飽之後就係噴水池附近影下相..就返去漁人碼頭

行一陣就返去酒店...係露台嘆返包奶就瞓覺去了

迎賓

今日邀請左悠悠既契媽尼到做白老鼠...

一早就計劃好個菜單...點知又出現左問題..

尋日先做好個綠茶奶凍,想話係面放唧一層朱古力慕絲既...

點知..奶凍唔凝固,仲出兩隻色..有沉底現像...

唯有即改..改做薄荷朱古力慕絲..但點都搵唔到個唧咀..翻轉個廚房都搵唔到...

變左就咁入杯...又抺唔平...唯有加個雪糕係面遮下醜算...

另一個意外係個意大利飯...因為煮個陣時..又要顧個薯仔,又要顧個豬仔骨,又要叮返熱啲麥包..

係手忙腳亂下...攪到湯太多..飯唔夠軟..仲要燶底
>_<..好傷心..

次次請客時都一定有事發生既..點解
@_@,.,,,真係要好好跟大師學習吓...

不過我知道我成日失敗既原因...因為我成日想一次出晒全部菜,又想每道菜都熱辣辣..真係有難度呢...

今次有唔完美最地方..但都要多謝兩位白老鼠..要你地食一啲失敗作..真係唔好意思喇..kaka..

朱古力漏心芝士蛋糕

睇完我個標題,係唔係以為我打錯字呢...其實無打錯..係我整錯...流心變漏心..

話說因為最近先發現一個好朋友既公司同我好近,而佢又好中意食甜品既,咁我就話要整個蛋糕比佢啦...點知佢好有要求..要朱古力..仲話中意流心..

上網搵唔到有朱古力流心既凍餅...得心太軟,但心太軟要熱食先流到心呢..咁點好..

唯有...又打天才波..不過今次唔係天才..係蠢材了..

我買左一包特濃朱古力奶,再加座溶左既朱古力拌勻,雪至冰做流心....

到左第二日脫模時...漏呀...漏呀...啲流心係個蛋糕邊邊到漏出尼....

個流心太稀啦..死死死..點算...仲約好朋友仔明天交收添..

幸好漏左小小就停左...我唯有用圍邊圍住佢,求求其其放啲裝飾算了..

我諗入面應該無晒流心架喇..應該溶入晒個蛋糕入面..餘下個啲都漏晒出尼了..

希望仲係好味啦 >_<....

學習 . 美食 . 新朋友

之前,家姐係facebook到介紹左一個大師比我識,

佢做蛋糕,麵包,西餐都好叻...好多時我係煮食烘焙上有問題,都會係FB到問佢..

知道佢地今日一班舊同事有聚會,仲有大師付負晚餐..我就叫我家姐帶埋我去偷師呢..

4點到達,開始煮野..大師真係大師,洗菜都好講究..切野又快手..仲要每一樣野都會自己整..

今日真係學左好多好多...仲有好多好野食呢..

第一次同一班陌生人一齊聚會,好開心,佢地每個人都好nice,好好人..令我感覺好舒服,好開心呢..

熊貓不見了

做左咁多包包,有成功有失敗..但吐司就仲未有一次叫做非常成功..

上網見到個熊貓吐司,好想好想做...但又好無勇氣..

今日同同事講開,佢一句話,未試下囉,唔得又唔洗死既..

咁又係...好..比啲勇氣...做!!!

搓面團時,覺得面團好濕..有啲擔心..

做型時更甚...壓平係好黏,做到一petpet咁...

今日天氣好熱下..發酵得好快..依個係最開心既..

入爐後...好香好香好香...綠茶味好濃...點解入左吐司模都會咁香呢?

睇清楚..原來發到漏晒出尼喇...真係好勁呢...

出爐後..真係頂角喎...梗係頂啦..頂到瀉添啦...

係個邊見到啡色..就知個熊貓實走晒樣了...

一切...變左Snoopy既????kakaka

雖然變左樣..但質地好好,味道好好..算係我一次好成功既吐司了...yeah~~~

綠茶紅豆花花包

今日請左假係屋企,有時間就梗係要搓下包啦..

好耐之前買左一個花花模,一直都未用..

今日就的起心肝..整個綠茶紅豆花花包啦..

紅豆用左之前開左既紅豆蓉,一齊加入麵團搓,所以唔係好見到佢啦....食都唔多覺呢 >_<

第二次發酵時,要包好個花花模,都唔知發到乜野程度..

原定發酵一個鐘,我都發左個半鐘..就係怕佢發唔大..

焗完出尼,都真係唔夠大呢..只有半邊花花...

但味道好好...食完一片又一片..

日式海鮮炒麵并可樂雞翼

生病了....晚餐煮點簡單的...

買咗一包日式炒麵,附有醬汁既..再買咗一包海鮮雜錦,椰菜同洋蔥..

先用清水煮開麵餅,待用,

同一煲水,加入鹽..煮一下海鮮,

開鑊,炒香洋蔥同椰菜,再炒炒麵,下醬,炒勻,加入海鮮,椰菜同洋蔥,完成..十分鐘攪掂..

另外再煮左個可樂雞翼,悠悠最愛..

都好簡單...雞翼大火煎香表皮,加入可樂,小小生抽老抽..慢火煮左10分鐘至收水..完成..

簡單又好味既一餐 ^_^